काठमाडौं । जेनेरेटिभ एआई च्याटबटहरूले हामीले दिएका डेटा रेकर्ड गरेर राख्ने गर्छन् । अनि सोही डेटाको आधारमा हामीले भविष्यमा गर्ने कुराकानी तयार हुन्छ । यही प्रक्रिया च्याटजीपीटीमा पनि लागु हुन्छ ।
च्याटजीपीटीले तपाईँको पुराना कुराकानीको आधारमा अन्य प्रश्नको जवाफ दिने गर्छ । तर यदि तपाईँ च्याटजीपीटीसँग आफूले गरेका कुराकानीहरू रेकर्ड नगरोस् भन्ने चाहनुहुन्छ भने यसको लागि ओपनएआईले च्याटजीपीटीमा ‘टेम्पररी च्याट’ (temporary chat) नामक फिचर उपलब्ध गराएको छ ।
सो फिचर प्रयोग गर्दा च्याटजीपीटीले तपाईँको कुराकानीको कुनै रेकर्ड राख्दैन । अर्थात् तपाईँले कुनै एउटा विषयमा एउटा सेसनमा कुरा गर्नुभयो र सेसन त्यही एक्जिट गर्नुभयो भने नयाँ सेसनमा तपाईँको पुरानो कुराकानीको कुनै रेकर्ड हुँदैन । सिस्टमले तपाईँको पुरानो कुरा सबै बिर्सिन्छ । हरेक नयाँ सेसनमा नयाँ कुरा गर्न सकिन्छ । यसले प्रयोगकर्ताको गोपनीयतालाई पूर्णरुपमा प्रत्याभूत गर्छ ।
‘टेम्पररी च्याट’ प्रयोग गर्दा तपाईँको कुराकानी हिस्ट्रीमा देखिने छैन । ओपनएआईका अनुसार यस्तो कुराकानी च्याटजीपीटीको मोडेल प्रशिक्षणका लागि उपयोग गरिने छैन । तर, सुरक्षाका कारण ओपनएआईले ३० दिनसम्म कुराकानीको एक प्रति सुरक्षित राख्न सक्छ । यदि कुनै नीति उल्लङ्घन भेटिएन भने यो डेटा त्यसपछि स्थायी रूपमा मेटाइने कम्पनीले उल्लेख गरेको छ ।
वेबमा यसरी प्रयोग गर्नुहोस्
– च्याटजीपीटी ओपन गर्नुहोस्
– स्क्रिनको बायाँतिर सबैभन्दा माथि भएको ‘न्यु च्याट’ सँगैको च्याटजीपीटीका भर्सनहरू देखिने अप्सनमा क्लिक गर्नुहोस्
– त्यहाँ सबैभन्दा अन्तिममा रहेको ‘temporary chat’ को टोगललाई अन गर्नुहोस् ।
– यसपछि तपाईँले आफूले कुरा गर्न चाहेको विषयमा अन्य सामान्य च्याटबक्समा जस्तै गरी च्याट गर्न सक्नुहुन्छ । यो विन्डो बन्द गरिसकेपछि तपाईँको पुरानो डेटा त्यहाँ सेभ पनि हुँदैनन् ।
मोबाइल यसरी प्रयोग गर्नुहोस्
– च्याटजीपीटी ओपन गर्नुहोस्
– स्क्रिनको सबैभन्दा माथि दायाँतिर भएको तीन ओटा थोप्लामा ट्याप गर्नुहोस्
– अब ‘temporary chat’ मा ट्याप गर्नुहोस् । यति भएपछि तपाईँले सुरक्षित र गोप्य रूपमा च्याटजीपीटीमा आफ्नो कुराकानीको रेकर्ड नरहने गरी च्याट गर्न सक्नुहुन्छ ।
पछिल्लो अध्यावधिक: चैत १८, २०८१ ९:३७
सामाग्री श्रोत :
टेक पाना
