दमौली (तनहुँ) जिल्लाको आँबुखैरेनी गाउँपालिका–४ स्थित आँपचौर जंगलमा आज आगलागी भएको छ। मस्र्याङ्दी जलविद्युत् आयोजना नजिक रहेको जंगलमा आगलागी भएपछि उक्त आयोजनालाई अग्नि रेखा लगाएर सुरक्षित राखिएको इलाका प्रहरी कार्यालय आँबुखैरेनीले जनाएको हो।

आगलागी नियन्त्रणका लागि इलाका प्रहरी कार्यालयका प्रहरी निरीक्षक टेकप्रसाद सुवेदीको नेतृत्वमा २० प्रहरी र जलविद्युत् आयोजनामा खटिएका नेपाली सेनाका सुवेदार विद्याधर रानाभाटको नेतृत्वमा १० जनाको टोली खटिएको छ।

स्थानीयवासीको सहयोगमा आगलागी नियन्त्रणको प्रयास भइरहेको प्रहरी निरीक्षक सुवेदीले जानकारी दिए।

काठमाडौं । अन्डरवाटर फोटोग्राफीको लागि प्रचार गरिएको ओप्पो ए फाइभ प्रो नेपाली बजारमा आइसकेको छ । यो फोन ड्युराबिलिटी टेस्टको लागि गर्न सकिने जति टेस्ट सबैमा पास भएको कम्पनीको दाबी छ । ३३ हजार रुपैयाँ मूल्यको यस फोनबारे आज म विशेष चर्चा गर्दैछु:

लुक्सको हिसाबले, यो फोन ठिकै छ । हामीले आजभोलि पाउने स्मार्टफोनको साझा डिजाइन नै हो, जसमा डुअल क्यामेरा मोड्युल छ । यो फोन दुई ओटा लुक्समा उपलब्ध छ – स्मुथ म्याट फिनिश र लेदर फिनिश ।

मसँग भएको फोन ब्युटिफुल ओलिभ ग्रिन कलरमा छ, जसमा भेगन लेदर डिजाइन दिइएको छ । लुक्सको हिसाबले यो फोनले न्याय गरेको छ । फोनमा ६.६७ इन्चको एचडी प्लस डिस्प्ले छ, जसको पिक ब्राइटनेस १००० निट्स रहेको छ भने रिफ्रेस रेट ९० हर्ज दिइएको छ । डिस्प्ले एमोलेड भएको भए वा कम्तीमा फुल एचडी प्लस भए राम्रो हुने जस्तो लाग्यो ।

अन्य विशेषताहरूमा जानुअघि, ड्युराबिलिटीको हकमा गरिएका अनौठा टेस्टहरू पनि यसले पार गरेको छ । चाहे त्यो ड्रिलिङ होस्, अन्डरवाटर फोटोग्राफी होस्, फोन फ्रिज गरेको होस्, वा स्विमिङ पुल मा फोन खसालेको नै किन नहोस् ।

फोनले वाटर एन्ड डस्ट रेसिस्टेन्सको लागि आईपी६८ र आईपी६९ को रेटिङ पाएको कुरा पनि थाहा पाइयो ।

मलाई चाहिँ टेस्टको क्रममा रमाइलो लागिरहेको थियो । आजको दिनसम्म आइपुग्दा प्रविधिको विकासले एउटा स्मार्टफोनमा यस्ता अनुभव गर्न पाउँदा रोमाञ्चक महसुस भइरहेको थियो । अझ, फोनले सबै टेस्ट पास पनि गरिरहेको थियो ।

यसैबिच, मलाई अर्को रमाइलो टेस्ट गर्न मन लाग्यो । त्यसैले मैले फोन तातो पानीमा राखेर टेस्ट गर्ने विचार गरेँ । पानी तातो भएकाले अलि डर लागेको थियो, तर नतिजा निश्चित थियो– फोनलाई केही भएन ! त्यसपछि मलाई लाग्यो कि यो फोन मभन्दा पनि बढी जिद्दी रहेछ । त्यसैले मैले यसको ड्युराबिलिटी टेस्ट यति नै गर्ने निर्णय गरेँ ।

अब फोनको क्यामेरा कस्तो छ, त्यसतर्फ जाऔँ । ओप्पो ए फाइभ प्रोमा ५० मेगापिक्सेलको मुख्य क्यामेरा, २ मेगापिक्सेलको सेन्सर र ८ मेगापिक्सेलको सेल्फी क्यामेरा दिइएको छ ।

उज्यालो प्रकाशमा लिइएको आउटडोर फोटोग्राफी सामाजिक सञ्जालका लागि तयार छ, कुनै शङ्का छैन । भित्र लिइएका फोटोहरू पनि ठिकै छन्, तर कम प्रकाश भएको ठाउँमा अलि न्वाइज देखियो । पोर्ट्रेट फोटोहरू पनि ठिकै नै आएका छन्, अवश्य पनि शेयर गर्न योग्य छन् । फिल्टर तथा ब्युटिफाई गर्ने अप्सन पनि फोनमा उपलब्ध छ, तर प्रयोग गर्ने नगर्ने तपाईंको इच्छामा भर पर्छ । यदि मलाई सोध्नुहुन्छ भने, म फिल्टरहरू मन पराउँदिनँ ।

भिडिओको कुरा गर्दा, भिडिओ स्टेबल छैन, त्यसैले सकेसम्म हात स्थिर राखेर भिडिओ खिच्न आवश्यक पर्छ । तर राम्रो प्रकाश भएको अवस्थामा भिडिओ क्वालिटी राम्रै छ । यसबाट ३० एफपीएसमा १०८० पिक्सेलसम्मको भिडिओ खिच्न सकिन्छ ।

क्यामेरामा अन्य मोडहरू पनि छन्, जस्तै स्लो-मो, अन्डरवाटर, टाइम-ल्याप्स आदि । साथै, फोटो एडिट गर्ने केही रोचक फिचरहरू पनि छन् । एआई एडिटको सुविधा दिइएको छ, जसमा स्मार्ट लासो, पेन्ट ओभर र रिमुभ पिपल जस्ता अप्सनहरू छन् । यी मोडहरू प्रयोग गरेर फोटोमा भएका अनावश्यक वस्तुहरू हटाउन सकिन्छ ।

एन्ड्रोइड भर्सन १५ मा आधारित यो फोनमा क्वालकम स्न्यापड्रागन ६एस फोरजी चिपसेट प्रयोग गरिएको छ । यो चिपसेट मिड-रेन्ज स्मार्टफोनहरूका लागि उपयुक्त छ, जसकारण फोनबाट गरिने सामान्य काम र गेमिङ सहजै चल्छ । मैले अस्फाल्ट ८ र पब्जी खेलेर हेरें । गेम बेसिक सेटिङमा राम्ररी नै चल्यो, तर हल्का गर्म भएको महसुस भयो । फोनमा भिसी कुलिङ सिस्टम भएकोले हिट म्यानेज भने हुन्छ ।

यसैगरी, फोन कलरओएस १५.० मा चल्छ । यूआई प्रयोगकर्ताका लागि मैत्रीपूर्ण छ । स्प्लिट भ्यू, स्मार्ट साइडबार, फ्लोटिङ विन्डोज जस्ता सुविधाहरू पाइन्छन् । वालपेपर, थिम, जेस्चरमा कस्टमाइजेसन गर्न सकिने केही अप्सनहरू पनि छन् ।

फोनमा केही अतिरिक्त फिचरहरू पनि छन्, जस्तै मिलिटरी ग्रेड शोक रेसिस्टेन्स । जसले फोनलाई कठोर वातावरणीय परिस्थितिबाट जोगाउँछ । यसले धेरै चिसो ठाउँमा पनि नेटवर्क र ब्याट्री टिकाइराख्न मदत गर्छ । त्यस्तै, बिकनलिंक नामक स्मार्ट कनेक्टिभिटी फिचर छ, जसको मद्दतले कम नेटवर्क कभरेज भएको ठाउँमा वा सिम कार्ड र वाईफाई नहुँदा पनि फोनमार्फत कल गर्न सकिन्छ । तर यो फिचर प्रयोग गर्न अर्को व्यक्तिको फोनमा पनि बिकनलिंक हुन आवश्यक पर्छ । हाल ओप्पोका केही मोडलहरू र रियलमीका सीमित फोनहरूमा मात्र यो फिचर उपलब्ध छ ।

यसैगरी, फोनमा एआई स्टुडियो छ, जहाँबाट एआई इमेज बनाउन सकिन्छ । यो अवतार जस्तै देखिन्छ । मैले यसअघि ओप्पो रेनो १२एफ मा पनि यो फिचर प्रयोग गरेकी थिएँ र उस्तै लाग्यो । मैले केही अवतारहरू बनाएँ, रमाइलो लाग्यो । त्यसैगरी फोनमा एआई लिंक बुस्ट नामक फिचर छ, जसले डेटा र वाईफाईबिच सजिलै स्विच गर्न मदत गर्छ ।

अब कुरा गरौँ फोनको अर्को प्रभावशाली पक्ष – ब्याट्री । यसको ब्याट्री क्षमता ५८०० एमएएच रहेको छ । चार्जिङका लागि ४५ वाटको सुपरभूक चार्जर उपलब्ध गराइएको छ । फोनको एक पटकको फुल चार्जबाट डेढ दिन मज्जाले टिक्छ ।

स्टोरेजतर्फ, ८ जीबी र्‍याम र २५६ जीबी इन्टरनल स्टोरेज दिइएको छ । कनेक्टिभिटीको लागि ब्लुटुथ ५.१, डुअल-ब्यान्ड वाईफाई, डुअल-सिम आदि पाइन्छ । सुरक्षाका लागि पिन, पासवर्ड, साइड-माउन्टेड फिङ्गरप्रिन्ट उपलब्ध छ ।

ओप्पो ए फाइभ प्रो ड्युराबिलिटी फिचरमा केन्द्रित छ, त्यसैले अन्य स्पेसिफिकेसनहरू उत्कृष्ट त छैनन्, तर स्वीकार्य छन् । यदि तपाईं अन्डरवाटर फोटोग्राफी, राम्रो ब्याट्री, ठिक्कको क्यामेरा र बलियो ड्युराबिलिटी चाहनुहुन्छ भने ओप्पो ए फाइभ प्रोलाई एउटा अवसर दिन सक्नुहुन्छ ।

पछिल्लो अध्यावधिक: चैत १८, २०८१ २३:३७

काठमाडौं – त्रिभुवन विश्वविद्यालय केन्द्रीय क्याम्पस कीर्तिपुरको स्ववियु सभापतिमा नेविसंघका दिपक राज जोशी विजयी बनेका छन्।

सोमबार भएको निर्वाचनमा उनी सभापतिमा निर्वाचित बनेका हुन्।

उनले ७८९ मत प्राप्त गरे ।

६ हजार १६४ मतदाता विद्यार्थी रहेकोमा तीन हजा ११८ विद्यार्थीले मतदान गरेका थिए।

यसअघि चैत ५ गतेका लागि तोकिएको निर्वाचन हुन सकेको थिएन। नेविसंघको आन्तरिक विवादका कारण असन्तुष्ट समूहले तालाबन्दी गरेको थियो। त्यसपछि नेविसंघबाट दीपकराज जोशीले स्ववियु अध्यक्षको आधिकारिक उम्मेदवार बनेका थिए भने अनोज कार्कीको उम्मेदवारी रद्द गरिएको थियो। 

चैत १६ गते अदालतले अल्पकालीन अन्तरिम आदेशलाई निरन्तरता दिनु नपर्ने आदेश जारी गरेपछि त्रिविले आजका लागि निर्वाचनको मिति तय गरेको थियो।  २०७९ सालमा भएको निर्वाचनमा नेविसंघका उम्मेदवार श्यामराज ओझा स्ववियु अध्यक्षमा निर्वाचित भएका थिए।

मतपरिणाम

ने. वि संघ (दिपक राज जोशी)-७४५+४४=७८९
अनेरास्ववियु (सिद्धान्त भट्ट )-७४१+ ४०=७८१
क्रान्तिकारी(प्रविन दाहल)-६९७+३०=७२७
स्वतन्त्र (पदमा भुषाल)-१५७+ ९=१६६
स्वतन्त्र (उज्ज्वल खड्का)-६८६+ ३१=७१७

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं। प्रधानमन्त्री केपी शर्मा ओली मित्र राष्ट्र थाइल्याण्डको औपचारिक भ्रमण र बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक) को छैटौँ शिखर सम्मेलनमा भाग लिन मंगलबार बैंककतर्फ प्रस्थान गर्दै छन्।

थाइल्याण्डका प्रधानमन्त्री फेथोङथान सिनावात (पैटोङ्टार्न शिनावात्रा) को मैत्रीपूर्ण निमन्त्रणामा नेपालका प्रधानमन्त्रीबाट इतिहासमै पहिलो पटक थाइल्याण्डको औपचारिक भ्रमण हुन लागेको हो। प्रधानमन्त्री ओली नेतृत्वको भ्रमण टोली यही चैत १९ गते दिउँसो १३ः३० बजे थाइ एयरलाइन्सबाट बैंककतर्फ प्रस्थान गर्नेछ। प्रधानमन्त्रीको सचिवालय र परराष्ट्र मन्त्रालयले भ्रमणको सबै आवश्यक तयारी पूरा गरिसकेको जनाइएको छ। प्रधानमन्त्री ओलीले भ्रमणका सम्बन्धमा आज संघीय संसद्का दुवै सदनलाई औपचारिक जानकारीसमेत गराइसकेका छन्।

यही चैत २० गते प्रधानमन्त्री ओलीबाट थाइल्याण्डको औपचारिक भ्रमण सुरु हुनेछ। भ्रमणका क्रममा प्रधानमन्त्रीस्तरमा द्विपक्षीय वार्ता भई पर्यटन र संस्कृतिका सन्दर्भमा दुई र गैरसरकारी क्षेत्रबीच छ वटा समझदारीपत्रमा हस्ताक्षर हुनेछ। द्विपक्षीय वार्तापछि थाइल्याण्डका प्रधानमन्त्री सिनावातसँगै प्रधानमन्त्री ओलीले संयुक्त प्रेस ब्रिफिङमा भाग लिनेछन्। थाइल्याण्डका नरेशसँगको भेटपछि एकदिने औपचारिक भ्रमण सकिनेछ।

‘दुई देशबीच ६५ वर्षको कूटनीतिक इतिहासमा यो एउटा औपचारिक भ्रमणको आदानप्रदानको नयाँ सुरुआत हो। हाम्रो तर्फबाट यो विल्कुलै नयाँ सुरुआत हो’, प्रधानमन्त्री ओलीले संसद्मा सम्बोधनका क्रममा भनेका थिए।

थाइल्याण्डमा रहँदा प्रधानमन्त्री ओलीले यही चैत २१ गते बिहान त्यहाका प्रतिष्ठित व्यवसायीहरूसँग भेटघाट र छलफल गर्नेछन् भने सोही दिन दिउँसो एसियन इन्स्टिच्युट अफ टेक्नोलोजीमा आयोजित कार्यक्रमलाई सम्बोधन गर्नेछन्। साँझ बिमस्टेक शिखर सम्मेलनका नेताहरूलाई दिइने औपचारिक रात्रिभोजमा प्रधानमन्त्री ओली सहभागी हुनेछन्।

चैत २२ गते बिमेस्टक शिखर सम्मेलनमा सहभागी तथा सम्बोधन हुने कार्यक्रम रहेको छ। शिखर सम्मेलन लगत्तै बाँकी मुलुकका नेताहरूसँग सम्भव भएसम्म ‘साइडलाइन’ वार्ता गर्ने प्रधानमन्त्री ओलीको योजना रहेको छ। सोही दिन मेरिटाइम ट्रान्स्पोर्ट कोअपरेशन अग्रिमेन्टमा हुने हस्ताक्षर समारोहमा प्रधानन्त्री ओली सहभागी हुनेछन्। सोही दिन साँझ बैंककस्थित नेपाली दूतावासमा हुने कार्यक्रममा उनी सहभागी हुनेछन्।

प्रधानमन्त्री ओलीको भ्रमण दलमा प्रथम महिला राधिका शाक्य, परराष्ट्रमन्त्री डा आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक–विकास सल्लाहकार डा युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राई, प्रधानमन्त्रीका निजी चिकित्सक डा दिव्यासिंह शाह, प्रधानमन्त्रीका प्रमुख स्वकीय सचिव राजेश बज्राचार्य, सुरक्षाकर्मी र सञ्चारकर्मीसहित २१ जना रहनेछन्।

भ्रमणको तयारीका क्रममा परराष्ट्र मन्त्रालयका दुई अधिकारी अग्रिम रूपमा बैंकक गएका छन् भने थाइल्याण्डका लागि नेपाली राजदूत धनबहादुर वलीसहित दूतावासका चार अधिकारी नेपाल सरकारलाई कुनै आर्थिक दायित्व नपर्ने गरी भ्रमण दलमा सामेल हुनेछन्। भ्रमणमा नेपालको निजी क्षेत्रका प्रतिनिधि पनि सामेल हुनेछन्।

प्रधानमन्त्री ओलीले भ्रमणको पूर्वतयारी र परामर्शका क्रममा आइतबार पूर्वप्रधानमन्त्री र पूर्वपरराष्ट्रमन्त्रीहरूसँग परामर्श छलफल गरेका थिए। छलफलमा नेपालको आर्थिक विकास, कनेक्टिभिटी, ऊर्जा, पर्यटन र सांस्कृतिक आदानप्रदानलगायत क्षेत्रमा भ्रमणलाई मुलुकको अधिकतम हितमा उपयोग गर्न सुझाव दिइएको थियो। प्रधानमन्त्री नेतृत्वको टोली यही चैत २३ गते स्वदेश फर्किनेछ।

काठमाडौं । भर्खरै माध्यमिक शिक्षा परिक्षा (एसईई)को परीक्षा सकिएको छ । एसईईको तयारीका लागि लामो समय अध्ययनमै बिताएकाले धेरै विद्यार्थी अहिलेको समय रमाइलोसँग बिताउने तयारीमा हुन्छन् ।

यस्तै, कक्षा १० सम्म निश्चित पाठ्यक्रम पढेका विद्यार्थीहरूलाई अब भने आफ्नो रुचिअनुसारको विषय छनोट गर्नुपर्ने जिम्मेवारी पनि थपिएको छ । अब के गर्ने भनेर लिने निर्णयले भविष्यमा ‘के बन्ने ?’ भन्ने विषयलाई समेत निर्धारण गर्न सक्ने भएकाले त्यसको पूर्वतयारी समेत थाल्नुपर्ने समय आएको छ ।

त्यसैले यो बिदाको समयमा परिवार र साथीभाइसँग रमाइलो गर्नुका साथै विभिन्न कोर्स गर्न सकिन्छ, जसले विद्यार्थीको सीप बढाउनुका साथै आगामी दिनमा अध्ययनमा पनि सहयोग पुर्‍याउन सक्छ ।

आईटी क्षेत्रमा रुचि भएका वा खाली समयमा नयाँ कुरा सिक्न चाहनेहरूका लागि यो लेख उपयुक्त हुन सक्छ ।

डिजिटल कन्टेन्ट क्रियसन सम्बन्धी सीप

पछिल्लो समयमा धेरैले रुचाउने क्षेत्र हो, कन्टेन्ट क्रियसन । होटल, पसल वा कुनै पनि संस्थाको विज्ञापन गर्न होस् वा युट्युब भिडिओमा स्टोरी टेलिङ, यसका लागि कन्टेन्ट क्रियसन एकदमै आवश्यक सीप हो ।

अहिलेको समयमा मानिसहरूलाई इङ्गेज गरिरहन सक्ने र सूचनामूलक कन्टेन्टलाई निकै रुचाइन्छ । त्यसैले आफूले चाहेको फर्म्याट वा लम्बाइमा कन्टेन्ट बनाउनका लागि आर्टिकल लेख्न वा भिडिओ कन्टेन्ट बनाउन यो फुर्सदको समयमा सिक्नु उपयुक्त हुन सक्छ ।

यस्ता कोर्सहरू विभिन्न ई-लर्निङ प्लेटफर्म र युट्युब भिडिओबाट लिन सकिन्छ । उदाहरणका लागि,  ई-लर्निङ प्लेटफर्म एड्ट्रामा डिजिटल गुरु अश्विन न्यौपानेको भिडिओ ‘रिल्स इडिटिङ विथ क्यापकट’ कोर्स नि:शुल्क उपलब्ध छ । यो वा यस्तै कोर्स खोजेर सीप सिक्नु तपाईँका लागि राम्रै हुन्छ ।

वेब डेभलपमेन्ट सम्बन्धी आधारभूत सीप लिन‍े

एचटीएमएल, सीएसएस, जाभास्क्रिप्ट जस्ता आधारभूत प्रोगामिङ ल्याङ्ग्वेज यो समयमा सिक्न सकिन्छ । यो सीप सिकेर आफ्नै पोर्टफोलियोको वेबसाइट समेत बनाउन सकिन्छ । यसले विद्यार्थीको आफ्नै किसिमको अनलाइन सहभागिता तयार हुनेछ । यस्तै कन्टेन्ट म्यानेजमेन्ट सिस्टम (सीएमएस) प्रयोग गरेर वर्डप्रेसमा आधारित वेबसाइट बनाउने सीप लिन सकिन्छ । 

यो सीप भविष्यमा विद्यार्थीले जुनसुकै विषयमा अध्ययन गरेपनि आफ्नो कामलाई अनलाइनमा प्रस्तुत गर्नका लागि सहायता प्रदान गर्नेछ । लिङ्क्डइन प्रोफाइल बनाउन सहयोग पुग्ने छ भने कम्प्युटर साइन्स पढ्न चाहने विद्यार्थीलाई थप फाइदा पुर्‍याउने छ । 

यी कोर्सहरू विभिन्न इन्स्टिच्युटले भौतिक वा अनलाइन माध्यमबाट सिकाउने गरेका छन् । तपाईँले आफूलाई पायक गर्ने ठाउँ तथा प्लेटफर्मबाट सहायता लिन सक्नुहुन्छ । 

मल्टिमिडिया

यो छोटो समयमा विद्यार्थीले मल्टिमिडियाका सीप सिक्न सक्छन् । यसमा ग्राफिक्स डिजाइनिङ, भिडिओ एडिटिङ, फोटोग्राफी, फोटो एडिटिङ, लोगो डिजाइनिङ, एनिमेसन आदि सीप पर्छन् ।

यी सीप कुनै पनि इन्स्टिच्युटमा गएर, अनलाइन कोर्स लिएर, युट्युबमा भिडिओ हेरेर सिक्न सक्छन् । कतिपय इन्स्टिच्युटले त्यस्ता प्रकारको सीप सिकाएर इन्टर्नको अवसर पनि दिने गर्छन् । त्यसैले विद्यार्थीले पढ्दै कमाउन पनि सक्छन् । 

आधारभूत डेटा एनालिसिस सीप 

डेटा साइन्स र एआईमा नै आधारभूत डेटा एनलासिस सीपको माग बढ्दो छ । यो सीप प्रविधिसँग जोडिएका जुनसुकै कामका लागि चाहिन्छ । 

डेटा बुझ्न र विश्लेषण गर्नसक्ने क्षमता कुनै रिसर्च गर्न, उद्योगधन्दामा, एनजीओ, आईएनजीओमा काम गर्नका लागि पनि आवश्यक पर्छ । पाइथन, डेटा एनालिसिस, भिजुअलाइजेसन जस्ता कोर्स लिएर यो सीप बढाउन सकिन्छ । 

यो सीप ‌+२ कम्प्युटरसँग सम्बन्धित विषय पढ्ने विद्यार्थीका साथै अन्य जुनसुकै विषयमा पढ्ने विद्यार्थीका लागि उपयुक्त हुन्छ । यस्ता कोर्सहरू नेपालका विभिन्न इन्स्टिच्युटहरूले उपलब्ध गराउँदै आएका छन् ।

एआई सम्बन्धी टुलहरू एक्स्प्लोर गर्ने

फुर्सदको समयमा एआईका विभिन्न टुलहरू एक्स्प्लोर गर्न सकिन्छ । रिसर्चका लागि च्याटजीपीटी, डिपसिक, जेमिनाई उपयुक्त हुनसक्छन् । इमेज जेनेरेट गर्न च्याटजीपीटी, मिडजर्नी, आइडियोग्राम, डिजाइनिङका लागि क्यान्भा, माइक्रोसफ्ट डिजाइनर लगायतका टुलहरूको बारेमा फुर्सदको समयमा सिक्न सकिन्छ । 

यी टुलहरूको सही सदुपयोग गर्ने तरिका सिकाउने कोर्सहरू युट्युबमा पनि उपलब्ध छन् । साथै एड्भान्स्ड जानकारी लिन विभिन्न ई-लर्निङ प्लेटफर्ममा कोर्सहरू पाउन सकिन्छ ।   

यी टुलहरूबारे जानकारी पाउँदा कन्टेन्ट क्रियसनका लागि पनि सहयोग पुग्छ । तर कन्टेन्ट बनाउने क्रममा एआईको प्रयोग कसरी गर्ने, उचित नतिजा पाउन कस्ता प्रम्प्ट प्रयोग गर्ने, एआईको सही सदुपयोग कसरी गर्ने र कसैको कन्टेन्ट चोरी गर्नबाट कसरी जोगिने भन्ने पनि जानकारी लिनुपर्छ । यस्ता जानकारीले भविष्यमा पर्नसक्ने कानुनी झमेलाबाट बचाउन मद्दत गर्छ । 

डिजिटल मार्केटिङ

अहिले कुनै पनि कम्पनी वा ब्रान्डका लागि डिजिटल मार्केटिङको भूमिका अनिवार्य जस्तै भइसकेको छ । सामाजिक सञ्जालका प्रयोगकर्ताको संख्या बढिरहँदा डिजिटल मार्केटिङको पनि आवश्यकता र महत्त्व बढ्दो छ । ​

एसईई सकेर बसेका विद्यार्थीले अनलाइन वा भौतिक रूपमा नै इन्स्टिच्युटमा गएर डिजिटल मार्केटिङ सिक्न सक्छन् । यसमा सर्च इन्जिन अप्टिमाइजेस (एसईओ), सर्च इन्जिन मार्केटिङ (एसईएम) आदि सीप सिक्न सकिन्छ । 

हार्डवेयर

सफ्टवेयर मात्र भएर कुनै काम सम्पन्न हुँदैन । त्यहाँ हार्डवेयरको भूमिका पनि उत्तिकै हुन्छ । विभिन्न ट्रेनिङ सेन्टरले कम्प्युटर रिपेयरिङको सीप सिकाइरहेका हुन्छन् । त्यहाँ गएर विद्यार्थीले विभिन्न प्रकारका हार्डवेयर मर्मतबारे तालिम लिन सक्छन् ।

माइक्रोसफ्ट फेस्टमा सहभागी हुनुहोस्

आगामी २६ चैत (८ अप्रिल) मा माइक्रोसफ्टले ‘माइक्रोसफ्ट एआई स्किल्स फेस्ट २०२५’ को आयोजना गर्दैछ । उक्त कार्यक्रम आयोजना गरेर माइक्रोसफ्टले २४ घण्टाभित्र सबैभन्दा धेरै प्रयोगकर्ताले बहुस्तरीय अनलाइन एआई सम्बन्धी पाठ लिने गिनिज वर्ल्ड रेकर्ड्स को उपाधि हासिल गर्ने लक्ष्य लिएको छ ।

त्यस कार्यक्रममा अनलाइन फारम भरेर सहभागी हुन सकिन्छ । ८ अप्रिलमा हुने कार्यक्रममा सहभागी हुनेले त्यसपछि ५० दिने निःशुल्क एआई तालिममा सहभागी हुने मौका पाउनेछन् । 

उक्त कार्यक्रमका लागि माइक्रोसफ्टले नेपालमा राष्ट्रिय आविष्कार केन्द्र (आईसीटी ल्याब पोखरा) सँग समेत सहकार्य गरेको छ । जसअन्तर्गत नेपालभरबाट अनलाइन माध्यम र कम्तीमा एक हजार जनाले पोखरा, काठमाडौं र दाङमा प्रत्यक्ष सहभागी भएर तालिम लिने अवसर पाउनेछन् । 

यो तालिम पनि फुर्सदको समयका लागि निकै उपयोगी हुन सक्छ । उक्त कार्यक्रममा सहभागी हुन चाहने इच्छुक व्यक्तिले यहाँ क्लिक गरेर पनि फाराम भर्नुपर्ने हुन्छ ।

एसईईपछि आईटी शिक्षा

एसईईपछि प्राविधिक शिक्षा तथा व्यावसायिक तालिम परिषद् (सीटीईभीटी) बाहेक अरूमा आईटीसम्बन्धी छुट्टै कोर्स छैन । आईटी कोर्स अध्ययन गर्न १२ कक्षा उत्तीर्ण गर्नुपर्ने हुन्छ । 

कक्षा ११/१२ वा ‘ए लेभल’ मा ऐच्छिक विषयमा कम्प्युटर रहेको छ । आईटीमा रुचि भएका विद्यार्थीले एसईईपछि यो विषय चयन गर्न सक्छन् । यदि आईटीको कोर्स नै पढ्ने हो भने सीटीईभीटीले सञ्चालन गर्ने प्रि-डिप्लाेमा (१८ महिने) र डिप्लोमा (३ वर्षे) तहमा भर्ना हुनुपर्ने हुन्छ । 

हाल प्रि-डिप्लोमामा कम्प्युटर इन्जिनियरिङ, कम्प्युटर एप्लिकेसन तथा सेक्रेटरियल म्यानेजमेन्टकाे कोर्स सञ्चालनमा छन् । यसैगरी डिप्लाेमा तहमा कम्प्युटर इन्जिनियरिङ र इन्फर्मेसन टेक्नाेलाेजी (आईटी)काे पढाइ हुन्छ ।

अहिलेको अवस्थामा सीटीईभीटीले यी कोर्स देशभरका विभिन्न १०६ शैक्षिक संस्थामा सञ्चालन गरिरहेकाे छ ।

पछिल्लो अध्यावधिक: चैत १८, २०८१ १६:५३

काठमाडौँ – नेपाल आयल निगमले हवाई इन्धनको मूल्य घटाएको छ। 

भारतबाट मूल्य घटेर आएसँगै निगमले मंगलबारदेखि लागू हुने गरी हवाई इन्धन आन्तरिकतर्फ प्रतिलिटर ७ रुपैयाँ र अन्तर्राष्ट्रियतर्फ प्रतिकिलोलिटर अमेरिकी डलर ५१ घटाएको हो। 

निगमले जारी गरेको विज्ञप्ति अनुसार हवाई इन्धन अन्तर्राष्ट्रियतर्फ पोखरा र भैरहवाका लागि ब्रेक इभन प्वाइन्टमा बिक्री मूल्य कायम गरिएको  छ। 

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले पार्टीको पहिलो महाधिवेशन आगामी वैशाखमा हुने बताएका छन्।

सभापति रवि लामिछानेको अध्यक्षतामा आज बसेको केन्द्रीय समितिको बैठकले पार्टीको राष्ट्रिय भेलाबाट घोषणा गरेकै समय अर्थात वैशाखमा पहिलो महाधिवेशन आयोजना गर्ने निर्णय गरेको हो।

महाधिवेशन आयोजना गर्ने सन्दर्भमा केन्द्रीय समितिका सदस्य र प्रदेश समितिबाट आगामी तीन दिनभित्र लिखित राय र कार्यविवरण पार्टीमा पेश गर्न उनले निर्देशन दिनुभएको कार्यवाहक प्रवक्ता मनिष झाले जानकारी दिए।

त्यसैगरी बैठकले ‘जनताको कुरा सुन्ने यात्रा, जनयात्रा’ यही चैत २३ गते चितवनबाट सुरु गर्ने निर्णय गरेको छ। पार्टीकातर्फबाट राष्ट्र निर्माणसम्बन्धी खाका तयार गर्न उपसभापति डोलप्रसाद अर्याल र डा स्वर्णिम वाग्लेको संयोजकत्वमा पूर्वमन्त्री सुमना श्रेष्ठ, शिशिर खनाल, विराजभक्त श्रेष्ठ र डा तोसिमा कार्कीसहितको ‘मिसन ब्लुप्रिन्ट’ कार्यदल गठन गरिएको छ।

लिडरसिप एकेडेमी र उम्मेद्वार क्लबको कार्यान्वयनका लागि सहमहामन्त्री सुमना श्रेष्ठ र विपिनकुमार आचार्यलाई जिम्मेवारी तोकिएको छ। पार्टीको जनयात्रा कार्यक्रमको कार्यविधिलगायतको संयोजन जिम्मेवारी संसदीय दलका उपनेता विराजभक्त श्रेष्ठलाई तोकिएको छ।

आजको बैठकले गण्डकी प्रदेश समितिको सिफारिसमा गण्डकी प्रदेश सहमहामन्त्रीमा कृष्णप्रसाद लम्साल र कृष्णकुमारी अधिकारीलाई मनोनयनसमेत गरेको छ। करिब साढे पाँच महिनापछि सभापतिको जिम्मेवारीमा फर्किएका लामिछानेले वर्तमान राजनीतिक परिस्थितिमा अहिलेको पार्टी संरचना अझै सबल र सशक्त हुन आवश्यक रहेको बताए।

संगठनमा फेरबदल र पुनःसंरचनाका लागि तयार रहन सभापति लामिछानेले पार्टी सदस्यलाई आह्वान गरे।

काठमाडौं । पछिल्ला केही दिनदेखि पूर्वयुवराज्ञी हिमानी शाहको नाम लिँदै एउटा भनाइ सामाजिक सञ्जाल फेसबुकमा भाइरल भइरहेको छ । विभिन्न फेसबुक पेजहरूमा हिमानीले सहयोग मागेको दाबीसहितका पोस्टहरू राखिएका छन् । तर, टेकपाना फ्याक्टचेकले सो दाबी भ्रामक भएको निष्कर्ष निकालेको छ । हिमानी शाहको कुनै सार्वजनिक रूपमा देखिने आधिकारिक सामाजिक सञ्जाल अकाउन्ट नभएको र उनले सर्वसाधारणलाई सहयोगका लागि आह्वान गरेको दाबी मिथ्या भएको फ्याक्टचेकबाट पुष्टि भएको छ ।

दाबी

२३ मार्च २०२५ बिहान ७ः१४ बजे ‘Himani Shah हिमानी शाह’ नामको फेसबुक पेजबाट एउटा पोस्ट अपलोड भयो । पोस्टमा पूर्वयुवराज्ञी हिमानी शाहको फोटो राख्दै लेखिएको थियो, “हामीले आह्वान गरिसकेका छौं हामीलाई हजुरहरूको आवश्यकता छ यदि परिवर्तन चाहनुहुन्छ यदि राष्ट्र निर्माण गर्न चाहनुहुन्छ एकपटक बिना स्वार्थका साथ राष्ट्र निर्माणमा लागौं हामीले नगरे कसले गर्छ अहिले नगरे कहिले गर्ने बस्ती बस्तीबाट जागौं सहर सहरबाट जागौ। जय पशुपतिनाथ सबैको कल्याण होस् ।”

१५ हजार बढी फलोअर भएको यो पेजले राखेको सो पोस्टमा यो सामग्री तयार पार्दासम्म २१ हजार बढी रियाक्सन, १४०० बढी कमेन्ट र ४१७ बढी शेयर आइसकेका छन् । हेर्नुहोस् ओरिजिनल लिङ्क र आर्काइभ लिङ्क । 

यही पोस्टलाई लिएर आफूलाई सामाजिक अभियन्ता बताउने गर्ने ईशामाया गुरुङले २४ मार्च २०२५ बेलुका ५ः३९ बजे राखिन् । उनले लेखेकी छिन्, “हिमानि शाह लेख्छिन”हामीले आह्वान गरिसकेका छौं हामीलाई हजुरहरूको आवश्यकता छ यदि परिवर्तन चाहनुहुन्छ यदि राष्ट्र निर्माण गर्न चाहनुहुन्छ एकपटक बिना स्वार्थका साथ राष्ट्र निर्माणमा लागौं हामीले नगरे कसले गर्छ अहिले नगरे कहिले गर्ने बस्ती बस्तीबाट जागौं सहर सहरबाट जागौ । जय पशुपतिनाथ सबैको कल्याण होस् ” ।

यो सामग्री तयार पार्दासम्म सो पोस्टमा १५ हजार बढी रियाक्सन, १५०० बढी कमेन्ट र १९६ शेयर आएका छन् । हेर्नुहोस् ओरिजिनल लिङ्क र आर्काइभ लिङ्क । 

हिमानी शाह नामको फेसबुक पेजमा पोस्ट आएपछि उक्त पोस्ट राख्ने गुरुङ पहिलो प्रयोगकर्ता भने होइनन् । त्यसअघि २३ मार्च २०२५ बेलुका ६ः२५ बजे ‘मेरो दाङ एचडी’ नामको फेसबुक पेजले सोही पोस्ट राखेको थियो । यो सामग्री तयार पार्दासम्म हिमानी शाहको भनाइ भन्दै राखिएको पोस्टमा २० हजार बढी रियाक्सन, १४०० बढी कमेन्ट र ४०० बढी शेयर आएको देखिन्छ । हेर्नुहोस् ओरिजिनल लिङ्क र आर्काइभ लिङ्क ।  

१५ चैत २०८१ (२९ मार्च २०२५) मा राजावादी समर्थकले प्रदर्शन गर्ने तयारी गरेका थिए । त्यसभन्दा अगाडि सर्वसाधारणलाई भ्रममा पार्न यी पेजहरूले उक्त पोस्ट शेयर गरेको देखिन्छ । २९ मार्चपछि भने हरिराम मगर (हेर्नुहोस् ओरिजिनल लिङ्क र आर्काइभ लिङ्क), आचार्य मनपति (हेर्नुहोस् ओरिजिनल लिङ्क र आर्काइभ लिङ्क), खबर नेपाल (हेर्नुहोस् ओरिजिनल लिङ्क र आर्काइभ लिङ्क), हाम्रो अनलाइन टिभी (हेर्नुहोस् ओरिजिनल लिङ्क र आर्काइभ लिङ्क), रुटिन अफ नेपाल बन्द (हेर्नुहोस् ओरिजिनल लिङ्क र आर्काइभ लिङ्क) ले उक्त पोस्ट राखेको देखिन्छ । 

रुटिन अफ नेपाल बन्दको नामबाट खोलिएको नक्कली पेजमा झन्डै ४१ हजार बढी लाइक छ । हिमानी शाहको नाम उल्लेख गर्दै राखिएको पोस्टमा २१ हजार बढी रियाक्सन, १२०० बढी कमेन्ट र १२५ शेयर आएको देखिन्छ । 

तथ्यजाँच

हामीले सबैभन्दा पहिले ‘मेरो दाङ एचडी’ र ‘रुटिन अफ नेपाल बन्द’को नामबाट खोलेको पेजबाट आएको पोस्ट फेला पार्‍यौं । रुटिन अफ नेपाल बन्द नाम राखेर खोलेको पेजमा ३० मार्चमा उक्त पोस्ट राखिएको थियो । त्यस्तै ‘मेरो दाङ एचडी’ नामको पेजमा २३ मार्चमा उक्त पोस्ट राखिएको थियो । यी दुवै पोस्टमा २० हजार बढी रियाक्सन आएका छन् । त्यसमध्ये एउटा पोस्ट १५ चैतमा भएको राजावादी समर्थकको प्रदर्शनअघि आएको थियो भने अर्को पोस्ट प्रदर्शनपछि आएको देखिन्छ । 

यी दुई ओटा पोस्ट फेला पारेपछि हामीले ‘हिमानि शाह’ (हिज्जे नमिलेकाले हामीले त्यही कीवर्ड सर्च गर्‍यौं) सर्च गर्‍यौं । त्यस क्रममा ‘Himani Shah हिमानी शाह’ नामको फेसबुक पेजबाट पोस्ट राखिएको फेला पर्‍यो । त्यसपछि मेरो दाङ एचडी, ईशा गुरुङ लगायतका पेजले उक्त पोस्ट राखेको फेला पर्‍यो ।

हिमानी शाहको नामको फेसबुक पेज र एक्स ह्यान्डल तथा पूर्वराजा ज्ञानेन्द्र शाहको नामको एक्स ह्यान्डल यसअघि पनि चर्चामा आएका थिए । हामीले त्यससँग सम्बन्धित समाचार खोज्यौं । त्यसका लागि ‘पूर्वराजा सामाजिक सञ्जाल’ कीवर्ड गुगलमा खोज्दा सेतोपाटीले १५ वैशाख २०८० मा ‘ओलीको अभिव्यक्तिबारे पूर्वराजाको सचिवालयले भन्यो- हिमानीले सामाजिक सञ्जाल चलाउँदिनन्’ शीर्षकको समाचार राखेको देखियो । त्यतिबेला ओली प्रधानमन्त्री पदमा थिएनन् । ओलीले हिमानी शाह नामको फेसबुक पेजबाट आएको भनाइलाई लिएर ‘पूर्वराजाले निहुँ खोजेको’ अभिव्यक्ति दिएका थिए । नक्कली फेसबुक पेजबाट आएको भनाइलाई लिएर ओली नै भ्रममा परेपछि पूर्वराजा ज्ञानेन्द्र शाहको सचिवालयले विज्ञप्ति निकालेर पूर्वयुवराज्ञी हिमानी शाहले सामाजिक सञ्जाल नचलाउने बताएको थियो ।

हामीले यो भनाई पुष्टि गर्न पूर्वराजा ज्ञानेन्द्रका निजी सचिव फडिराज पाठकलाई सम्पर्क गर्‍यौं । “हाम्रो यहाँ श्री ५ महाराजाधिराज सरकार, श्री ५ बडामहारानी सरकार तथा श्री ५ युवराज्ञी सरकारबाट कुनै पनि प्रकारका सामाजिक सञ्जाल सञ्चालन प्रयोग गर्नुहुन्न,” पाठकले भने, “उहाँहरूको नामबाट सञ्चालन भएका अकाउन्टहरू सबै नक्कली हुन् । पछिल्लो समय आधिकारिक रूपमा उहाँहरूबाट कुनै धारणा बाहिर आएको छैन ।”

सन् २०२२ तिर पूर्वराजा ज्ञानेन्द्रको नामबाट खोलिएको @GBBShah नामको एक्स ह्यान्डलले तहल्का मच्चाएको थियो । सचिवालयबाट पूर्वराजाको कुनै आधिकारिक सामाजिक सञ्जाल ह्यान्डल छैन भनेपछि उक्त ह्यान्डलबाट पोस्ट आउन छोडेका छन् । तर, पूर्वयुवराज्ञी शाहको नामबाट सञ्चालन भएका फेसबुक पेज भने निर्वाध रूपमा सञ्चालन भइरहेका छन् । 

पाठकका अनुसार दुई लाख ८८ हजार बढी फलोअर भएको Himani Shah, दुई लाख ४७ हजार बढी फलोअर भएको ‘Himani Shah हीमानी शाह’ र १६ हजार बढी फलोअर भएको ‘Himani Shah हिमानी शाह’ नामका फेसबुक पेज पनि नक्कली हुन् । समग्रमा हिमानी शाहको नाम राखेर खोजेका जतिपनि फेसबुक पेज वा एक्स ह्यान्डल छन् ती आधिकारिक होइनन् । 

दाबी

पूर्वयुवराज्ञी हिमानी शाहले फेसबुकमा पोस्ट राख्दै सहयोगका लागि सर्वसाधारणलाई आह्वान गरिन् । 

दाबीकर्ता

हिमानी शाह, ईशामाया गुरुङ, मेरो दाङ एचडी, रुटिन अफ नेपाल बन्द नामबाट खोलिएको फेसबुक पेज, हरिराम मगर, खबर नेपाल लगायतका फेसबुक पेज तथा अकाउन्ट । 

तथ्य

पूर्वयुवराज्ञी हिमानी शाहले हालसम्म कुनै पनि माध्यमबाट सर्वसाधारणलाई सहयोगको लागि आह्वान गरेकी छैनन् । उनको नाममा खोलिएको नक्कली फेसबुक पेजले हुँदै नभएको विषयलाई शाहको भनाइको रूपमा प्रस्तुत गर्दै मिथ्या सूचना फैलाएको हो ।

निष्कर्ष

‘हिमानी शाह’, ‘ईशामाया गुरुङ’, ‘मेरो दाङ एचडी’, ‘रुटिन अफ नेपाल बन्द’ जस्ता नामका फेसबुक पेजहरू, साथै ‘हरिराम मगर’ र ‘खबर नेपाल’ जस्ता अकाउन्टहरूले पूर्वयुवराज्ञी हिमानी शाहको नाममा एउटा भनाइ पोस्ट गरेका थिए । ती पोस्टहरूमा शाहले सर्वसाधारणलाई सम्बोधन गर्दै सहयोगका लागि आह्वान गरेको दाबी गरिएको थियो । यद्यपि, टेकपाना फ्याक्टचेकले गरेको अनुसन्धानले शाहको कुनै पनि आधिकारिक फेसबुक पेज वा अकाउन्ट नभएको र ती नक्कली अकाउन्टहरूबाट फैलाइएका जानकारीहरू भ्रामक हुने गरेको पत्ता लगाएको छ।

प्रतिक्रिया

तपाईंले हाम्रो वेबसाइट, सामाजिक सञ्जालका ह्यान्डल (फेसबुक, इन्स्टाग्राम, टिकटक, एक्स, युट्युब, लिङ्क्डइन) वा [email protected] मा तथ्य जाँच गर्नुपर्ने सामाजिक सञ्जालका पोस्ट पठाउन सक्नु हुनेछ । तथ्य जाँचलाई लिएर कुनै प्रतिक्रिया वा सुझाव भए हामीलाई ईमेल पठाउनु होला ।

पछिल्लो अध्यावधिक: चैत १८, २०८१ २१:११