काठमाडौँ । सामाजिक सञ्जालमा भाइरल भएका भिडिओ तथा फोटोको आधारमा तोडफोड, लुटपाट र आगजनी जस्ता आपराधिक क्रियाकलापमा संलग्नलाई प्रहरीले धमाधम पक्राउ गर्न थालेको छ । गत शुक्रबार काठमाडौँको तीनकुनेमा आयोजित राजावादी आन्दोलनका क्रममा भएका घटनामा संलग्न व्यक्तिलाई पक्राउ गर्न सामाजिक सञ्जाल तथा स्मार्टफोन सहयोगी बनेका हुन् ।
प्रहरीले आइतबार कोटेश्वरस्थित भाटभटेनी सुपरमार्केटमा लुटपाटमा संलग्न नौ जनालाई पक्राउ गरेका छ । पक्राउ पर्नेहरू सबैजना हाल कोटेश्वर आसपास बस्दै आएको बताइएको छ ।
पक्राउ पर्नेमा धनुषा घर भई कोटेश्वर बस्दै आएका आशिष् सिंह रहेका छन् । एक लिटर ब्ल्याक लेबल मदिरा र दुई लिटर ज्याक डेनिअल्ससहित उनलाई पक्राउ गरिएको हो । 
यस्तै सर्लाहीको बरथहवा घर भई कोटेश्वर नरेफाँट बस्ने प्रेमकुमार महतो ४ थान खाली बोतलसहित पक्राउ परेका छन् । यार्सागुम्बा ब्रान्डको ७५० एमएलको मदिरासहित भारतको बिहार घर भएका रवि रञ्जन कुमार कोटेश्वर नरेफाँटबाट पक्राउ परेका छन् । 
यस्तै, नुवाकोटको विदुर नगरपालिका घर भएकी सुशीला कुमाल ११ थान हाफ् पाइन्ट र १ थान ट्राउजरसहित कोटेश्वरबाट पक्राउ परेकी छिन् । एक थान ट्रे र एक थान क्यारेटसहित सुनसरी धरानकी एलिसा राई तथा कोटेश्वरकै बालकुमारी कार्की १ थान क्यारेटसहित पक्राउ परेकी छिन् ।
फलफूलसहित सिन्धुपाल्चोक चौतारा साँगाचोकगढी नगरपालिकाकी निर्मला कार्की पक्राउ परेकी छिन् । यस्तै भाटभटेनीबाट एक क्यारेट कस्मेटिक सामग्री लैजाने सिन्धुलीको तीनपाटन गाउँपालिकाका चित्र माया बस्नेत र सुस्मिता बराल ६९ थान लिपिस्टिक, एक थान ऐना, २१ थान गाजल र अन्य सामान १२ थान सहित पक्राउ परेका छन् ।
पक्राउ पर्नेहरूलाई सीसीटीभी भिडिओ, सामाजिक सञ्जालमा सार्वजनिक तस्बिर तथा भिडिओको आधारमा पक्राउ गरिएको काठमाडौँ उपत्यका अपराध अनुसन्धान कार्यालयका प्रहरी उपरीक्षक अङ्गुर जीसीले जानकारी दिए ।
१५ चैतमा काठमाडौँको तीनकुनेमा आन्दोलन अनियन्त्रित बन्दा दुई जनाको मृत्यु समेत भएको थियो । भीडले तीनकुने हुँदै कोटेश्वर, सिनामङ्गल, जडीबुटी लगायतका विभिन्न क्षेत्रमा पुगेर सरकारी र निजी सम्पत्तिमाथि तोडफोड र आगजनी समेत गरेका थिए ।
घटनाका क्रममा नेपाल प्रहरीका ५३ जना, सशस्त्र प्रहरी बलका २२ र प्रदर्शनकारीतर्फ ३५ जना घाइते भएका थिए । १५ वटा सवारीसाधनमा आगजनीका साथै विभिन्न १४ स्थानमा आगजनी भएको, नौ वटा संस्थामा तोडफोड र एक स्थानमा लुटपाट भएको थियो ।
घटना लगत्तै तोडफोड र लुटपाटका तस्बिरहरू सामाजिक सञ्जालमा भाइरल बनेका थिए । विशेषगरी कोटेश्वरको भाटभटेनी सुपरस्टोरमा भएको लुटपाट, सडक बत्ती तोडफोड, तीनकुनेमा प्रदर्शनकारीले खोसेको प्रहरीको बन्दुक लगायतका तस्बिरहरू सामाजिक सञ्जालमा भाइरल भएका थिए ।
तिनै भाइरल तस्बिरहरूलाई लिएर सामाजिक सञ्जालमा विभिन्न मिमसमेत बनाइएका छन् । राजतन्त्र ल्याउने नाममा लुटपाट गरिएको भन्दै आन्दोलनमा गरिएका क्रियाकलाप गलत भएको प्रतिक्रिया आइरहेका छन् । त्यस्तै, यसरी लुटपाट गरेर समाजमा कसरी अनुहार देखाउन सक्लान् भन्दै आलोचना समेत भइरहेको छ ।
यता विभिन्न तोडफोड र लुटपाट लगायतका आपराधिक गतिविधिको अनुसन्धान गर्न फोटो-भिडिओ लगायतका विवरण उपलब्ध गराउन आग्रह गर्दै आइतबार प्रहरी प्रधान कार्यालयले सूचना समेत प्रकाशन गरेको छ ।
“गैरकानुनी आपराधिक गतिविधिमा संलग्न व्यक्तिहरूका सम्बन्धमा अनुसन्धानको प्रमाण सङ्कलनका लागि यहाँहरूसँग भएका तथ्यपरक सूचना (फोटो, भिडिओ, संलग्न व्यक्तिको विवरण) उपलब्ध गराई अनुसन्धानमा सहयोग गरिदिनु हुन अनुरोध छ,” प्रहरीले भनेको छ, “सूचना र सूचनाकर्ताको गोपनीयता कायम रहने ब्यहोरा जानकारी गराउन चाहन्छौँ ।”
यसका लागि नेपाल प्रहरीलाई [email protected] मा ईमेल गर्न वा तलको क्यूआर कोड स्क्यान गर्न सकिनेछ । अथवा यहाँ क्लिक गरेर पनि आफूसँग भएका जानकारी पठाउन सकिनेछ ।
पछिल्लो अध्यावधिक: चैत १७, २०८१ २०:१३
सामाग्री श्रोत :
टेक पाना
