काठमाडौँ । शुक्रबार राजधानीको तीनकुने क्षेत्रमा राजावादीले गरेको प्रदर्शन उग्र बनेपछि थुप्रै फोटो/भिडिओ भाइरल बने । खासगरी तीनकुनेमा आगो लागेको भवनभित्रबाट ल्यापटप चोर्दै गरेका व्यक्ति, आलोकनगरस्थित एकीकृत समाजवादी पार्टी कार्यालयबाट पङ्खा चोरी र कोटेश्वरस्थित भाटभटेनीबाट विभिन्न खाद्यान्न तथा मदिरा लुट्ने व्यक्तिको फोटोले सामाजिक सञ्जाल ततायो । ती फोटोलाई लिएर विभिन्न मिम पनि बनेका छन् । केहीले टिकटकमा त्यसैको नक्कल गर्दै समाजमा कसरी अनुहार देखाउने होला भन्दै चोरी गर्ने व्यक्तिहरूको खिसीट्युरी गरिरहेका छन् ।
त्यसमध्ये चर्चित एकीकृत समाजवादी पार्टीको कार्यालयबाट पङ्खा चोर्ने/लुटपाट गर्ने युवक देखिएको फोटो/भिडिओ पनि एक हो । भारत बैङ्गलोर बस्दै आएकी राधा थापा नामकी युवतीले त्यही फोटोले आफूलाई तनाव दिएको भन्दै सामाजिक सञ्जालबाट गुनासो पोखेकी छिन् ।
“हिजोको पङ्खा चोरको फोटोले मलाई डिप्रेसनमै पुर्याउन लाग्यो,” शनिबार फेसबुक लाइभमा आएर थापाले भनिन्, “मेरो कमेन्टमा, मेसेन्जरमा गाली आइरहेका छन् । मलाई कल गरेर पनि गाली गरेका छन् । पङ्खा चोर्ने मान्छेले मलाई अत्ति नै गर्यो । पङ्खा चोर्ने को हो को हो गाली मलाई आइरहेको छ ।”
उनले लाइभ भिडिओमा आफ्ना श्रीमानलाई देखाउँदै भनेकी छिन्, “यता हेर्नुहोस् त्यो पङ्खा चोर र मेरो श्रीमानको फेस कसरी मिल्छ ? यत्ति पनि मिल्दैन । ‘तेरै बुढा हो पङ्खा चोर’ भन्दै मलाई कत्तिले गाली गरेका छन् । तेरो घरमा पङ्खा छैन भन्दै गाली गरेका छन् ।”
भिडिओमा देखिने थापाका श्रीमानले पनि आफू पङ्खा चोर नभएको बताएका छन् । “पङ्खा चोर्ने मान्छेको फेस ब्लर आएको छ । त्यही ब्लर भएको फोटोलाई क्लियर बनाएर त्यहाँ राखिएको हो । ‘धेरैले यो फोटो तेरो होकि, तँ काठमाडौँ हो कि कता हो ?’ भनेर सोधिरहेका छन् ।”
उनले आफूहरू बैङ्गलोरमा रहेको बताएकी छिन् । केही व्यक्तिहरूले उनीहरू रातारात बैङ्गलोर पुगेको भन्दै गालीको वर्षात गरेको युवतीको दाबी छ । केहीले मजाक गरेका छन् भने अधिकांशले वास्तविक ठानेर गाली गरेको उनीहरूको आरोप छ ।
थापाले शनिबार आफ्नो श्रीमानको फोटो र पङ्खा उठाउँदै गरेका युवकको फोटो राख्दै, यी दुई व्यक्ति अलग अलग मान्छे भएको उल्लेख गरेकी थिइन् । उनले लेखेकी छिन्, “यस्ता धेरै कमेन्ट आएका रैछन् । हेर्नुस् राम्रोसँग मेरो बुढा र पङ्खा चोर अलग अलग मान्छे हुन् ।”
पछिल्लो अध्यावधिक: चैत १७, २०८१ १५:२०
सामाग्री श्रोत :
टेक पाना
