नेपाली बजारमा सामसङ ए५६, ए३६ र ए२६ फाइभजी स्मार्टफोन सार्वजनिक, यस्तो छ मूल्य र फिचर

काठमाडौं । सामसङले नेपाली बजारमा ग्यालेक्सी ए सिरिजका तीन नयाँ फाइभजी स्मार्टफोन भित्र्याएको  छ । कम्पनीले शुक्रबार ग्यालेक्सी ए५६ फाइभजी, ग्यालेक्सी ए३६ फाइभजी र ग्यालेक्सी ए२६ फाइभजी सार्वजनिक गरेको हो ।

सामसङले पहिलो पटक ग्यालेक्सी ए सिरिजमा ‘असम इन्टेलिजेन्स’ प्रविधि समावेश गरेको छ । आर्टिफिसियल इन्टेलिजेन्स (एआई) मार्फत क्रियटिभिटी (सिर्जनात्मकता)लाई नयाँ परिभाषा दिन यो प्रविधि राखिएको कम्पनीको भनाइ छ ।

यी स्मार्टफोनमा एडभान्स्ड क्यामेरा सिस्टम, धुलो र पानी प्रतिरोधात्मक क्षमताका लागि आईपी ६७ रेटिङ, गोरिल्ला ग्लास भिक्टस प्लस सुरक्षा र ६ वर्षसम्मको ओएस र सेक्युरिटी अपडेट उपलब्ध हुनेछ ।

सामसङ नेपालका निर्देशक प्रणयरत्न स्थापितले यी स्मार्टफोनले एआई प्रविधिको अनुभवलाई धेरै प्रयोगकर्तामाझ ल्याएर ‘सबैका लागि एआई’ भन्ने कम्पनीको सोचलाई साकार पार्ने दाबी गरे । यी नयाँ विशेषता र क्षमताले सृजनशीलता बढाउनुका साथै सुरक्षित, विश्वसनीय र रमाइलो मोबाइल अनुभव प्रदान गर्ने उनको भनाइ छ ।

असम इन्टेलिजेन्स र एडभान्स्ड क्यामेरा

यी स्मार्टफोनमा ‘असम इन्टेलिजेन्स’ नामक मोबाइल एआई समावेश गरिएको छ । यसले प्रयोगकर्तालाई शक्तिशाली, रमाइलो र सजिलो एआई टुलहरू प्रदान गर्ने बताइएको छ । यसले गुगलको ‘सर्कल टु सर्च’ फिचरलाई थप उन्नत बनाएको उल्लेख गर्दै कम्पनीले स्क्रिनमा देखिएको नम्बर, ईमेल एड्रेस वा यूआरएल सजिलै पहिचान गर्नसक्ने तथा बजिरहेको गीत पनि पहिचान गर्ने जनाएको छ ।

यी स्मार्टफोनमा ५० मेगापिक्सेल मुख्य क्यामेरा दिइएको छ भने ग्यालेक्सी ए५६ र ए३६ मा १०-बिट एचडीआर फ्रन्ट क्यामेरा छ । ग्यालेक्सी ए५६ मा १२ मेगापिक्सेल अल्ट्रा-वाइड लेन्स र ‘बेस्ट फेस’ फिचर पनि छ । ‘नाइटोग्राफी’ प्रविधिले न्यून प्रकाशमा पनि राम्रो फोटो खिच्ने कम्पनीको दाबी छ । त्यस्तै ‘अब्जेक्ट इरेजर’ सुविधाले फोटोबाट अनावश्यक वस्तु सजिलै हटाउन सकिनेछ ।

टिकाउ डिजाइन र सफ्टवेयर अपडेट

यी स्मार्टफोनमा ६ जेनेरेसनसम्मको एन्ड्रोइड ओएस र वन यूआई अपडेट उपलब्ध गराइएको छ । साथै ६ वर्षसम्मकै सुरक्षा अपडेट पाइनेछ । ग्यालेक्सी ए५६ र ए३६ मा ६.७ इन्च एफएचडी प्लस सुपर एमोलेड डिस्प्ले छ । जसको पिक ब्राइटनेस १२०० निट्ससम्म पुग्न सक्छ । यी फोनमा ५००० एमएएच ब्याट्री छ । दुवै फोनले ४५ वाट चार्जिङ पावर सपोर्ट गर्छन् । ग्यालेक्सी ए५६ मा फाइभजी एक्सिनोस १५८० चिपसेट र ग्यालेक्सी ए३६ मा स्न्यापड्रागन सिक्स जेन थ्री प्रोसेसर प्रयोग भएको छ ।

उपलब्धता र मूल्य

ग्यालेक्सी ए५६ र ए३६ अहिले नै बजारमा उपलब्ध छन् भने ग्यालेक्सी ए२६ आउँदो अप्रिलको पहिलो साताबाट बजारमा आउने कम्पनीले जानकारी दिएको छ ।​ ग्राहकले सामसङ इन्स्टा फाइनान्स सेवामार्फत ईएमआई विकल्पमा पनि फोन खरिद गर्न सक्नेछन् । कम्पनीका अनुसार ईएमआई मासिक २३०० रुपैयाँबाट सुरु हुनेछ, जसमा शून्य प्रतिशत ब्याजदर लाग्नेछ ।

पुरानो फोनसँग नयाँ फोन साट्न चाहने ग्राहकले सबकोफोन वा अर्कोस्टोरमार्फत एक्सचेन्ज सुविधासमेत पाउने भएका छन् ।

पछिल्लो अध्यावधिक: चैत १६, २०८१ १७:४७