काठमाडौं । भारतको मध्यप्रदेशस्थित राजगढ जिल्लामा मोबाइल विष्फोट हुँदा एक युवक घाइते भएको खबर बाहिरिएको छ । खल्तीमा रहेको मोबाइल अचानक पड्किँदा सारंगपुरका १९ वर्षीय अरविन्द कुमार घाइते भएको भारतीय सञ्चारमाध्यहरूले उल्लेख गरेका छन् ।
घटनामा युवकको गुप्तांगमा गम्भीर चोट लागेको छ भने बाइकबाट लड्दा टाउकोमा पनि असर पुगेको समाचारमा उल्लेख छ । घाइते युवकलाई तत्काल अस्पताल लगिएको र अहिले उनको अवस्था स्थिर रहेको बताइएको छ ।
यसबारे आजतक, न्युज १८, फ्री प्रेस जर्नल, हिन्दुस्तान गजेट लगायतका मिडियाले एकैखाले समाचार प्रकाशित गरेको देखिन्छ ।
घटना अनुसार गएको मंगलबार अरविन्द तरकारी बजारबाट किनमेल गरेर गाउँ नैनवाडा फर्किंदै थिए । उदनखेड़ी नजिकैको टोल ट्याक्स क्षेत्रमा पुग्दा उनको पेन्टको खल्तीमा रहेको मोबाइल अचानक विष्फोट भयो ।
विष्फोटको झड्काले अरविन्दको सन्तुलन बिग्रियो र बाइकबाट लड्न पुगे । घटनामा उनको अण्डकोष च्यातिएको र टाउकोमा गम्भीर चोट लागेको आजतकले लेखेको छ । समाचार अनुसार स्थानीयले उनलाई उद्धार गरी एम्बुलेन्समार्फत सारंगपुर सिभिल अस्पताल पुर्याएका थिए । त्यहाँ प्राथमिक उपचारपछि शाजापुर रेफर गरिएको थियो ।
आजतकका अनुसार घटनापछि अरविन्दका भाइले हालै उनले एक पुरानो मोबाइल खरिद गरेको सुनाएका छन् । घटना हुनुअघि उनले रातभर चार्जमा राखेका थिए । बिहान तरकारी बजार गएका उनी फर्किने क्रममा खल्तीमा रहेको मोबाइल विष्फोट हुँदा घाइते भएको समाचारमा उल्लेख छ ।
साथै अस्पतालका डाक्टर नयन नागरको भनाइ उद्धृत गर्दै आजतकले अरविन्दको अण्डकोषमा गम्भीर चोट लागेपनि ज्यानलाई तत्काल कुनै खतरा नरहेको उल्लेख गरेको छ । यता, सारंगपुर थानाकी प्रहरी निरीक्षक शकुन्तला बामनियाले घटनाबारे कुनै लिखित उजुरी नआएको बताएकी छन् । उजुरी प्राप्त भए कानुनी प्रक्रिया अघि बढाइने उनले उल्लेख गरेकी छन् ।
पछिल्लो अध्यावधिक: चैत ८, २०८१ १०:४४
सामाग्री श्रोत :
टेक पाना
