काठमाडौं- प्रधानमन्त्री केपी शर्मा ओलीले नेपालमा नै तीन हजार वर्ष पहिले ऋषि सुश्रुतले सर्जरीको सफल अभ्यास गरेको बताएका छन्।
त्रिवि शिक्षण अस्पतालको वार्षिकोत्सव तथा नयाँ भवन हस्तान्तरण कार्यक्रममा प्रधानमन्त्री ओलीले तीन हजार वर्षभन्दा अगाडि चतरामा विश्वामित्रका छोरा ऋषि सुश्रुतले सर्जरी सिकेका थिए, सर्जरी गरेका थिए भनेका हुन्।
‘मैले धेरै ठाउँमा भन्ने गरेको छु, हाम्रो चिकित्सा विज्ञानको चिकित्साशास्त्रको चिकित्साज्ञानको, चिकित्सा अभ्यासको विश्वमा सबभन्दा पुरानो इतिहास यहाँ छ। यस भूभागमा छ। तीन हजार वर्षभन्दा अगाडि चतरामा विश्वामित्रका छोरा ऋषि सुश्रुतले सर्जरी सिकेका थिए। सर्जरी गरेका थिए,’ प्रधानमन्त्री ओलीले भने।
ओलीले नेपालमा जनसंख्या कम भएपछि सुश्रुत वनारसमा गएर सेवा गरेको पनि दाबी गरे। ‘खेल्दाखेल्दै एउटा साथीको औंलो काटिएर छुटिएपछि उनले औंलो ल्याएर जोडेका थिए। त्यहाँबाट सफल शल्यक्रियाको दृष्टान्त पाइन्छ। पपुलेसन कम भएका कारण पछि उनले वनारसमा गएर सेवा गरेका थिए। जहाँको भए पनि मानव जातिको सेवा गरे,’ कार्यक्रममा प्रधानमन्त्री ओलीले भने।
उनले आधुनिक चिकित्सा एलोपेथिका पिताका रुपमा चिनिने हिप्पोक्रेटसले २४ सय वर्ष अगाडि सेवा सुरु गरेको तर नेपालमा त्यो भन्दा पहिले नै सर्जरी भएको दाबी पनि गरे। ‘एलोपेथिक चिकित्सा विज्ञान सम्बन्धी चिकित्सा ज्ञानका प्रादुर्भावकर्ता हिप्पोक्रेटस २४ सय वर्ष अगाडिको रहेको तर नेपालमा ३ हजार वर्ष अगाडि नै सर्जरी नै विकास भइसकेको’ प्रधानमन्त्री ओलीले भने।
सामाग्री श्रोत :
swasthyakhabar
