एजेन्सी – अमेरिकी राष्ट्रपति डोनाल्ड ट्रम्पले चीनले आफ्नो प्रतिशोधात्मक कदम फिर्ता नलिए अमेरिका आयात हुने चिनियाँ सामानहरूमा थप ५० प्रतिशत कर लगाउने चेतावनी दिएका छन ।
ह्वाइट हाउसमा बोल्दै ट्रम्पले चीनले लगाएको जवाफी कर फिर्ता नलिए अमेरिकाले अतिरिक्त ५० प्रतिशत कर लगाउने बताएका हुन् । यदि ट्रम्पले थप ५० प्रतिशत कर लगाए चीनबाट निश्चित सामान आयात गर्ने अमेरिकी कम्पनीहरूले कुल १०४ प्रतिशतसम्म भन्सार बुझाउनुपर्ने ट्रम्पको चेतावनी छ ।
अन्तर्राष्ट्रिय सञ्चार माध्यमका अनुसार बुधबार ट्रम्पले चीनबाट आयात हुने सामानमा ३४ प्रतिशत करको घोषणा गरेपछि चीनले पनि ३४ प्रतिशत जवाफी कर लगाएको थियो । चीनको वाणिज्य मन्त्रालयले अमेरिकाको ब्ल्याकमेल गर्ने प्रवृत्ति स्वीकार गर्न नसकिने भन्दै अमेरिकी कदमविरुद्ध अन्तिमसम्म लड्ने बताएको छ ।
मन्त्रालयले राष्ट्रपति डोनाल्ड ट्रम्पले चिनियाँ सामान माथि थप ५० प्रतिशत आयात कर लगाउने धम्कीलाई एउटा गल्तीमाथि अर्को गल्तीको संज्ञा दिएको छ । चीनले आयात कर लगाउने अमेरिकाको सबै योजना खारेज गर्न माग गर्दै दुई देशबीचको मतभेद वार्ताबाट समाधान गर्न आग्रह गरेको छ । अमेरिकी भन्सार शूल्कको अनिश्चितताका कारण विश्व सेयर बजार निकै अस्थिर बनेको छ । विश्वभरका बजार ओरालो लागेको छ ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
सामाग्री श्रोत :
नेपाललाइभ
