काठमाडौं । बंगलादेशको अन्तरिम सरकारका प्रमुख सल्लाहकार मोहम्मद युनुसले देशमा चुनावको सम्भावित मिति घोषणा गरेका छन्।
बीबीसी बंगलाका अनुसार शुक्रबार राष्ट्रका नाममा सम्बोधन गर्दै उनले अर्को राष्ट्रिय चुनाव २०२६ को अप्रिलको पहिलो पन्ध्र दिनमा हुने बताए।
उनले यो घोषणाको आधारमा निर्वाचन आयोगले उपयुक्त समयमा निर्वाचनको लागि विस्तृत रोडम्याप प्रदान गर्ने पनि बताए।
बंगलादेशको मुख्य दल बंगलादेश नेशनलिस्ट पार्टी (बीएनपी) लगायत धेरै राजनीतिक दलहरूले लगातार चुनावी रोडम्यापको माग गरिरहेका थिए। बीएनपीले यस वर्ष डिसेम्बरसम्ममा चुनावको माग गरिरहेको थियो।
यद्यपि, मोहम्मद युनुसले यस वर्षको डिसेम्बर र अर्को वर्षको जुन बीचमा चुनाव गरिनुपर्ने कुरा धेरै पटक भनेका छन्।
उनले हालै यस विषयमा विभिन्न राजनीतिक दलका प्रतिनिधिहरूसँग भेटेका थिए।
सामाग्री श्रोत :
यस वर्ष बंगलादेशमा चुनाव नहुने, मोहम्मद युनुसले गरे मिति घोषणा
