यस्तो छ, घरबाटै नबिल बैंकको खाता खोल्ने तरिका (भिडिओ टिप्स सहित)

काठमाडौं । के तपाईंलाई बैंकमा नपुगिकनै खाता खोल्न मन छ ? हाम्रो व्यस्त जीवनलाई ध्यानमा राख्दै नबिल बैंकले आफू भएकै स्थानमा रहेर अनलाइन खाता खोल्न सकिने सुविधा ल्याएको छ । यसका लागि नबिल बैंकको एप प्रयोग गर्न सकिन्छ । यस सामग्रीमा तपाईंले नबिल बैंक एपमार्फत कसरी नयाँ खाता सजिलैसँग खोल्न सकिन्छ भनेर जानकारी पाउनुहुनेछ ।

सबैभन्दा पहिला, आफ्नो फोनमा आवश्यक डकुमेन्टहरू पीडीएफ फर्म्याट वा इमेज फाइलको रूपमा तयार राख्नुहोस्। यी कागजातहरूको आकार २ एमबीभन्दा कम हुनु आवश्यक छ । यसमा समावेश हुने डकुमेन्टहरूमा राष्ट्रिय परिचयपत्र, पासपोर्ट साइजको फोटो, प्यान कार्ड (तर प्यान कार्ड नहुँदा पनि फरक पर्दैन) र सिम स्वामित्व प्रमाणपत्र सामेल छन् ।

यदि तपाईं एनटीसी प्रयोगकर्ता हुनुहुन्छ भने *922# डायल गरेर र यदि एनसेल प्रयोगकर्ता हुनुहुन्छ भने *9966# डायल गरेर आफ्नो सिमको स्वामित्व प्रमाणित गर्न सक्नुहुन्छ । यसरी प्राप्त भएको सूचना स्क्रिनशट गरेर राख्न सकिन्छ ।

अब एन्ड्रोइड प्रयोगकर्ताले प्ले स्टोरबाट र आईओएस प्रयोगकर्ताले एपस्टोरबाट नबिल बैंकको एनबैंक (nBank) एप डाउनलोड गर्नुपर्छ । एप डाउनलोड भइसकेपछि एप खोल्नुहोस् । स्क्रिनमा तपाईंलाई सुरक्षित बैंकिङका लागि केही उपयोगी जानकारी दिइएको छ । त्यसलाई पढेर जानकार भई सकेपछि ‘Skip’ गर्न सक्नुहुन्छ । अब ‘Practice Safe Banking’ मा ट्याप गर्नुहोस् र ‘Skip’ गर्दै अगाडि बढ्नुहोस् ।

अब लगइन स्क्रिनमा ‘Tap Me’ देखिन्छ । यहाँ ट्याप गर्नुहोस् । अब स्क्रिनमा देखिएको ‘Open Full Account’ मा ट्याप गर्नुहोस् । उदाहरणका लागि नेपालमै बसेर खाता खोल्न लाग्नु भएको छ भने ‘In Nepal’ मा मार्क गर्नुहोस् । यदि तपाईं नेपाल बाहिरबाट खाता खोल्न चाहनुहुन्छ भने अर्को विकल्प चयन गर्न सक्नुहुन्छ ।

हामी अहिले नेपालबाटै खाता खोल्ने प्रक्रिया अघि बढाउँदै छौँ । अब, यहाँ धेरै प्रकारका सेभिङ अकाउन्टहरू देखिन्छन् । तीमध्ये हामीले ‘नबिल जनरल सेभिङ अकाउन्ट’ चयन गरेका छौँ । त्यसका लागि ‘Apply’ मा ट्याप गर्न सकिन्छ ।

यहाँ अब ‘Register for Online Account Opening’ नामको फारम खुल्छ । यसलाई भर्नुपर्छ । यहाँ तपाईंको नाम, जन्म मिति, ईमेल ठेगाना, देशको कोड, मोबाइल नम्बर र लिङ्ग भर्नुहोस् ।

यदि तपाईं विदेशमा बसोबास गर्दै हुनुहुन्छ र ‘Outside Nepal’ विकल्प चयन गर्नुभएको छ भने त्यहाँको देशको कोड र मोबाइल नम्बर राख्नुहोस् । विदेशबाट पनि खाता खोल्न सकिन्छ ।

सबै जानकारी भरेपछि ‘Terms and Conditions’ मा टिक गर्नुपर्छ । त्यसअघि खाता खोल्दा केके कागजात चाहिन्छ भनेर स्क्रिनमा देख्न सकिन्छ: राष्ट्रिय परिचयपत्र, सिम स्वामित्व प्रमाण र पासपोर्ट साइजको फोटो । यस सामग्रीको सुरुवातमा मैले तपाईंलाई यी कागजात तयार राख्न भनेको छु । प्यान कार्डको विवरण पनि भरिएको छ भने प्यान कार्ड पनि तयार राख्नुहोस् ।

अब ‘I Agree to Terms and Conditions’ मा टिक गर्नुहोस् र ‘Terms and Conditions’ को पेज खुल्छ । त्यसलाई पढेर ‘Proceed to Account Opening Form’ मा ट्याप गरी अगाडि बढ्नुहोस् ।

यसपछि ६ अङ्कको ओटीपी कोड एसएमएस र ईमेलमा आउँछ । अब उक्त कोड भरी अगाडि बढौं ।

यहाँ तपाईंको अनलाइन अकाउन्टको ओपनिङ पोर्टल खुल्छ । जहाँ तपाईंले तीन ओटा क्याटेगरीमा जानकारी भर्नुपर्ने हुन्छ: ग्राहक विवरण, ठेगाना, रोजगारी र अकाउन्ट डिक्लेरेसन ।

सुरु गरौं ‘Basic Details’ बाट, जहाँ तपाईं आफ्नो नाम, जन्ममिति, लिङ्ग, देशको कोड, मोबाइल नम्बर, इमेल ठेगाना भर्न सक्नुहुन्छ । अब चयन गरिएको उत्पादनमा आफूले चयन गरेको सेभिङ खाता चयन गर्नुहोस् ।

अब पालो डकुमेन्ट अपलोडको । अगाडि मैले भनेका कागजातहरू सबै २ एमबीभन्दा कम हुनुपर्छ । पीडीएफ फाइल अथवा इमेज फाइल स्वीकार्य हुन्छन् ।

पहिले ‘Choose File’ मा ट्याप गरी पासपोर्ट साइजको फोटो अपलोड गर्नुहोस् । यसैगरी, अब सिम स्वामित्व प्रमाणको स्क्रिनशट अपलोड गर्नुहोस्, यो स्क्रिनशट लिने प्रक्रिया मैले सुरुमा सिकाइसकेको छु, तपाईंले स्क्रिनमा पनि देख्न सक्नुहुन्छ ।

अर्को ‘NID’ को पालो आउँछ । तपाईं आफ्नो राष्ट्रिय परिचयपत्रको फ्रन्ट साइड यहाँ अपलोड गर्न सक्नुहुन्छ । यदि तपाईंको ओरिजिनल NID कार्ड छैन भने NID कार्ड आवेदन गर्दा भएको आवेदन फारम र NID को सफ्ट कपी अपलोड गर्नु पर्ने हुन्छ । 

अब पालो आएको छ ‘Identification Details’ को । यहाँ तपाईंले ‘Identification Type’, ‘Nationality’, ‘Place of Birth’, ‘Identification Number’, ‘Place of Issue’, ‘Issuing Authority’, ‘Document Issue Date’ भर्नुपर्छ । Identification Number मा NID नम्बर लेख्नुहोस्, जुन तपाईंको NID आवेदन वा NID सफ्ट कपीमा लेखिएको हुन्छ ।

अब तपाईं आफ्नो परिवार विवरण भर्न सक्नुहुन्छ । परिवार विवरणमा तपाईंको NID कार्ड वा NID आवेदनमा भएको परिवार विवरण अनुसारको नाम थर लेख्नुहोस् । अब तल ‘Continue’ मा ट्याप गरी अगाडि बढ्नुहोस् ।

Address and Employment Category पछि अब पालो आएको छ अकाउन्ट र डिक्लेरेसन । यहाँ तपाईंले आफुले लिन चाहेको खाता सेवाहरू (जस्तै डेबिट कार्ड, मोबाइल बैंकिङ सेवा, इन्टरनेट बैंकिङ सेवा) चयन गर्न सक्नुहुन्छ ।

अब खाता र लेनदेन विवरणमा, तपाईंले खाता खोल्नुको उद्देश्य, अधिकतम लेनदेन संख्या, लेनदेन भोल्युम र कुन शाखा रोज्न चाहनुहुन्छ त्यो चयन गर्न सक्नुहुन्छ । मैले यहाँ नयाँ बानेश्वर शाखा रोजेको छु, यसले बैंकमा जान आवश्यक परेको खण्डमा सजिलो हुनेछ ।

अन्तिम चरण: तपाईंको आवेदनको समीक्षा गरी ‘Submit Application’ मा ट्याप गर्नुहोस् ।

अब, तपाईंले “Congratulations!” सहित “CR-2025-…” जस्तो देखिने रजिष्ट्रेसन नम्बर प्राप्त गर्नुहुनेछ । त्यसपछि nबैंक प्रतिनिधिले तपाईंका कागजातहरू प्रमाणित गरी तीन वर्किङ डेजभित्र तपाईंलाई ईमेलमार्फत सम्पर्क गर्नेछ ।

भिडिओ केवाईसी: तपाईंलाई ईमेलमार्फत खाता नम्बर र Video KYC लिंक प्राप्त हुनेछ । केवाईसी प्रक्रिया पूरा गरेपछि तपाईंको खाता सक्रिय हुनेछ ।

सम्भावित कागजातहरू:

• नागरिकता अथवा पासपोर्ट 

• सादा सेतो कागज र कालो पेन 

• स्मार्टफोन वा ल्यापटप (स्पिकर र क्यामेरा सक्षम)उज्यालो प्रकाश र नेटवर्क

भिडिओ केवाईसी समाप्त पछि तपाईंको खाता सक्रिय हुनेछ र तपाईंलाई ईमेलमार्फत जानकारी दिइनेछ ।

पछिल्लो अध्यावधिक: चैत २२, २०८१ १४:१०