काठमाडौं । सामाजिक सञ्जालका विभिन्न माध्यममा नेकपा (माओवादी केन्द्र) का अध्यक्ष एवम् पूर्व प्रधानमन्त्री पुष्पकमल दाहाल ‘प्रचण्ड’लाई पक्राउ गर्न भन्दै ह्याशट्याग अभियान चलाइएको छ । शनिबार दिउसोदेखि सामाजिक सञ्जाल प्रयोगकर्ताले ह्याशट्याग अरेस्ट प्रचण्ड अभियान सुरु गरेका हुन् ।
पूर्वराजा ज्ञानेन्द्र शाहलाई पक्राउ गर्न भन्दै शनिबारदेखि नै समाजिक सञ्जालमा ह्याशट्याग अरेस्ट ज्ञानेन्द्र सुरु भएको थियो । शुक्रबार राजधानीको तीनकुनेमा दुई जनाको ज्यान जानेगरी प्रदर्शन, आगजनी, लुटपाट र तोडफोडका घटना भएका थिए । राजावादी समर्थकले गरेको उक्त प्रदर्शनले विभिन्न अकल्पनीय घटना निम्त्याएको भन्दै त्यसको जिम्मेवारी पूर्वराजा ज्ञानेन्द्रले लिनुपर्ने माग सामाजिक सञ्जाल प्रयोगकर्ताले राखेका थिए ।
त्यसैको प्रतिवादमा शनिबारदेखि नै अरेस्ट प्रचण्ड ह्याशट्याग अभियान सुरु भएको हो । शनिबार नेकपा (माओवादी केन्द्र) को नेतृत्वमा प्रदर्शन भएको थियो । उक्त प्रदर्शन शान्तिपूर्ण रहे पनि २०६२/६३ को जनआन्दोलन र त्यसअघि माओवादी युद्धका क्रममा हजारौँ नेपाली मारिएको घटनाको जिम्मा प्रचण्डले लिनुपर्ने माग उनीहरूले गरेका छन् ।
सामाजिक सञ्जाल एक्स मा ‘अरेस्ट प्रचण्ड’ भन्ने ह्यासट्याग चलाएका छन् भने फेसबुकमा पनि यो ह्यासट्याग ट्रेन्डिङमा छ ।
पछिल्लो अध्यावधिक: चैत १७, २०८१ १५:५९
सामाग्री श्रोत :
टेक पाना
