काठमाडौं । सरकारी स्वामित्वको दूरसञ्चार कम्पनी नेपाल टेलिकमले स्थानीय तहका कार्यालयमा अझै सेवा नपुगे खबर गर्न अनुरोध गरेको छ । एक सूचना जारी गर्दै कम्पनीले स्थानीय तहका कार्यालयमा दैनिक कामकाजको लागि इन्टरनेट तथा टेलिफोन सेवा नपुगे नजिकको दूरसञ्चार कार्यालयमा सम्पर्क गर्न अनुरोध गरेको हो ।
“नेपाल दूरसञ्चार कम्पनी लिमिटेडबाट देशका सम्पूर्ण ७५३ स्थानीय तहसम्म मोबाइल/एफटीटीएच/भीस्याट/लिज सेवाहरूमध्ये कम्तीमा कुनै एक सेवा पुर्याइसकेको हुँदा हालसम्म पनि कुनै स्थानीय तह अन्तर्गतका कार्यालयहरूको दैनिक कामकाजका लागि इन्टरनेट तथा टेलिफोन सेवा नपुगेको भएमा निम्नानुसार टेलिफोन/मोबाइल नम्बर (नेपाल टेलिकम, ब्याकबोन प्रसारण निर्देशनालय, बबरमहल- टेलिफोन: ०१५७०७६२१, मोबाइल: ९८५१०८७६५४) वा नजिकको दूरसञ्चार कार्यालयमा सम्पर्क गरी उपलब्ध सेवा प्राप्त गर्नुहुन अनुरोध छ,” सूचनामा भनिएको छ ।
सरकारी सेवा प्रवाहलाई स्वचालित बनाउन र सुशासन प्रवर्द्धन गर्ने उद्देश्यले टेलिकमले देशका ७५३ ओटै स्थानीय तह र ६ हजार ७४३ वडा केन्द्रलाई जोड्ने अभियान अन्तर्गत ब्रोडब्यान्ड कनेक्टिभिटी आयोजना कार्यान्वयन गरिरहेको छ ।
यही सन्दर्भमा कम्पनीले स्थानीय तहका कार्यालयमा आफ्नो सेवा नपुगे तत्काल जानकारी गराउन आग्रह गरेको हो ।
पछिल्लो अध्यावधिक: चैत १६, २०८१ २१:१८
सामाग्री श्रोत :
टेक पाना
