काठमाडौं । शनिबारदेखि सुरु भएको इन्डियन प्रिमियर लिग (आईपीएल) लाई लक्षित गर्दै भारत सरकारले अनलाइन कारोबारसँग सम्बन्धित करिब ७०० साइट ब्लक गरेको छ । जसमध्ये ३५७ अनलाइन बेटिङ साइट रहेको स्थानीय सञ्चार माध्यमहरूले जनाएका छन् ।
अवैध गेमिङ प्लेटफर्मका कारण देशको कर सङ्कलन प्रभावित भएपछि पछिल्लो समय भारतको डाइरेक्टोरेट जनरल अफ गुड्स एन्ड सर्भिसेस ट्याक्स इन्टेलिजेन्स (डीजीजीआई) ले यस्ता प्लेटफर्ममाथिको कारबाहीलाई तीव्रता दिएको हो । यससँगै यस्ता प्लेटफर्महरूसँग जोडिएका करिब २००० बैंक खाता पनि निष्क्रिय गरिएका छन् ।
साथै यूपीआईसँग लिंक भएका करिब ३९२ बैंक खाता फ्रिज गरिएको छ । कलाकारदेखि क्रिकेट खेलाडीहरूसम्म यस्ता अवैध गेमिङ प्लेटफर्मको प्रमोसनमा लागेको पाइएकाले भारत सरकारले जनतालाई यस्ता विज्ञापनहरूबाट सचेत रहन र कुनै पनि अनलाइन गेमिङ प्लेटफर्ममा नफस्न आग्रह गरेको छ ।
पछिल्लो अध्यावधिक: चैत १०, २०८१ १६:३६
सामाग्री श्रोत :
टेक पाना
