सिचुवान (छोङ्छिङ)। पोखरा र चीनको सिचुवान प्रान्तको छोङछिङ नगरका पर्यटन व्यवसायीबीच व्यावसायिक साझेदारी बिटुबी (बिजनेस टु बिजनेस) तथा ‘सेल्स मिसन’ आयोजना गरिएको छ।

यहाँ आयोजित कार्यक्रममा दुवै नगरका पर्यटन व्यवसायीले सिचुवान एयरलायन्सको उडान नियमित भएमा पर्यटकीय साझेदारीलाई थप प्रभावकारी बनाउँदै लैजान सकिने बताएका थिए। छोङछिङका पर्यटन व्यवसायीले पोखरा र छोङछिङको भौगोलिक अवस्थिति मिल्दोजुल्दो भएको बताउँदै यहाँबाट पर्यटकहरू पोखरा लैजाने आफूहरूले हरसम्भव प्रयास गर्ने प्रतिबद्धता व्यक्त गरे।

यहाँका संस्कृति एवं पर्यटन विकास आयोगका उपमहानिर्देशक वाङ हाओले पोखरासँग पर्यटकीय साझोदारी बढाउन आफूहरू उत्साहित भएको बताए। नेपाल र चीनबीचको औपचारिक कूटनीतिक सम्बन्ध स्थापनाको ७०औँ वर्ष पुगिसकेको उल्लेख गर्दै उनले दुई देशबीचका नागरिक नागरिकको सम्बन्धलाई पनि साझेदारीले महत्वपूर्ण सहयोग पु¥याउने विश्वास व्यक्त गरे।

पोखरा महानगरपालिकाका प्रमुख प्रशासकीय अधिकृत शिवराज चौलागाईंले प्रकृति, संस्कृति र साहसिक पर्यटन नै पोखराको विशिष्टता भएको बताउँदै पोखरा भ्रमणका लागि छोङछिङवासीलाई आग्रह गरे। उनले आफूहरूको तर्फबाट पोखरा—छेन्दुमा उडानलाई सफल बनाउन सम्पूर्ण सहयोग रहने बताए। पोखरा भ्रमण वर्षका अवसरमा विभिन्न पर्यटकीय प्याकेजमा विशेष छुटका योजना पनि सार्वजनिक गरिसकिएको प्रमुख प्रशासकीय अधिकृत चौलागाईंले जानकारी गराए।

नेपाल पर्यटन बोर्ड गण्डकी प्रदेशका प्रमुख मणिराज लामिछानेले पोखरा प्रकृति, संस्कृति र साहसिक पर्यटनको महत्वपूर्ण गन्तव्य भएको बताउँदै यो चिनियाँ पर्यटकको रोजाइमा परिरहेको बताए। पोखरामा चिनियाँ पर्यटक लक्षित पूर्वाधारमा कमी नरहेको बताउँदै उनले पर्यटकको बढ्दो आगमनसँगै अन्य पूर्वाधार बढ्ने धारणा राखे।

नेपाल पर्यटन बोर्डको आयोजना एवं पोखरा पर्यटन परिषद् र छिन्दुस्थित महावाणिज्यदूतावाससँगको सहकार्यमा कार्यक्रम आयोजना गरिएको हो। पोखरा अन्तरराष्ट्रिय विमानस्थलबाट पहिलो व्यावसायिक चाटर्ड उडानमार्फत यहाँ आएका पोखराका पर्यटन व्यवसायी सिचुवान प्रान्तका छिन्दु, लुझाउलगायत सहरमा उच्चस्तरीय भेटघाटसँगै पर्यटन प्रवर्द्धनका विभिन्न कार्यक्रमका साथ शनिबार छोङछिङ आइपुगेको हुन्।

काठमाडौं । त्रिभुवन अन्तर्राष्ट्रिय विमानस्थलबाट प्रहरीले विद्युतीय चुरोट (Vape) र भन्सार छलीका विभिन्न सामानसहित चार जनालाई पक्राउ गरेको छ । काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले शनिबार बेलुका चार जनालाई नियन्त्रणमा लिएको हो । 

कार्यालयका प्रवक्ता प्रहरी उपरीक्षक काजीकुमार आचार्यका अनुसार पक्राउ परेका चारै जना फ्लाई दुबईको उडान नं. एफजेड ५७५ बाट नेपाल आएका थिए । विमानस्थलको आगमन टर्मिनल तर्फको ट्याक्सी पार्किङ क्षेत्रतिर झोला बोकेर आइरहदा उनीहरूको गतिविधि अस्वभाविक देखेपछि प्रहरीले नियन्त्रणमा लिएको हो । “ड्युटीमा खटिएको हाम्रा साथीहरू (प्रहरी टोली) ले चार जनाले अस्वभाविक रूपमा झोला बोकेको नोटिस गरे,” टेकपानासँग कुरा गर्दै प्रहरी उपरीक्षक आचार्यले भने, “उनीहरुको गतिविधि शंकास्पद देखिएपछि नियन्त्रणमा लिई सोधपुछ गरियो ।”

त्यही क्रममा उनीहरुको साथबाट भेपसहित भन्सार छलीका सामान बरामद भएको प्रहरीले जनाएको छ । पक्राउ पर्नेमा उदयपुर चौदण्डीगढीका ३४ वर्षीय योगेन्द्र दाहाल, पर्वत मोदी गाउँपालिकाका २४ वर्षीय सौगात क्षेत्री, सिन्धुली दुधौलीकी २६ वर्षीया सलिना बर्देवा र मोरङ लेटाङका ४६ वर्षीय सुरेन्द्र घिसिङ तामाङ रहेका छन् ।

उनीहरुको साथबाट विभिन्न कम्पनीका ४१० थान विद्युतीय चुरोट (Vape), एउटा टिभी, एउटा मेटा क्वेस्ट थ्रीएस भीआर हेडसेट, एउटा म्याकबुक, एउटा एस २४ अल्ट्रा, दुई ओटा आईफोन बरामद भएको प्रहरीले जनाएको छ । साथै प्रहरीले उनिहरूको साथबाट तीन ओटा स्मार्टवाच, दुई ओटा गुगल पिक्सेल बड्स प्रो, एउटा पिक्सेल नाइन प्रो फोन र दुई ओटा डेल कम्पनीको ल्यापटप पनि बरामद गरेको छ । 

उनीहरूले विमानस्थलबाट कसरी भेप फुत्काए भन्ने विषयमा अनुसन्धान भइरहेको आचार्यले जानकारी दिए । त्यस्तै उनीहरूले भेप आफ्ना लागि ल्याएका हुन् वा अरू कसैको अनुरोधमा ल्याएका हुन् भन्ने विषय खुलिसकेको छैन । पक्राउ परेका व्यक्तिलाई बरामद सामानसहित थप अनुसन्धान तथा आवश्यक कारवाहीका लागि त्रिभुवन अन्तर्राष्ट्रिय विमानस्थल भन्सार कार्यालय गौचर पठाइएको छ ।

पछिल्लो अध्यावधिक: चैत १०, २०८१ १९:४६

काठमाडौं–राष्ट्रिय प्रजातन्त्र पार्टी (राप्रपा) का नेता ज्ञानेन्द्र शाहीले नेपाली कांग्रेसका सभापति शेरबहादुर देउवालाई बीपीको सिद्धान्त बेचेर खाएको आरोप लगाएका छन्।

नेता ज्ञानेन्द्र शाहीले आइतबार सामाजिक सञ्जाल फेसबुकमा स्टाटस लेख्दै यस्तो भनेका हुन्।

यसअघि पार्टीको बागमती प्रदेश प्रशिक्षण विभागद्वारा आयोजित कार्यक्रमलाई सम्बोधन गर्ने क्रममा सभापति देउवाले  पूर्वराजा ज्ञानेन्द्र शाहलाई राजा बन्नलायक नभएको भन्दै नेपालमा राजतन्त्र फर्किने सम्भावना नरहेकाले संवैधानिक राजा बन्नुभन्दा पनि राप्रपाको सभापति बन्न सुझाव दिएका  थिए।

यसको जवाफ दिँदै शाहीले भनेका छन्, ‘बीपीको सिद्धान्त मान्दै हुर्केको कांग्रेसको सभापति हुनुभएको हो माननीय पूर्वप्रधानमन्त्री शेरबहादुर देउवाज्यू, हजुरले बीपीको सिद्धान्त पनि बेचेर खानुभएछ। राजालाई राप्रपाको सभापति हुनुहोस् भन्नुभएछ। त्यसो भए हजुर ३ पटक प्रधानमन्त्री राप्रपाको सभापतिसँग सपथ खाँदै बन्नुभएको हो ?’

उनले ‘जसले भुइँ छोड्छ, उसको पतन निश्चित हुन्छ’ भन्ने नेपाली उखान याद गर्नसमेत भनेका छन्। ‘सभापतिज्यू, यदि तपाईंसँग राजाको बारेमा कांग्रेसको धारणा के छ भनेर बुझ्न मन छ भने कांग्रेसमा चुनाव गराउन सक्नुहुन्छ, हिम्मत छ ?,’ भनि प्रश्न पनि सोधेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं। नेपाली कांग्रेसले नेपालको संविधान र संविधानमा आधारित संघीय लोकतान्त्रिक गणतन्त्रप्रति पूर्ण प्रतिबद्ध रहने दृढता व्यक्त गरेको छ।

आज बसेको कांग्रेस केन्द्रीय कार्यसम्पादन समितिको बैठकले संविधानको संरक्षण, सम्वर्द्धन र कार्यान्वयनमार्फत मुलुकलाई भ्रष्टाचारमुक्त र सुशासनयुक्त, सामाजिक विकृति र विसङ्गतिबाट मुक्त बनाउँदै जनताको निरन्तर प्रगतिको अपेक्षा र आवश्यकता सम्बोधन गर्न सकिन्छ विश्वास व्यक्त गरेको हो।

बैठकले यही विश्वास साथ अघि बढ्नु नै अहिलेको मुख्य राष्ट्रिय जिम्मेवारी ठान्दै यसका निम्ति आवश्यक अग्रसरता लिने निर्णय गरेको पार्टीका कार्यवाहक मुख्यसचिव डा प्रदीप पराजुलीले जानकारी दिए। सभापति शेरबहादुर देउवाको सभापतित्वमा बसेको बैठकमा महामन्त्री गगनकुमार थापाले विभिन्न प्रस्तावहरू प्रस्तुत गरेको उनले बताए।

जनसम्पर्क समितिमा दुई किसिमका सदस्य

बैठकले पार्टीको विदेशस्थित जनसम्पर्क समितिमा कांग्रेसको क्रियाशील सदस्यता र जनसम्पर्क समितिको सदस्यता गरी दुई किसिमका सदस्य रहने व्यवस्था गरेको कार्यवाहक मुख्यसचिव डा पराजुलीले बताए।

नेपाली जनसम्पर्क समितिको अध्यक्ष, पदाधिकारी वा सदस्य नेपाली जनसम्पर्क समितिको विधानमा व्यवस्था भएबमोजिम क्रियाशील सदस्य वा जनसम्पर्क समितिको सदस्यता प्राप्त गरेको सदस्यमध्येबाट चयन हुनसक्ने निर्णय गरिएको छ। उक्त व्यवस्थाअनुसार जनसम्पर्क समितिको सदस्यता प्राप्त गर्न गैरआवासीय नेपाली परिचयपत्र वा गैरआवासीय नेपाली नागरिकता प्राप्त गरेका व्यक्ति समेतलाई बाधा नपुग्ने निर्णय गरिएको छ।

यस्तै, जनसम्पर्क समितिको अध्यक्ष स्वतः महाधिवेशन प्रतिनिधि तथा महासमिति सदस्य हुने व्यवस्था हटाइएको छ। यो व्यवस्था लागू हुनुपूर्व क्रियाशील सदस्यता प्राप्त गरेका त्यस्ता नागरिकहरूको हकमा निजहरूले प्राप्त गरेको क्रियाशील सदस्यता जनसम्पर्क समितिको सदस्यतामा रूपान्तरित हुनेछ। साथै, निजले प्राप्त गरेको साविकको क्रियाशील सदस्यतालाई सोही अवधिदेखि पार्टीमा संलग्नताको निरन्तरतामा समेत गणना गरिने निर्णय भएको पराजुलीले जानकारी दिए।

पार्टी केन्द्रीय कार्यसमितिले विदेशस्थित जनसम्पर्क समितिबाट केन्द्रीय महाधिवेशन प्रतिनिधि सङ्ख्या तोक्दा एउटा देशबाट बढीमा १४ जना र केन्द्रीय महासमिति सदस्य तोक्दा छ जनाभन्दा बढी तोक्न सक्ने व्यवस्था गरिएको छ।

महाधिवेशन प्रतिनिधि र महासमिति सदस्य हुन क्रियाशील सदस्यता अनिवार्य

कांग्रेसले पार्टीको महाधिवेशन प्रतिनिधि तथा महासमिति सदस्य निर्वाचित हुन अनिवार्य क्रियाशील सदस्य हुनुपर्ने निर्णय गरेको छ। बैठकले पार्टीको नियमावलीमा आवश्यक संशोधनसमेत गरेको  छ।

यसैगरी कांग्रेसले यही चैत ५ गते सम्पन्न स्ववियु निर्वाचनको प्रतिस्पर्धामा धेरै क्याम्पसमा विजय हासिल गरेर पहिलो स्थान हासिल गर्न सफल भएकामा नेपाल विद्यार्थी संघलाई बधाई ज्ञापन गर्दै विजयी सम्पूर्ण विद्यार्थीलाई कुशलतापूर्वक जिम्मेवारी निर्वाह गर्न शुभकामना व्यक्त गरेको छ।

पार्टीले सिरहाको औरही गाउँपालिका–५ मा विष्णु महायज्ञ आयोजना गर्ने सन्दर्भमा स्थानीय दलित समुदायका दीपक मरिकको घर भत्काउने कार्य सामाजिक रूपमा निन्दनीय र कानुनी रूपमा दण्डनीय अपराध भएको उल्लेख गर्दै उक्त घटनाका दोषीमाथि कारबाहीको माग गरेको छ।

बैठकले नेपाली कांग्रेस (बिपी) को साधारण सदस्यतासमेत परित्याग गरी पार्टीमा समाहित हुनुभएका हरिबोल भट्टराई, पुष्पराज पराजुली, गोविन्द शर्मा पौडेललगायत १२ जनालाई पार्टीका विभिन्न पदमा गरिएको मनोनयनलाई अनुमोदन गरेको छ।

आजको बैठकमा सहमहामन्त्रीहरू फरमूल्लाह मन्सुर, महेन्द्र यादव र जीवन परियार तथा केन्द्रीय सदस्यहरू विमलेन्द्र निधि, अर्जुननरसिंह केसी, प्रवक्ता डा प्रकाशशरण महत, डा शेखर कोइराला, बलबहादुर केसी, ज्ञानेन्द्रबहादुर कार्की, डा नारायण खड्का, सुजाता कोइराला र एनपी साउँदले आ-आफ्नो धारणा व्यक्त गरेका थिए।

काठमाडौं । फसबुकले पछिल्लो समय ल्याइरहेका परिवर्तन र अन्य विभिन्न कारणले गर्दा कतिपय प्रयोगकर्ताहरूलाई आफ्नो अकाउन्ट डिलिट वा निष्क्रिय गर्ने चाहना हुन सक्छ । फेसबुकले प्रयोगकर्तालाई आफ्नो वा अरू (१३ वर्ष मुनीका, स्वास्थ्य समस्यायुक्त र वितेका) को अकाउन्ट डिलिट गर्ने विकल्प दिएको छ । 

यहाँ फेसबुक (र इन्स्टाग्राम समेत, जुन मेटाकै एप हो) अकाउन्ट डिलिट र निष्क्रिय गर्ने तरिका बताउँदै छौँ । 

१. अकाउन्ट निष्क्रिय गर्ने तरिका

• डेस्कटपका लागि माथि दायाँ कुनामा रहेको आफ्नो प्रोफाइल फोटोमा क्लिक गर्नुहोस्।

• ‘Settings & Privacy’ मा गएर ‘Settings’ छान्नुहोस्।

• बाँया पट्टि रहेको ‘Meta Accounts Center’ मा क्लिक गर्नुहोस् र ‘Account settings’ अन्तर्गत रहेको ‘Personal details’ मा क्लिक गर्नुहोस् । 

• अब ‘Account Ownership and Control’ विकल्प रोज्नुहोस् अनि ‘Deactivation or deletion’ मा जानुहोस् ।

• यहाँबाट अगाडि गइसकेपछि तपाईँले ‘Deactivate account’ अथवा ‘Delete account’ मध्ये एउटा छान्नु पर्ने हुन्छ । यहाँनिर ध्यान दिनुपर्ने कुरा के छ भने तपाईँले ‘Deactivate account’ चयन गर्दा तपाईँको फेसबुक अकाउन्ट अस्थायी रूपमा निष्क्रिय हुन्छ अर्थात् तपाईँको अकाउन्ट र मुख्य प्रोफाइल निष्क्रिय हुन्छ र तपाईँको नाम तथा फोटो तपाईँले शेयर गरेका अधिकांश ठाउँबाट हट्न पुग्छ । तपाईँ आफ्नो फेसबुक मेसेञ्जरको प्रयोगलाई भने निरन्तरता दिन सक्नु हुन्छ । 

तर यदि ‘Delete account’ रोज्नु भयो भने तपाईँको फेसबुक अकाउन्ट सधैंका लागि डिलिट हुन्छ ।जब आफ्नो अकाउन्ट डिलिट गर्नु हुन्छ, तपाईँको मुख्य प्रोफाइल र तपाईँले फेसबुकमा राखेका सबै चिज स्थायी रूपमा मेटिएर जान्छन् । यति मात्र नभई यससँगै रहेका तपाईँका अतिरिक्त प्रोफाइल, मेसेञ्जर प्रोफाइल र तपाईँका सम्पूर्ण मेसेज पनि डिलिट हुन पुग्छन् । 

• मोबाइलका लागि एपको माथि दायाँ कुनामा रहेको प्रोफाइलमा क्लिक गर्नुहोस्, र केही स्क्रोल गरेपछि माथि डेस्कटपका लागि भनिए जस्तै प्रक्रिया अनुसरण गर्नुहोस् ।

२. अकाउन्ट सधैंका लागि डिलिट गर्ने तरिका

• स्थायी रूपमा अकाउन्ट हटाउन facebook.com/help/delete_account मा जानुहोस्।

• ध्यान दिनुहोस् कि फेसबुक डेटा प्रयोगको नीतिअनुसार, तपाईँको प्रोफाइलबाट हटाइएको जानकारी केही समयका लागि अन्य स्थानहरूमा बाँकी रहन सक्छ।

• अकाउन्ट मेटाएपछि केही पोस्टहरू, कमेन्टहरू वा तस्बिरहरू ९० दिनसम्म फेसबुकका सर्भरहरूमा रहन सक्छन्।

यहाँनिर ख्याल गर्नुपर्ने कुरा के छ भने अकाउन्ट हटाउने प्रक्रिया सुरु भएपछि ३० दिनको ग्रेस अवधि हुन्छ । यदि तपाईँको विचार परिवर्तन भयो भने, यो अवधिमा आफ्नो फेसबुक अकाउन्ट पुनः सक्रिय गर्न सक्नु हुन्छ ।

३. अरूका लागि फेसबुक अकाउन्ट डिलिट गर्ने वा मेमोरियलाइज गर्ने तरिका

• चिकित्सकीय कारण वा असमर्थता भएका प्रयोगकर्ताहरूका लागि:

  • यदि कुनै व्यक्ति स्वास्थ्यका कारणले फेसबुक प्रयोग गर्न असमर्थ छन् भने, यहाँ क्लिक गरेर प्रमाणसहित अकाउन्ट हटाउने प्रक्रिया अगाडि बढाउन सकिन्छ । 

  • तर यसरी अनुरोध गर्ने व्यक्तिले आफू सम्बन्धित व्यक्तिको अभिभावक वा अधिकार प्रयोग गर्ने हकवाला भएको प्रमाणित गर्नुपर्ने हुन्छ ।

• निधन भइसकेका प्रयोगकर्ताको अकाउन्ट:

  • कुनै पनि फेसबुक प्रयोगकर्ताले आफू जीवित रहेको अवस्थामा एक ‘लिगेसी कन्ट्याक्ट’ तोक्न सक्छन्, जसले त्यस्तो व्यक्तिको मरणपछिको अकाउन्ट व्यवस्थापन गर्न सक्छ । यसका लागि ‘Meta Accounts Center’ हुँदै ‘Personal details’ डिटेल्स भित्र रहेको ‘Account Ownership and Control’ मा गएर ‘Memorialization’ छान्नुपर्ने हुन्छ । त्यसपछि त्यस्तो अकाउन्ट छान्ने विकल्प आउँछ । 

  • अब फ्रेन्ड्सको नाम टाइप गरेर सम्बन्धित व्यक्तिको प्रोफाइल खोज्नुहोस् र ‘Add’ मा थिच्नुहोस् । त्यसपछि ‘Send’ मा क्लिक गरेसँगै सम्बन्धित व्यक्तिलाई नोटिफिकेसन जान्छ । (यहाँबाट विद्यमान लिगेसी कन्ट्याक्ट हटाउन वा परिवर्तन गर्न पनि सकिन्छ)

  • लिगेसी कन्ट्याक्टलाई डिलिट गर्न वा मेमोरलाइज गर्न सकिने विकल्प उपलब्ध छन् ।

  • यसले मृत व्यक्तिको टाइमलाइनलाई ‘Remembering’ लेबल सहित राख्छ, तर पोस्ट गर्न नसक्ने व्यवस्था मिलाउँछ ।

लिगेसी कन्ट्याक्ट चयन गर्दा प्रत्येक वर्ष फेसबुकबाट भेरिफिकेसनको सूचना आउँछ, ताकि कन्ट्याक्ट कायमै रहोस् । चाहेको खण्डमा मरणपछि अकाउन्ट स्थायी रूपमा हटाउने विकल्प पनि प्रयोग गर्न सकिन्छ ।

पछिल्लो अध्यावधिक: चैत १०, २०८१ २०:३

बैतडी। बैतडीको डिलाशैनी गाउँपालिकामा भेडाबाख्रा र च्याङ्ग्रा ओसारपसार गर्दा अनिवार्य रूपमा निरोगी प्रमाणित गर्नुपर्ने भएको छ।

गाउँपालिकाले एक सूचना जारी गर्दै महामारी रोग ‘पिपिआर’ फैलन नदिन भेडाबाख्रा र च्याङ्ग्रा ओसारपसार गर्दा अनिवार्य रूपमा निरोगी प्रमाणित भएको हुनुपर्ने जनाएको हो। पञ्चेश्वरलगायत क्षेत्रमा बाख्रामा लाग्ने महामारी रोग पिपिआर देखिएकाले त्यसबाट बच्न यस्तो गर्नुपरेको गाउँपालिकाका निमित्त प्रमुख प्रशासकीय अधिकृत शङ्करबहादुर साउँदले जानकारी दिए।

गाउँपालिकाका अध्यक्ष सन्तोषप्रकाश जोशीले महामारी फैलनबाट बच्न अनिवार्य रूपमा निरोगी प्रमाणित गर्न आग्रह गर्रिको बताए। उनले भने, ‘महामारी रोग पिपिआर फैलनबाट बच्न अनिवार्य रूपमा निरोगी प्रमाणित गर्न भनेका हौँ। पालिकाभरिका सबै किसानलाई निरोगी प्रमाणित गरेर मात्र किनबेच गर्न आग्रह गर्दर्छौँं।’

यसअघि पञ्चेश्वर गाउँपालिका–६ मा पर्ने बिजुल गाउँमा पिपिआरबाट ५७ बाख्रा मरेका थिए। यस रोगले एकै गाउँका ५७ बाख्रा मरेपछि पञ्चेश्वर गाउँपालिका र भेटेरिनरी अस्पताल तथा पशु सेवा विज्ञ केन्द्र पाटनको संयुक्त आयोजनामा पशु स्वास्थ्य शिविरसमेत गरिएको थियो।

शिविरका साथै हाल पनि बाख्रालाई पिपिआरविरुद्धको खोप दिने कार्यक्रम नियमित रूपमा सञ्चालनमा रहेको भेटेरिनरी अस्पताल तथा पशु सेवा विज्ञ केन्द्र प्रमुख गुमानी पन्तले बताए। उनले भने, ‘प्रभावित क्षेत्रमा पशुस्वास्थ्य शिविरको आयोजना गरेका छौँ। यसबाहेक आसपासका गाउँमा नियमित खोप दिने कार्य भइरहेको छ।’

जिल्लाका अन्य पालिकालाई पनि भेडाबाख्रा ओसारपसार गर्दा अनिवार्य निरोगी प्रमाणित गर्न विज्ञ केन्द्रले आग्रह गरेको छ। बाख्रामा कुनै लक्षण देखिएमा विज्ञ केन्द्र र पालिकाको पशुसेवा केन्द्रमा सम्पर्क गर्न सुझाइएको छ। पिपिआर रोग भएका बाख्रामा ज्वरो आउने, खोक्ने, रगत छेर्नेलगायत लक्षण देखिन्छ। लक्षण देखिएको एक सातामै बाख्राको मृत्यु हुने गरेको जनाइएको छ।

काठमाडौं । नेपाली बजारमा जेडटीई (ZTE) स्मार्टफोनको नयाँ सिरिज सार्वजनिक भएको छ । आइतबार राजधानीमा एक कार्यक्रम गर्दै नेपालका लागि जेडटीईको आधिकारिक वितरक शंकर ग्रुपले विभिन्न पाँच मोडेल सार्वजनिक गरेको हो । 

यस अन्तर्गत कम्पनीले ब्लेड र नुबिया सिरिज बजारमा ल्याएको छ । कम्पनीले सस्तो मूल्यमा नेपाली प्रयोगकर्तालाई स्तरीय फिचर र पर्फमेन्स भएका फोन अनुभव गराउने उद्देश्यले यी फोन ल्याएको जनाएको छ । नयाँ सिरिजमा शक्तिशाली प्रोसेसर, उत्कृष्ट क्यामेरा र टिकाउ ब्याट्री रहेको कम्पनीको दाबी छ ।

कम्पनीले ब्लेड ए ७५ (Blade A75), ब्लेड ए ३५ई (Blade A35e), ब्लेड ए ५५ (Blade A55), नुबिया भी७० म्याक्स (nubia V70 Max) र नुबिया भी७० डिजाइन (nubia V70 Design) गरी पाँच नयाँ स्मार्टफोन सार्वजनिक गरको हो । 

“हामी जेडटीईलाई नेपालमा पुन: ल्याउन पाउँदा उत्साहित छौं । हामी नेपाली ग्राहकलाई उत्कृष्ट स्मार्टफोनहरू उपलब्ध गराउन प्रतिबद्ध छौं,” शंकर ग्रुपका कार्यकारी निर्देशक सक्षम जाखेरले भने । कम्पनीले यी स्मार्टफोनलाई प्रतिस्पर्धी मूल्यमा बजारमा उपलब्ध गराउने बताएको छ । 

यस्तो छ जेडटीईका नयाँ स्मार्टफोनको मूल्य र स्टोरेज क्षमताः

जेडटीई ब्लेड ए७५ (ZTE Blade A75):

• मूल्य: रु. १३,९९९/-

• स्टोरेज: ४+२५६ जीबी

• कलर: डायमन्ड ब्ल्याक र मिन्ट ग्रीन

जेडटीई ब्लेड ए५३ ई (ZTE Blade A53e):

• मूल्य: रु. १०,४९९/-

• स्टोरेज: २+६४ जीबी

• कलर: सिल्भरी ग्रे र आइस ग्रीन

जेडटीई ब्लेड ए५५ (ZTE Blade A55):

• मूल्य: रु. ११,९९९/- स्टोरेज: २+६४ जीबी

• मूल्यः रु. १२,९९९/- स्टोरेज: ४+१२८ जीबी

• कलर: स्टारी ब्ल्याक एन्ड वाटर ब्लु

जेडटीई नुबिया भी७० म्याक्स (ZTE nubia V70 Max):

• मूल्य: रु. १५,९९०/-

• स्टोरेज: ६+१२८ जीबी

• कलर: लेक ग्रिन र ग्लाटिक ग्रे

जेडटीई नुबिया भी७० डिजाइन (ZTE nubia V70 Design):

• मूल्य: रु. १६,९९९/- स्टोरेज: ८+१२८ जीबी

• मूल्य: रु. १८,९९९/- स्टोरेज: ८+२५६ जीबी

• कलर: स्टोन ग्रे र जेड ग्रिन

पछिल्लो अध्यावधिक: चैत १०, २०८१ २०:१५

काठमाडौं । धेरै मानिसहरू नयाँ नयाँ प्रविधि प्रयोग गर्छन्, र अहिले एआईको क्षेत्रमा नयाँ र चाखलाग्दा प्रविधिहरू आइरहेका छन् । यस्तैमा डिज्नीका एक कर्मचारीले पनि आफ्नो कामलाई सजिलो बनाउन एउटा एआई टुल डाउनलोड गर्दा डरलाग्दो ह्याकिङको शिकार भएको घटना द वालस्ट्रिट जर्नलले बाहिर ल्याएको छ ।

म्याथ्यु भान एन्डल नामका ती कर्मचारी एआईमा रुचि राख्थे र आफ्नो काममा यसको प्रयोग कसरी गर्न सकिन्छ भन्ने बारे जान्न चाहन्थे । यो ह्याक माइक्रोसफ्टको स्वामित्वमा रहेको वेबसाइट गिटहबमा भएको थियो, जुन सफ्टवेयर डेभलपरहरू माझ निकै लोकप्रिय छ । ह्याकरले एउटा एआई टुलका लागि एक प्लग-ईन बनाएको थियो । जसले कम्फीयूआई (ComfyUI) नामक एआई टुल तयार पार्न सजिलो बनाउँथ्यो । यो प्लग-इनले काम पनि गरिरहेको थियो र धेरैले यसलाई प्रयोग पनि गरिरहेका थिए ।

तर, यो एउटा ‘ट्रोजन हर्स’ थियो – देख्दा एउटा, तर वास्तवमा हानिकारक सफ्टवेयर । म्याथ्युले उक्त प्लग-इन आफ्नो निजी कम्प्युटरमा डाउनलोड गरेपछि ह्याकरले उनको वनपासवर्ड (एउटा पासवर्ड म्यानेजर) क्याश र अन्य व्यक्तिगत जानकारीमा पहुँच पायो । जसले यो ह्याक निम्त्यायो ।

गत जुलाईमा म्याथ्युलाई एक अज्ञात व्यक्तिबाट सन्देश आयो । जसमा उनले अघिल्लो दिन खाएको खाजाको बारेमा विस्तृत विवरणहरू उल्लेख गरिएका थिए । यो जानकारी सार्वजनिक थिएन, त्यसैले म्याथ्युलाई शङ्का लाग्यो । त्यसपछि उनले केही महिनादेखि आफ्ना क्रेडिट कार्ड र अनलाइन अकाउन्टमा भएका वित्तीय ठगीका घटनाहरू सम्झिए र आफू ह्याक भएको हुन सक्ने आशङ्का गरे ।

म्याथ्युको लागि यो एउटा डरलाग्दो अनुभव थियो । उनी प्रविधिमा सक्रिय थिए र उनका सयौँ अनलाइ अकाउन्टहरू थिए । ह्याकरले उनको पहिचान चोरेको मात्र थिएन, बरु उनको कामको स्ल्याक अकाउन्ट लग इन गरेर त्यहाँबाट डेटा समेत डाउनलोड गरेको थियो । साथै उनको डिजिटल जीवन नै इन्टरनेटमा सार्वजनिक गरी दिएको थियो । ह्याकरले वनपासवर्डमा पहुँच पाएको थियो, जहाँ उनले आफ्ना सबै संवेदनशील जानकारीहरू सुरक्षित राखेका थिए । म्याथ्युले आफ्नो वनपासवर्ड अकाउन्टमा टु-फ्याक्टर अथेन्टिकेसन सक्रिय नरहेको थाहा पाए । वनपासवर्डका प्रवक्ताले बताएअनुसार एक पटक कसैको कम्प्युटरमा किलगइन ट्रोजन प्रोग्राम भएपछि ह्याकरले लगभग अनरेस्ट्रिक्टेड (अप्रतिबन्धित) एक्सेस पाउन सक्छ ।

ह्याकरले डिज्नीको स्ल्याकमा पहुँच बनाएर त्यहाँबाट एक टेराबाइट स्ल्याक मेसेज डाउनलोड गर्‍यो । यसमा थिम पार्क र स्ट्रिमिङ आम्दानी, ग्राहक र कर्मचारीहरूको निजी जानकारी समेत समावेश थियो । यस्तो जानकारी सार्वजनिक हुनु डिज्नीको लागि लाजमर्दो कुरा थियो ।

ह्याक भएको एक महिनापछि डिज्नीले अनुसन्धान गरिरहेको र यसले आफ्नो कार्य सञ्चालनमा खासै असर नपर्ने बताएको थियो । डिज्नीले ह्याकपछि स्ल्याक छोड्ने योजना बनाएको थियो । पछि, डिज्नीले म्याथ्युको ल्यापटपको फरेन्सिक जाँच गर्दा उनले काम गर्ने उपकरणमा आपत्तिजनक वेबसाइटहरू (अश्लील वेबसाइटहरू) पहुँच गरेको दाबी गर्‍यो । तर म्याथ्युले अस्वीकार गरे । कम्पनीले उनलाई बर्खास्त गर्‍यो ।

साइबर सुरक्षा विशेषज्ञहरूका अनुसार ह्याकिङबाट पूर्ण रूपमा सुरक्षित रहन गाह्रो छ । ह्याकरहरू सधैँ हाम्रो कम्प्युटरमा पहुँच पाउने तरिका खोजिरहेका हुन्छन् । साइबर सुरक्षा एउटा यस्तो समस्या हो, जहाँ ह्याकरहरू धेरै पटक असफल भए पनि एक पटक सफल भएमा हामीलाई ठुलो क्षति पुर्‍याउन सक्छन् । यद्यपि, केही आधारभूत सुरक्षा उपायहरू अपनाएर आफूलाई ह्याकरहरूको निशाना जोगाउन सकिन्छ ।

एफबीआईले महत्त्वपूर्ण अकाउन्टहरूमा लग इन गर्दा ‘रिमेम्बर मि । अर किप ट्रयाक अफ हु आईएम’ वा त्यस्तै प्रकारका विकल्पहरूमा क्लिक नगर्न सल्लाह दिएको छ । यसो गर्दा कम्प्युटरमा एउटा फाइल बन्छ, जसले ह्याकरहरूलाई सजिलै लग इन गर्न दिन्छ । यसका साथै, आफ्ना महत्त्वपूर्ण खाताहरूलाई टु-फ्याक्टर अथेन्टिकेसनमार्फत सुरक्षित गर्नुपर्छ । टेक्स्ट मेसेजको सट्‍टा फोनमा आधारित अथेन्टिकेटर जस्ता सफ्टवेयर प्रयोग गर्न विज्ञहरूले सुझाव दिएका छन् । उच्च जोखिम भएका व्यक्तिहरूले आफ्नो बैंकिङ लगायतका संवेदनशील कार्यहरूका लागि छुट्‍टै, सुरक्षित कम्प्युटर प्रयोग गर्न सक्छन् । जसमा कुनै प्लग-इनहरू डाउनलोड नगरिएको होस् । साइबर सुरक्षामा सावधानी अपनाएर यस्ता दु:खद घटनाहरूबाट बच्न सकिन्छ ।

पछिल्लो अध्यावधिक: चैत १०, २०८१ १९:२२