काठमाडौं । माइक्रोसफ्टले राष्ट्रिय आविष्कार केन्द्रसँग सहकार्य गर्दै ‘एआई स्किल फेस्ट नेपाल’ आयोजना गर्ने भएको छ । एआई सम्बन्धी सीप अभिवृद्धिका लागि आगामी ८ अप्रिलमा एक दिने कार्यक्रम आयोजना गरिनेछ ।
राष्ट्रिय आविष्कार केन्द्र, पोखराका निर्देशक इन्द्र ओलीका अनुसार यो कार्यक्रम भौतिक रूपमा काठमाडौं, पोखरा र दाङमा सञ्चालन हुनेछ । यसअघि नै यी सहर निश्चित भए पनि कार्यक्रम कहाँ हुन्छ भन्ने तय भइसकेको थिएन । अहिले भने तीनै सहरका ठाउँहरू निश्चित भएका छन् ।
उनका अनुसार पोखरामा यो कार्यक्रम पोखरा इभेन्ट सेन्टर, श्रीकृष्ण मार्गमा हुनेछ । त्यस्तै दाङमा राप्ती टेक्निकल कलेज र काठमाडौंमा सनवे कलेजमा कार्यक्रम हुने तय भएको छ ।
यो कार्यक्रम काठमाडौं, पोखरा र दाङमा भौतिक रूपमा सञ्चालन हुनेछ । पोखरा इभेन्ट सेन्टर, राप्ती टेक्निकल कलेज (दाङ) र सनवे कलेज (काठमाडौं) लाई स्थानका रूपमा तय गरिएको छ ।
पोखरामा ५००, काठमाडौंमा ३०० र दाङमा २०० गरी कूल एक हजार जनालाई यस कार्यक्रममा सहभागी बनाउने केन्द्रको लक्ष्य छ । इच्छुक व्यक्तिले यहाँ क्लिक गरेर फारम भरी भौतिक रूपमा सहभागी हुन सक्नेछन् ।
भौतिक कार्यक्रममा सहभागीहरूले एआईका आधारभूत पक्ष, भविष्य, प्रयोगका विधि र व्यवहारिक उपयोगबारे सिक्न पाउनेछन् । साथै, ५० दिनसम्म अनलाइन सेसन सञ्चालन गरिनेछ, जसमा भौतिक रूपमा उपस्थित नभएकाहरू पनि सहभागी हुन सक्नेछन् ।
राष्ट्रिय आविष्कार केन्द्रका अध्यक्ष महावीर पुनका अनुसार माइक्रोसफ्टसँग सहकार्य गरी यो कार्यक्रम नेपालमा सञ्चालन गर्न इन्जिनियर हरिकृष्ण न्यौपानेले महत्त्वपूर्ण भूमिका खेलेका छन् । उनी हाल माइक्रोसफ्ट बेलायतमा प्रिन्सिपल सफ्टवेयर इन्जिनियरका रूपमा कार्यरत छन् ।
पछिल्लो अध्यावधिक: चैत ९, २०८१ १५:१७
सामाग्री श्रोत :
टेक पाना
