काठमाडौं- नेपाल दृष्टि विशेषज्ञ संघ र नेपाल नेत्र सहायक परिवारले स्वास्थ्य तथा जनसंख्या मन्त्रालयलाई पत्राचार गरी आँखा स्वास्थ्यसँग सम्बन्धित नेत्र सहायक र आप्टोमेट्रिस्टको थप दरबन्दी सिर्जना गर्न माग गरेका छन्।
मन्त्रालयका सचिवलाई सम्बोधन गरिएको पत्रमा हाल सरकारी अस्पतालहरूमा १५ शैय्याको अस्पतालमा नेत्र सहायक र ५० शैय्याको अस्पतालमा आप्टोमेट्रिस्ट अधिकृतको दरबन्दी रहने व्यवस्था भए पनि मन्त्रालयले तयार पारेको नयाँ प्रस्तावमा थप दरबन्दी नहुँदा आँखा स्वास्थ्य सेवामा गम्भीर असर परेको उल्लेख छ।
संघका अध्यक्ष निरज देव जोशी र परिवारका महासचिव रमेश प्रधानद्वारा हस्ताक्षरित संयुक्त पत्रमा नेपाल स्वास्थ्य व्यवसायी परिषद्मा २,५०० नेत्र सहायक, १,७०० आप्टोमेट्रिस्ट (ए लेभल) र २५० विशेषज्ञ (स्पेसलिस्ट लेभल) दर्ता रहेको जनाइएको छ। प्रत्येक वर्ष २०० भन्दा बढी आप्टोमेट्रिस्ट थपिने र त्रिभुवन विश्वविद्यालय, NAMS लगायतका विश्वविद्यालयहरूले यो विषयमा अध्यापन गराउँदै आएको तथ्य प्रस्तुत गरिएको छ।
उनीहरुले विगतमा पटक-पटक पत्राचार र विभिन्न कार्यक्रममार्फत दरबन्दी सिर्जनाको माग राख्दै आएको तर हालसम्म कुनै प्रगति नभएकोमा दुख व्यक्त गरेको छ। पत्रमा भनिएको छ, ‘हाम्रो जायज माग नेपाल सरकार र स्वास्थ्य मन्त्रालयले पूरा गर्नेछ भन्नेमा हामी विश्वस्त छौं। अन्यथा, पेशागत हितका लागि चरणबद्ध आन्दोलनमा उत्रनुपर्ने बाध्यता हुनेछ।’
नेपाल दृष्टि विशेषज्ञ संघ र नेपाल नेत्र सहायक परिवारले आँखा स्वास्थ्य सेवालाई सुदृढ बनाउन र दक्ष जनशक्तिको उपयोग गर्न मन्त्रालयले तत्काल कदम चाल्नुपर्नेमा जोड दिएका छन्।
सामाग्री श्रोत :
swasthyakhabar
