काठमाडौं – नेपाल आयुर्वेद चिकित्सा परिषदमा आयुर्वेद चिकित्सकहरूले अनिश्चितकालीन तालाबन्दी गरेका छन्। सरकारले परिषदमा नयाँ कार्यसमिति गठन नगरेको भन्दै आयुर्वेद चिकित्सकहरुले तालाबन्दी गरेका हुन्।
नयाँ कार्यसमिति गठन नहुँदा देशभरका आयुर्वेद चिकित्सकहरू आक्रोशित बनेका छन्। परिषद्को कार्यसमितिको कार्यकाल गत २०८१ चैत १२ मा सकिएयता दुई महिनाभन्दा बढी समय बितिसक्दा पनि नयाँ समिति गठन नहुँदा परिषद्को कामकाज ठप्प भएको छ। यसको प्रत्यक्ष असर नयाँ चिकित्सकहरूको दर्ता प्रक्रियामा परेको छ।
आयुर्वेद चिकित्सा परिषद् ऐन २०४५ अनुसार नेपाल सरकारले परिषद्को कार्यसमिति गठन गर्नुपर्ने प्रावधान छ। तर, हालसम्म समिति गठनमा ढिलाइ हुँदा ६८ जना बीएएमएस लाइसेन्सिंग परीक्षा उत्तीर्ण चिकित्सक र ११ जना स्नातकोत्तर (एमडी) पूरा गरेका चिकित्सकले परिषद्मा दर्ता गराउन पाएका छैनन्। यसले उनीहरूको रोजगारी र कानूनी प्रक्रियामा गम्भीर अवरोध उत्पन्न गरेको छ।
परिषद्को कामकाज ठप्प भएपछि आयुर्वेद चिकित्सकहरूले अनिश्चितकालीन तालाबन्दी गरेका उनीहरुद्वारा जारी विज्ञप्तिमा उल्लेख छ।
यसैगरी, स्वतन्त्र विद्यार्थी युनियन, आयुर्वेद क्याम्पसले पनि आन्दोलनकारी चिकित्सकहरूसँग ऐक्यबद्धता जनाउँदै सरकारसँग तत्काल नयाँ कार्यसमिति गठन गर्न माग गरेको छ।
सामाग्री श्रोत :
swasthyakhabar
