टिम युरोपले गरिब राष्ट्रहरूलाई दुई सय मिलियन डोज कोरोनाविरुद्ध खोप दिने घोषणा गरेको छ ।
इटालीको रोममा भएको विश्व स्वास्थ्य सम्मेलनमा युरोपियन आयोग (इयू) की अध्यक्ष वोन डेर लेयेनले अविकसित र विकासोन्मुख देशका लागि २ सय मिलियन डोज २०२१ को अन्त्यसम्ममा उपलब्ध गराउने घोषणा गरेका हुन् ।
कोभ्याक्ससँगको समन्वयमा ‘टिम युरोप’ले गरिब राष्ट्रहरूलाई खोप दिन लागेको हो । इयूका सदस्य राष्ट्रलगायत युरोपियन डेभलपमेन्ट बैंकहरू मिलेर टिम युरोप बनाइएको हो ।
अध्यक्ष वोनले भनेकी छन्, ‘टिम युरोपले विश्वलाई कोभिडसँग लड्न उत्तरदायी भूमिका खेल्नेछ । कोभिडसँग लड्ने खोेप नै एकमात्र उपाय हो । त्यसैले विश्वव्यापी रूपमा खोपको पहुँच सुनिश्चित गर्न आवश्यक छ ।
२०२१ को अन्त्यसम्ममा हामी निम्न र मध्यम आय भएका देशहरूमा कोभिड-१९ विरुद्धको २ सय मिलियन डोज खोप उपलब्ध गराउँछौँ ।’
कोभ्याक्समार्फत् १ सय ३६ देशले १ सय २२ मिलियन डोज खोप पाइसकेका छन् ।
कोभ्याक्ससँगै टिम युरोपले पनि खोपको पहुँच र उत्पादन वृद्धि गर्न यो पहल सुरु गरेको हो । उसको पहलले अफ्रिकामा स्थानीय खोप उत्पादनका लागि उपयुक्त शर्तहरू निर्माण पनि गर्नेछ ।
समर्थन प्राप्त युरोपियन संघको बजेट र युरोपियन विकास वित्तीय संस्थाबाट एक अर्ब डलर लगानी गरी खोपको पहुँच सुनिश्चित गरिएको विज्ञप्तिमा उल्लेख छ ।
अध्यक्ष वोनले उक्त जी-२० सम्मेलनले विश्व स्वास्थ्य नीतिमा नौलो अध्यायको सुरुवात भएको घोषणा गरेकी छिन् । कोभ्याक्समार्फत् इयूले नेपालमा हालसम्म ३ लाख ४८ हजार डोज खोप ७ मार्चमा उपलब्ध गराइसकेको छ ।
नेपालले कति मात्रा खोप पाउँछ भन्ने उल्लेख गरिएको छैन ।
