काठमाडौं- निर्वाह भत्ता लगायतका विषयमा आवासीय चिकित्सकले गरिरहेको आन्दोलन स्थगित भएको छ। स्वास्थ्य मन्त्रालयसँगको सहमति पछि आन्दोलन स्थगित गरिएको नेपाल मेडिकल एशोसिएसनका अध्यक्ष डा सञ्जीव तिवारीले जानकारी दिए।
स्वास्थ्य मन्त्रालय र एशोसिएसनबीच ४ बुँदे सहमति भएको हो। मन्त्रालयका तर्फबाट डा भीमप्रसाद सापकोटा र एशोसिएसनका तर्फबाट डा तिवारीले हस्ताक्षर गरेका छन्।
यस्तो छ सहमति :
निजी मेडिकल कलेज तथा प्रतिष्ठानमा MD/MS/MDS अध्ययनरत आवासीय चिकित्सकहरुको निर्वाह भत्ता लगायतका विषयहरु उठाई नेपाल मेडिकल एसोसिएसनले राखेको मागप्रति स्वास्थ्य तथा जनसङ्ख्या मन्त्रालयको गम्भीर ध्यानाकर्षण भएको छ । देशको स्वास्थ्य सेवा प्रणालीमा चिकित्सक र स्वास्थ्यकर्मीले पुऱ्याएको योगदानको स्मरण गर्दै एसोसिएसनले राखेका मागप्रति संवेदनशील र मागको समुचित संवोधनका लागि स्वास्थ्य तथा जनसंख्या मन्त्रालय निरन्तर क्रियाशील रहेको जानकारी गराउदछौं । यसै सन्दर्भमा आज मिति २०८२ वैशाख २० गते स्वास्थ्य तथा जनसङख्या मन्त्रीज्यूको अग्रसरता एवं उपस्थितिमा नेपाल मेडिकल एसोसिएसनका अध्यक्ष डा. अनिल विक्रम कार्कीज्यू तथा अन्य प्रतिनिधिहरुज्यू सहित बैठक बसी निम्नानुसार सहमति गरिएको छ।
१) चिकित्सा शिक्षा आयोगको मिति २०८१ माघ २५ गते बसेको १६औं बैठकको निर्णय बमोजिम सम्पूर्ण निजी मेडिकल कलेजहरूका चिकित्सा शिक्षा स्नातकोत्तर तहको कार्यक्रममा अध्ययन गर्ने सम्पूर्ण आवासीय चिकित्सकहरुलाई (हाल अध्ययनरत एवं अव अध्ययन गर्न आउने) सार्वजनिक शिक्षण संस्थामा स्नातकोत्तर तहका शैक्षिक शैक्षिक कार्यक्रममा अध्ययन गर्ने आवासीय चिकित्सकहरुलाई दिए सरह (स्वास्थ्य सेवाको आठौं तह निर्वाह भत्ता तत्काल उपलब्ध गराउन सम्बधित सरोकारवाला निकायलाई निर्देशन गर्ने।
२) आवासीय चिकित्सकहरुको बिदा, ड्युटी आवर अतिरिक्त सुविधा लगायतका बिषयमा स्वास्थ्य तथा जनसंख्या मन्त्रालयले कार्यदल गठन गरी १५ कार्य दिन भित्र प्रतिवेदन पेश गर्ने ।
३) चिकित्सा शिक्षा आयोगको १८औं बैठकको निर्णय बमोजिम आयोगले सबै विद्यार्थीहरुले एकीकृत रुपमा म्याचिङ् तथा भर्ना हुन पाउने गरि व्यवस्था मिलाउन मन्त्रालयले सम्बधित सरोकारवाला निकायसँग समन्वय गर्ने ।
४) नेपाल मेडिकल एसोसिएसनले गरिरहेको सबै प्रकारका आन्दोलनका कार्यक्रमहरु आजको मितिबाट अन्त्य गर्ने र सम्पूर्ण चिकित्सकहरु नियमित सेवा प्रवाहको कार्यमा फर्किने ।
सामाग्री श्रोत :
swasthyakhabar
