काठमाडौँ । फेसबुक मेसेन्जर प्रयोगकर्ताका केही च्याटहरूमा ‘This chat will be archived soon’ (यो च्याट छिट्टै अर्काइभ गरिनेछ) भन्ने एउटा नयाँ नोटिफिकेसन देखिन थालेको छ । यो नोटिफिकेसनले मेसेन्जरले सुरक्षा अपग्रेड गरिरहेको र अब एन्ड-टु-एन्ड इन्क्रिप्टेड (End-to-End Encrypted – E2EE) च्याटहरू मात्र सक्रिय रहने भनेर बताउँछ । धेरै प्रयोगकर्ताहरूले आफ्ना वर्षौँ पुरानो च्याटहरू (हिस्ट्री) हराउने चिन्ता व्यक्त गरेका छन् ।
किन देखिँदैछ यस्तो नोटिफिकेसन ?
यो समस्या तब देखा पर्छ, जब तपाईँ र तपाईँले च्याट गरिरहनुभएको व्यक्तिबिच पहिले नै एउटा छुट्टै एन्ड-टु-एन्ड-इन्क्रिप्टेड च्याट वा ‘सिक्रेट कन्भर्सेसन’ (गोप्य कुराकानी) सुरु गरिएको थियो । केही वर्षअघि ‘सिक्रेट कन्भर्सेसन’ सुविधा हुँदा झुक्किएर यस्ता च्याटहरू बनेको हुन सक्छन् ।
मेसेन्जर सबै च्याटहरूलाई डिफल्ट (पूर्व निर्धारित) रूपमा एन्ड-टु-एन्ड-इन्क्रिप्टेड बनाउने प्रक्रियामा रहेको छ । यदि तपाईँ र तपाईँको कुनै साथीबिच पहिलेदेखि नै एन्ड-टु-एन्ड-इन्क्रिप्टेड च्याट (सिक्रेट कन्भर्सेसन) छ भने, सिस्टमले त्यसैलाई मुख्य च्याट बनाउन खोज्छ । यस अवस्थामा, तपाईँको नियमित, पहिले प्रयोग गरिरहनु भएको (एन्ड-टु-एन्ड-इन्क्रिप्टेड बाहेकको) च्याटलाई सङ्ग्रह (Archive) गरिनेछ ।
च्याट अर्काइभ भए के हुन्छ ?
च्याट अर्काइभ गरिनु भनेको च्याट डिलिट गरिनु होइन । अर्काइभ गरिएका च्याटहरू तपाईँको मेसेन्जरको ‘Archived Chats’ फोल्डरमा रहनेछन् । तपाईँले ती च्याटहरू कुनै पनि बेला हेर्न सक्नुहुन्छ ।
यद्यपि, अर्काइभ गरिएका च्याटहरूमा मेसेज खोज्ने (Search) सुविधाले काम नगर्न सक्छ वा फरक तरिकाले काम गर्न सक्छ भन्ने चिन्ता प्रयोगकर्ताहरूले व्यक्त गरिरहेका छन् । केही प्रयोगकर्ताहरूले डेस्कटपमा खोज्न मिल्ने तर मोबाइलमा नमिल्ने बताएका छन् । साथै, च्याट एन्ड-टु-एन्ड-इन्क्रिप्टेडमा अपग्रेड भएपछि पहिले पठाइएका मेसेजहरूमा रिप्लाई वा रियाक्ट गर्न नमिल्ने हुन सक्छ।
अब के गर्ने ?
मेसेन्जर कर्मचारीहरू र अन्य प्रयोगकर्ताहरूले पुष्टि गरेअनुसार, यो समस्या समाधान गर्ने तरिका भनेको तपाईँ र तपाईंको साथी दुवैले पहिले तयार गरेको त्यो छुट्टै एन्ड-टु-एन्ड-इन्क्रिप्टेड वा सिक्रेट कन्भर्सेसन च्याटलाई डिलिट गर्नु हो ।
-
यसका लागि आफ्नो च्याट लिस्टमा गएर त्यो छुट्टै ‘सिक्रेट कन्भर्सेसन’ खोज्नुहोस् ।यहाँनिर सर्च बार प्रयोग गर्न पनि सक्नुहुन्छ।
-
यदि त्यो च्याट फेला पार्न सक्नुभएन वा कुन हो भन्ने यकिन भएन भने, देखिएको ‘This chat will be archived soon’ नोटिससँगै रहेको ‘Switch to other chat’ बटनमा क्लिक गर्नुहोस् । यसले तपाईँलाई सिधै समस्या आएको एन्ड-टु-एन्ड-इन्क्रिप्टेड च्याटमा लैजान्छ ।
-
च्याटमा पुगेपछि, त्यसलाई डिलिट गर्नुहोस् । यो डिलिट गर्दा ‘This will delete your entire conversation with [सम्बन्धित साथी], not just recent end-to-end encrypted messages’ भन्ने चेतावनी दिन्छ । अर्थात् यसले भर्खरका एन्ड-टु-एन्ड इन्क्रिप्टेड मेसेजहरू मात्र नभएर सम्बन्धित साथीसँगको तपाईँको सम्पूर्ण कुराकानी डिलिट गर्ने भन्ने अर्थ लाग्छ । नडराउनुहोस्, यसले तपाईँले डिलिट गरिरहनुभएको त्यो सिक्रेट च्याटलाई मात्र डिलिट गर्छ, तपाईँको मुख्य (नियमित) च्याटलाई डिलिट गर्दैन ।
-
यो प्रक्रिया तपाईँ र तपाईँले च्याट गरिरहनुभएको व्यक्ति दुवैले अपनाउनु पर्छ ।
-
साथै, यो डिलिट गर्ने प्रक्रिया तपाईँहरू दुवैले प्रयोग गर्ने सबै डिभाइसहरूमा (फोन, ट्याब्लेट, कम्प्युटर ब्राउजर/एप) गर्नुपर्ने हुनसक्छ ।
डिलिट गरेपछि के हुन्छ ?
दुवै पक्षले छुट्टै रूपमा रहेको सिक्रेट च्याट डिलिट गरिसकेपछि, तपाईँको नियमित च्याटमा देखिएको ‘This chat will be archived soon’ सूचना हट्नेछ । त्यसपछि केही घण्टा (प्रायः १२ घण्टा वा १-२ दिन) भित्रै तपाईँको नियमित च्याट स्वचालित रूपमा एन्ड-टु-एन्ड इन्क्रिप्टेडमा अपग्रेड हुनेछ । जब च्याट अपग्रेड हुन्छ, तपाईँले च्याटमा ‘Messenger upgraded the security of this chat. New messages and calls are secured with end-to-end encryption’ भन्ने सन्देश देख्नु हुनेछ।
यसरी, त्यो छुट्टै सेक्रेट च्याट डिलिट गरेर तपाईँले आफ्नो पुरानो, नियमित च्याट हिस्ट्रीलाई अर्काइभ हुनबाट जोगाउन सक्नुहुन्छ र त्यसलाई एन्ड-टु-एन्ड-इन्क्रिप्सनमा अपग्रेड गराउन सक्नुहुन्छ । यद्यपि, केही प्रयोगकर्ताहरूले अपग्रेडपछि पुराना मेसेजहरूमा रिप्लाई वा रियाक्ट गर्न नमिल्ने जस्ता केही परिवर्तन देखिएको बताएका छन् ।
पछिल्लो अध्यावधिक: बैशाख १८, २०८२ १०:२९
सामाग्री श्रोत :
टेक पाना
