काठमाडौं । नेपाल सरकारले थाइल्यान्डस्थित एसियन इन्स्टिच्युट अफ टेक्नोलोजी (एआईटी)लाई सहयोग गर्ने समाचार सुनेपछि राष्ट्रिय आविष्कार केन्द्रका अध्यक्ष महावीर पुन रोएको भन्दै सामाजिक सञ्जालमा भ्रामक भिडिओ भाइरल गराइएको छ ।
गत सोमबार मन्त्रिपरिषद् बैठकले प्रधानमन्त्री केपी शर्मा ओलीको भ्रमणका क्रममा थाइल्यान्डस्थित एसियन इन्स्टिच्युट अफ टेक्नोलोजी (एआईटी) लाई एक लाख डलर (करिब एक करोड ३७ लाख रुपैयाँ) सहयोग उपलब्ध गराउने निर्णय गरेको थियो । उक्त निर्णयपछि महावीर पुन रोएको भन्दै पुरानो भिडिओ भाइरल बनाइएको हो ।
भिडिओ भाइरल भएपछि अध्यक्ष पुनले आफू सरकारले पैसा नदिएका कारण कहिल्यै नरोएको भन्दै यस्तो समाचार झुटो भएको बताएका छन् । “फेसबुकमा यो फोटो भएको भिडिओ एकदमै झुटो हो । म सरकारले पैसा दिएन भनेर कहिल्यै रोएको छैन । मैले पसिना पुछ्न लाग्दाको फोटो हो । यो भिडिओ बनाउने ऐकल यात्रीलाई यस्तो काल्पनिक कुरा नलेख्न अनुरोध छ । एक पटकलाई माफ दिएको छु । फेरि लेख्यो भने सबैले उसलाई ब्लक गरिदिनु होला,” उनले फेसबुकमा लेखेका छन् ।
कसरी फैलियो भ्रामक भिडिओ ?
पुनले आपत्ति जनाउँदै सार्वजनिक गरेको तस्बिर ‘ऐकल यात्रि’ नामको फेसबुक पेजले सार्वजनिक गरेको भिडिओको हो । बुधबार बिहान ७:५३ मा सार्वजनिक उक्त भिडिओमा यो सामग्री तयार पार्दासम्म २६ लाख भ्युज, ३९ हजार लाइक र २२ सय बढी कमेन्ट छ । हेर्नुहोस् भिडिओ र आर्काइभ लिङ्क ।
उक्त भिडिओमा समाचार ‘अर्थ सरोकार’ मिडियाबाट लिइएको देखिन्छ । जहाँ थाइल्यान्डस्थित एसियन इन्स्टिच्युट अफ टेक्नोलोजीलाई नेपाल सरकारले सहयोग गर्न लागेको समाचार पढिएको छ । हेर्नुहोस् ‘अर्थ सरोकार’को ओरिजिनल समाचार ।
तर ‘ऐकल यात्रि’ नामको फेसबुक पेजले अर्थ सरोकारको समाचारमा महावीर पुनको भिडिओ राखेर भ्रम फैलाएको छ । जहाँ पुनले गलामा लगाएको खादाले आँखासँगै अनुहार पुछिरहेको देखिन्छ । अर्कातर्फ भिडिओमा प्रधानमन्त्री ओली पत्नी राधिका शाक्यसँगै थाइल्यान्ड भ्रमणमा प्रस्थान गरेको तस्बिर राखिएको छ। भिडिओमै लेखिएको छ- “यो खबर सुनेपछि महावीर पुन भक्कानिएर रोए” ।
महावीर पुन र नेपाल सरकारको थाइल्यान्ड भ्रमणको विषय जोडेर बनाइएको भिडिओ खोज्दै जाने क्रममा चन्द्र खड्काको नामको फेसबुक पेजको एउटा भिडिओ भेटियो । जसमा, बुधबार साँझ ६:४३ मा महावीर पुनले मुख पुछ्दै गरेको भिडिओ राखिएको छ । भिडिओमा उनले सरकारले महावीर पुनलाई सहयोग नगरेको भन्दै गुनासो पोखेका छन् ।
उक्त भिडिओको स्ट्याटसमा लेखेका छन्, “प्रधानमन्त्रीज्यूले थाइल्याण्डको एउटा विश्वविद्यालयलाई १ लाख अमेरिकी डलर सहयोग गर्ने घोषणा गर्नुभएको छ । तर आफ्नै देशमा महावीर पुन जस्ता राष्ट्रसेवीहरू आफ्नो जीवनी बेचेर राष्ट्रिय आविष्कार केन्द्रका लागि कोष सङ्कलन गर्न सङ्घर्षरत छन् । यो हाम्रो व्यवस्थाको कस्तो विडम्बना हो ?” हेर्नुहोस् भिडिओ ।
खड्काले सार्वजनिक गरेको भिडिओमा महावीर पुनको अनुहार पुछेको क्लिप त छ नै साथै उनले ‘एलो हर्बल’ नामको कम्पनीमा किताब बेचिरहेको समेत देख्न सकिन्छ ।
र महावीर पुनले आत्मकथा ‘सम्झना, सपना र अविरल यात्रा’ बेच्न विराटनगर पुग्दाको भिडिओलाई अहिलेको भिडिओ भन्दै भ्रम फैलाएको पाइयो । एलो हर्बलको फेसबुक पेजमा महावीर पुनलाई कम्पनीमा स्वागत गरिएको भन्दै २८ मार्चमा राखिएको भिडिओसमेत राखिएको छ । हेरौँ २८ मार्चमा कम्पनीले सार्वजनिक गरेको भिडिओ ।
यस विषयमा थप बुझ्न टेकपानाले विराटनगरमा रहेको ‘एलो हर्बल’ का सञ्चालक रोशन घिमिरेसँग कुराकानी गरेको थियो । उनले महावीर पुन २८ मार्चमा किताब बेच्ने सिलसिलामा विराटनगर पुग्दा आफ्नो कम्पनीमा बोलाएको सुनाए । “उहाँ किताब बेच्न विराटनगर आउनु भएको थियो । तर महानगरपालिकाले सहयोग नगरेको देखेपछि राष्ट्रको गहनालाई सहयोग गर्नुपर्छ भनेर बोलाएका थियौँ । हामीले साढे २७ हजारको किताब पनि किन्यौँ । त्यही कार्यक्रममा उहाँले पसिना पुछिरहेको भिडिओ अहिले गलत अर्थ लगाउँदै भाइरल बनाइएको रहेछ ।”
पछिल्लो अध्यावधिक: चैत २१, २०८१ १५:४७
सामाग्री श्रोत :
टेक पाना
