वीरगञ्ज- मधेश प्रदेशका अस्पताल र स्थानीय तह अन्तर्गतका अस्पतालमा आकस्मिक बाहेकका सेवा ठप्प परिएको छ। उक्त अस्पतालमा कार्यरत चिकित्सक तथा स्वास्थ्यकर्मीले ६ महिनादेखि तलब नपाएपछि आन्दोलन गर्न बाध्य भएको नेपाल चिकित्सक संघका उपाध्यक्ष तथा मधेस प्रदेश संयोजक डा निरजकुमार सिंहले बताए। उनले चेतावनीस्वरुप दुई दिनका लागि आकस्मिक बाहेकका सेवा बन्द गर्ने बताएका छन्। उनले भने, ‘संघले यसअघि नै ७२ घन्टा भित्र स्वास्थ्यकर्मीले ६ महिनादेखि तलब नपाएको विषयलाई सम्बोधन गर्न अनुरोध गरेको थियो। तर, सम्बोधन भएन। केन्द्र सरकारलाई दोष लगाएर पन्छिने काम भयो।’आफूले मुख्यमन्त्री सिंहसँग यसबारेमा कुरा गरेको बताए। प्रदेश सरकारले केन्द्रसँग समन्वय नै नगरेको पाइएको बताएँदै आफ्नो मागलाई समेत सरकारले त्यसलाई गम्भीरतापूर्वक नलिएको उल्लेख गरे। उनले थपे, ‘नेपाल चिकित्सक संघ मधेस प्रदेशद्वारा मधेस प्रदेशको श्रीमान मुख्यमन्त्रीज्यूलाई ध्यानाकर्षण पत्र २०८१ चैत १७ गते दिइएको जसमा मधेस प्रदेशको स्थानीय तह अन्तर्गत अस्पतालहरूमा खटाइएको चिकित्सक तथा स्वास्थ्यकर्मीहरूको तलब भुक्तानी नभएको विषयप्रति मधेश प्रदेश सरकारलाई ७२ घण्टाको अल्टिमेटम दिएको थियो,तर कुनै पहल भएन।’ मधेस प्रदेश सरकारले गम्भीरतापूर्वक नलिएको हुँदा मधेश प्रदेशस्थित सम्पूर्ण स्वास्थ्य संस्थाहरूमा आकस्मिक सेवा बाहेकका चिकित्सकीय सेवाहरू मिति २०८१ चैत्र २१ र २२ गतेका दिन बन्द रहने बताउँदै थप आन्दोलनका कार्यक्रमहरू २०८१ चैत २२ गते घोषणा गरिने बताइएको छ। मधेशमा रहेका संघीय अस्पताल नारायणी र गजेन्द्र नारायणसिंह अस्पतालबाहेक सबैमा ओपीडी ठप्प रहेको उनले जानकारी दिए।
सामाग्री श्रोत :
swasthyakhabar
