काठमाडौं । नेपाल क्लियरिङ हाउस लिमिटेड (एनसीएचएल) ले औपचारिक रूपमा एनपीएस नेसनल कार्ड स्विच र डोमेस्टिक कार्ड स्किम (नेपाल पे कार्ड) सार्वजनिक गरेको छ । सोमबार राजधानीमा आयोजित एक कार्यक्रममा नेपाल राष्ट्र बैंकका गभर्नर महाप्रसाद अधिकारीले यो प्रविधिको उद्घाटन गरे ।
‘नेपालको आफ्नै कार्ड’ भन्ने नाराका साथ एनसीएचएलले नेपाल पेमेन्ट कार्ड सुरु गरेको हो । सुरुवाती चरणमा सिटिजन्स बैंक, गुडविल फाइनान्स लिमिटेड, हिमालयन बैंक, माछापुच्छ्रे बैंक, मुक्तिनाथ विकास बैंक, एनएमबि बैंक, प्रभु बैंक, सांग्रिला डेभलपमेन्ट बैंक र सिद्धार्थ बैंकबाट नेपाल पे कार्ड जारी हुने कम्पनीले जनाएको छ ।
यो डोमेस्टिक कार्ड स्किमअन्तर्गत डेबिट, क्रेडिट, प्रिपेड, भर्चुअल जस्ता विभिन्न प्रकारका कार्डहरू क्रमिक रूपमा उपलब्ध हुने बताइएको छ । यस प्रणालीको महत्त्वपूर्ण पक्ष भनेको यसअन्तर्गत हुने कारोबारको डेटा स्थानीय स्तरमै नियन्त्रण हुनेछ । भविष्यमा यस कार्डलाई अन्तर्राष्ट्रिय स्तरमा पनि प्रयोग गर्न मिल्नेगरी काम भइरहेको एनसीएचएलले जनाएको छ ।
कार्यक्रममा हिमालयन बैंकले गभर्नर अधिकारीलाई पहिलो नेपाल पे कार्ड जारी गरेको थियो भने माछापुच्छ्रे बैंकमा पहिलो पीओएस कारोबार भएको थियो ।
सो अवसरमा बोल्दै गभर्नर अधिकारीले “नेपाल पेमेन्ट कार्डले आर्थिक स्वायत्ततामा महत्त्वपूर्ण योगदान गर्नेछ । भिसा र मास्टरकार्डजस्ता अन्तर्राष्ट्रिय प्रदायकमार्फत भुक्तानी गर्दा अतिरिक्त लागत लाग्थ्यो, तर अब नेपालमै कार्ड सञ्चालन हुँदा सो खर्च बचत हुनेछ,” उनले भने ।
नेपाल आफ्नै भुक्तानी प्रणाली विकास गर्ने राष्ट्र बैंकको रणनीति अनुसार यो परियोजना कार्यान्वयनमा ल्याइएको हो । विभिन्न चरणको छलफल र स्वीकृतिपछि राष्ट्र बैंकले एचसीएचललाई यसको कार्यान्वयनको जिम्मेवारी दिएको थियो । यसअन्तर्गत आवश्यक पूर्वाधार तयारी पूरा भइसकेको र अब बैंक तथा वित्तीय संस्थाहरूको स्विच इन्टिग्रेट गर्ने कार्य अघि बढ्ने बताइएको छ ।
एनसीएचएलले यस प्रणालीको पूर्ण व्यावसायिक सञ्चालन र स्वीकार्यताका लागि बैंक, वित्तीय संस्था तथा भुक्तानी सेवा प्रदायकहरूसँग सहकार्य गर्ने जनाएको छ ।
पछिल्लो अध्यावधिक: चैत १८, २०८१ १८:३२
सामाग्री श्रोत :
टेक पाना
