साइप्रस मा झिगु नेवा समाज गठन, पाँच क्षेत्रमा संरचना विस्तार

साइप्रसमा रहेका नेवारी समुदायको पहलमा “झिगु नेवा समाज, साइप्रस” (Jhigu Newa Samaj Cyprus) औपचारिक रूपमा गठन गरिएको छ। निकोसियामा फेब्रुअरी ८ तारिख आइतबार आयोजित एक कार्यक्रममा रोजगारी तथा उच्च शिक्षाका लागि साइप्रसमा बसोबास गर्दै आएका नेवारी समुदाय तथा नेवारी संस्कृतिप्रति आस्था राख्ने व्यक्तिहरूको उपस्थितिमा संस्था गठन गरिएको हो।

साइप्रसमा रहेका नेवा (नेवार) समुदायलाई एकताबद्ध गर्ने, नेवारी भाषा, संस्कृति, कला तथा परम्परागत चाडपर्व (इन्द्रजात्रा, म्हः पूजा, यःमरी पुन्हि आदि) को संरक्षण तथा प्रवर्द्धन गर्ने उद्देश्यका साथ संस्था गठन गरिएको हो। साथै साइप्रस सामाजिक तथा सांस्कृतिक कार्यक्रम सञ्चालन गर्ने, आपतकालीन अवस्थामा सदस्यहरूलाई सहयोग गर्ने तथा स्थानीय निकाय, नेपाली नियोग र नेपाली संघसंस्थासँग सहकार्य गर्दै अघि बढ्ने उद्देश्य लिएको जनाएको छ।

संस्थाको प्रमुखमा लक्ष्मी श्रेष्ठ र उपप्रमुखमा मित्रलाल श्रेष्ठ चयन भएका छन् । नवगठित संस्थाले आफूलाई गैर–राजनीतिक तथा गैर–नाफामूलक सामाजिक संगठनको रूपमा अघि बढाउने जनाएको छ।

संस्थालाई व्यवस्थित, प्रतिनिधिमूलक र दिगो रूपमा अगाडि बढाउने उद्देश्यले समुदायलाई पाँच क्षेत्रमा विभाजन गरिएको छ। लिमासोल, निकोसिया, पापोस, पारालिम्नी–आयिया नापा र लार्नाका गरी पाँच क्षेत्र निर्धारण गर्दै प्रत्येक क्षेत्रबाट समिति, सहसमिति र कार्यसमिति सदस्य चयन गरिएको जनाइएको छ।