काठमाडौं । १७ चैत, २०८१ (३० मार्च २०२५), आइतबारका दिन सामाजिक सञ्जाल फेसबुकमा पत्रकार सुरेश रजकको आगलागीमा पर्नु अघि गोली लागेर मृत्यु भएको भन्ने दाबी सहितका पोस्टहरू भाइरल भइरहेका छन् । पोस्टमार्टम रिपोर्टमा गोली लागेको देखिएको भन्दै ठकुरी बिरेन, नेपाली न्युज, रोहन रावत, र सन्तोष पराजुली लगायतका फेसबुक पेजहरूले यस्ता पोस्ट गरेका छन् । तर, टेकपाना फ्याक्ट चेकका क्रममा यो दाबी गलत भएको देखिएको छ ।
दाबी
३० मार्च २०२५ दिउसो १ बजेपछि सामाजिक सञ्जाल फेसबुकमा एउटा पोस्ट भाइरल भइरहेको छ । उक्त पोस्टमा लेखिएको छ, “चैत्र १५ गते मारिएका पत्रकार सुरेश रजकको पोस्टमार्टम रिपोर्टमा उनको शरीरमा गोली भेटिएको छ भन्ने कुरो आएको छ !” नेपाली न्युज नामक फेसबुक पेजले सबैभन्दा पहिले लेखेको थियो, “चैत्र १५ गते मारिएका पत्रकार सुरेश रजकको पोस्टमार्टम रिपोर्टमा उनको शरीरमा गोलि भेटिएको छ ।” पछि यसलाई सच्याएर पछाडि थपेको छ, “छ भन्ने कुरो आएको छ ! सत्य के होला ?”
यो सामग्री तयार पार्दासम्म पुरानो पोस्टमा ६०० बढी रियाक्सन आएका थिए । सम्पादन गरिएको पोस्टमा झन्डै दुई हजार बढी रियाक्सन आएका छन् । यसरी पोस्ट राखेको झन्डै दुई घण्टामा २६०० बढी रियाक्सन, ३१२ बढी कमेन्ट र ५३२ बढी शेयर आएको छ । यसैलाई पछ्याउँदै अन्य फेसबुक पेजमा पनि त्यही आशयका पोस्ट राखिएका छन् ।
यसको आधिकारिकता पुष्टि नगरी नेपाली न्युज (ओरिजिनल लिङ्क र अर्काइभ लिङ्क), कमल थापा (ओरिजिनल लिङ्क र अर्काइभ लिङ्क) रोहन रावत (ओरिजिनल लिङ्क र अर्काइभ लिङ्क), प्रकाश मिश्र (ओरिजिनल लिङ्क र अर्काइभ लिङ्क), सन्तोष पराजुली (ओरिजिनल लिङ्क र अर्काइभ लिङ्क) लगायतका फेसबुक पेज र अकाउन्टले उही दाबी सहितका पोस्ट राखेका छन् ।
तथ्य जाँच
सामाजिक सञ्जालमा रजकको पोस्टमार्टम सम्बन्धी पोस्ट फेला पारेपछि हामीले मूलधारका विभिन्न सञ्चारमाध्यममा रजकको विषयमा तयार पारिएका समाचार खोज्यौँ । तर, उनको पोस्टमार्टम भएको जानकारी उल्लेख गरिएका कुनै पनि समाचार आएको फेला परेनन् । मृतक रजक एभिन्युज टेलिभिजनमा कार्यरत थिए । त्यसैले हामीले पत्रकार महासङ्घको एभिन्युज शाखाकी अध्यक्ष सुस्मिता बानियाँलाई सम्पर्क गर्यौँ ।
“शव त्रिवि शिक्षण अस्पतालमा छ । अहिलेसम्म पोस्टमार्टम भइसकेको छैन,” बानियाँले भनिन्, “परिवारले विभिन्न माग राखेको छ । त्यो माग पुरा भयो भने मात्र शव पोस्टमार्टम गर्ने परिवारको अडान छ । सामाजिक सञ्जालमा आएको जस्तो पोस्टमार्टम भएर रिपोर्ट आइसकेको भन्ने दाबी झुटो नै हो ।”
पछिल्लो समय बानियाँले नै रजकका विषयमा समाचार र अन्य पक्ष हेरिरहेकी छिन् । “परिवारको पक्षबाट जे कुरा भयो, सबैभन्दा पहिले हामीलाई नै थाहा हुन्छ,” उनले अगाडि भनिन्, “हामीलाई त्यस्तो जानकारी आएको छैन । त्यो एकदम झुटो हो ।”
यस विषयमा थप जानकारी लिन हामीले नेपाल प्रहरीका प्रवक्ता प्रहरी नायब महानिरीक्षक दिनेशकुमार आचार्यलाई सम्पर्क गर्यौँ । उनले पनि हालसम्म मृतक रजकको पोस्टमार्टम नभएको र यस्तो अवस्थामा रिपोर्ट नै आयो भन्ने जानकारी झुटो भएको बताए ।
हामीले त्रिवि शिक्षण अस्पतालको वेबसाइटमा आधिकारिक विज्ञप्ति पनि हेर्यौँ । तर, रजकको विषयमा अस्पतालले कुनै विज्ञप्ति वा सूचना जारी गरेको छैन । अस्पतालसँग सम्पर्कको प्रयास भने सफल हुन सकेन ।
दाबी
२८ मार्च २०२५, शुक्रबारका दिन राजधानीको तीनकुनेमा राजावादीले गरेको प्रदर्शनका क्रममा नजिकैको एक घरमा आगजनी हुँदा ज्यान गुमाएका फोटो जर्नलिस्ट सुरेश रजकको पोस्टमार्टम रिपोर्टमा प्रहरीको गोली लागेको भेटियो ।
दाबीकर्ता
नेपाल न्युज, रोहन रावत, प्रकाश मिश्र, सन्तोष पराजुली लगायतका फेसबुक पेज तथा अकाउन्ट ।
तथ्य
रजकको शवको पोस्टमार्टम गरी रिपोर्टमा गोली लागेको भन्ने दाबी झुटो हो । हालसम्म शव पोस्टमार्टम नै भएको छैन ।
निष्कर्ष
नेपाल न्युज, रोहन रावत, प्रकाश मिश्र र सन्तोष पराजुली लगायतका फेसबुक पेज तथा अकाउन्टले दाबी गरेजस्तो मृतक रजकको शवको पोस्टमार्टम भएको छैन । पोस्टमार्टम नै नभई त्यसको रिपोर्टमा गोली लागेको भन्ने देखिने कुरा झन् सम्भव नै छैन । उनको शव त्रिवि शिक्षण अस्पतालको शव गृहमा राखिएको छ । पोस्टमार्टम गर्नुअघि परिवारले सरकारसँग रजकलाई सहिद घोषणा गर्नेदेखि क्षतिपूर्ति दिनुपर्ने सम्मका माग राखेका छन् । सामाजिक सञ्जालमा दाबी गरिएजस्तो रजकको पोस्टमार्टम रिपोर्ट आइसकेको छैन ।
प्रतिक्रिया
तपाईंले हाम्रो वेबसाइट सामाजिक सञ्जालका ह्यान्डल (फेसबुक, इन्स्टाग्राम, टिकटक, एक्स, युट्युब, लिङ्क्डइन) वा info@techpana .com मा तथ्य जाँच गर्नुपर्ने सामाजिक सञ्जालका पोस्ट पठाउन सक्नु हुनेछ । तथ्य जाँचलाई लिएर कुनै प्रतिक्रिया वा सुझाव भए हामीलाई ईमेल पठाउनु होला ।
पछिल्लो अध्यावधिक: चैत १७, २०८१ १८:२१
सामाग्री श्रोत :
टेक पाना
