काठमाडौं । नेपाल प्रहरीले प्राविधिक प्रहरी समूह तर्फ १०४ जनाका लागि नयाँ भर्ना खुलाएको छ । प्राविधिक समूह अन्तर्गतका विभिन्न उपसमूहतर्फ रिक्त प्राविधिक प्रहरी निरीक्षक, प्रहरी नायब निरीक्षक र प्रहरी सहायक निरीक्षक पदमा प्रहरीले दरखास्त आह्वान गरेको हो ।
खुला प्रतियोगिताद्वारा समावेशी प्रावधान बमोजिम उल्लिखित पदहरूमा पदपूर्ति गरिने जनाइएको छ। इन्जिनियरिङतर्फ प्राविधिक प्रहरी निरीक्षक पदका लागि ११ जना र प्राविधिक प्रहरी सहायक निरीक्षक पदका लागि ४५ जना माग गरिएको हो ।
यसैगरी स्वास्थ्यतर्फ प्राविधिक प्रहरी निरीक्षक पदका लागि २२ जना, प्राविधिक प्रहरी नायब निरीक्षक पदका लागि १५ जना र प्राविधिक प्रहरी सहायक निरीक्षक पदका लागि ८ जना, केनाइनतर्फ प्राविधिक प्रहरी निरीक्षक पदका लागि १ जना र प्राविधिक प्रहरी सहायक निरीक्षक पदका लागि १ जना तथा हातहतियारतर्फ प्राविधिक प्रहरी निरीक्षक पदका लागि १ जनाको नयाँ भर्ना आह्वान गरिएको छ । इच्छुक उम्मेदवारहरूले नेपाल प्रहरीको अनलाइन रिक्रुटमेन्ट म्यानेजमेन्ट सिस्टम (ORMS) मार्फत अनलाइन दरखास्त दिन सक्नेछन् । यसका लागि नेपाल प्रहरीको वेबसाइट को करियर भित्र रहेको अनलाइन एप्लिकेसनमा गएर वा यहाँ क्लिक गरेर फाराम भर्न सकिनेछ ।
इन्जिनियरिङतर्फ दरखास्त दिने उम्मेदवारहरूले नेपाल प्रहरी प्रधान कार्यालय सञ्चार निर्देशनालय, सूचना प्रविधि निर्देशनालय र भौतिक पूर्वाधार निर्देशनालयमा अनलाइन दरखास्त फारम भर्न सक्नेछन् । यसैगरी स्वास्थ्यतर्फ नेपाल प्रहरी अस्पताल महाराजगन्ज, केनाइनतर्फ नेपाल प्रहरी केनाइन कार्यालय सामाखुसी र हातहतियारतर्फ नेपाल प्रहरी प्रधान कार्यालय हातहतियार मर्मत शाखामा अनलाइन दरखास्त फारम भर्न सकिने उल्लेख छ ।
यसका साथै सातै प्रदेश प्रहरी कार्यालयहरूमा अनलाइन दरखास्त सङ्कलन तथा दर्ता गर्न सकिने छ । नयाँ भर्ना हुन इच्छुक नागरिकहरूले यही १८ चैतदेखि १६ वैशाख २०८२ सम्म अनलाइन प्रणालीमार्फत कार्यालय समयभित्र दरखास्त फारम बुझाउन सक्नेछन् ।दरखास्त आह्वान सम्बन्धी विस्तृत विवरण सहितको सूचना तथा सम्बन्धित पदको पाठ्यक्रम नेपाल प्रहरीको वेबसाइटमा राखिएको छ ।
पछिल्लो अध्यावधिक: चैत १७, २०८१ १०:४
सामाग्री श्रोत :
टेक पाना
