काठमाडौं । वैद्य इनर्जी प्रालिले नेपाली बजारमा एथर ईभीको २०२५ संस्करण सार्वजनिक गरेको हो । शनिबार एक कार्यक्रम गर्दै कम्पनीले ‘४५०एक्स’ र ‘४५०एस’ मोडेलका इलेक्ट्रिक स्कुटर सार्वजनिक गरेको हो ।
‘बाइक्स अफ स्कुटर’ उपनाम दिइएको एथर ४५०एक्स बहु-मोड ट्र्याक्सन कन्ट्रोलसहित उपलब्ध हुने कम्पनीले जनाएको छ । यो सुविधाले स्कुटरलाई थप सुरक्षित, प्रभावकारी र सुविधाजनक बनाउने कम्पनीको दाबी छ ।
“बहु-मोड ट्र्याक्सन कन्ट्रोल प्रणालीले पक्की वा चिप्लो सडकमा स्कुटरको पछिल्लो पांग्रालाई अगाडिको पांग्रासँग तालमेल मिलाउन मद्दत गर्छ । यसले स्कुटरलाई थप स्थिरता र नियन्त्रण प्रदान गर्छ,” कम्पनीले जारी गरेको विज्ञप्तिमा भनिएको छ ।
यस सुविधाले सहरको ट्राफिकदेखि अफ-रोड यात्रासम्म आत्मविश्वासका साथ सवारी गर्न सहयोग गर्ने कम्पनीको भनाइ छ । ट्याक्सन कन्ट्रोलका तीन मोडहरू उपलब्ध छन्- रेन मोड, रोड मोड र र्याली मोड ।
स्कुटरको दायरा सुधार गर्न यसमा नयाँ टायर प्रविधि प्रयोग गरिएको छ । एथरले एमआरएफसँग सहकार्य गरी नयाँ मल्टि-कम्पाउन्ड टायरहरू विकास गरेको छ । यसअनुसार ब्रेक लगाउँदा ऊर्जा क्षति कम गर्ने र ऊर्जा खपतलाई अनुकूल बनाउने कम्पनीले उल्लेख गरेको छ ।
एथरले नयाँ एथर स्ट्याक ६ सफ्टवेयर पनि ल्याएको छ । यसले गुगल म्याप्स इन्टीग्रेसन, अलेक्सा भ्वाइस असिस्टेन्ट सपोर्ट, ह्वाट्सएप नोटिफिकेसन ड्यासबोर्ड, ‘पिङ माई स्कुटर’ सुविधा र लाइभ लोकेसन शेयरिङ जस्ता सुविधा प्रदान गर्छ ।
वैद्य इनर्जी प्रा.लि.का सीईओ सुर्यांश वैद्यले भने, “नेपालमा एथर स्कुटरहरू पछिल्ला डेढ वर्षदेखि ग्राहकले अत्यधिक रुचाएका छन् । अब, हामी २०२५ एथर ४५० लाई बहु-मोड ट्याक्सन कन्ट्रोलसहित प्रस्तुत गर्दैछौं । यसले सुरक्षासँगै प्रदर्शन पनि बढाउनेछ । प्रिमियम मोटरसाइकलहरूमा मात्र पाइने यस्ता विशेषता अब हाम्रो स्मार्ट स्कुटरमा उपलब्ध छन् ।”
एथर ४५०एसको मूल्य तीन लाख २४ हजार ९९९ रुपैयाँ रहेको छ ।
त्यसैगरी ४५०एक्स (२.९ किलोवाट)को मूल्य तीन लाख ६४ हजार ९९९ (१०५ किलोमिटर रेन्ज) र ४५०एक्स (३.७ किलोवाट)को मूल्य तीन लाख ९९ हजार ९९९ रुपैयाँ (१३० किलोमिटर रेन्ज) तोकिएको छ ।
कम्पनीले ८ वर्ष वा ८० हजार किलोमिटरसम्मको ब्याट्री वारेन्टी र ७० प्रतिशत ब्याट्री स्वास्थ्य प्रत्याभूति योजना पनि ल्याएको छ ।
वैद्य इनर्जी प्रा.लि.ले एथर रिज्टाको बुकिङ पनि खुला गरेको छ ।
एथर इनर्जी लिमिटेड सन् २०१३ मा स्थापना भएको इलेक्ट्रिक वाहन निर्माता कम्पनी हो । यसले सन् २०१८ मा एथर ४५०, २०२० मा एथर ४५०एक्स, २०२३ मा ४५०एस र ४५०एक्सका नयाँ संस्करणहरू र २०२४ मा पारिवारिक स्कुटर एथर रिज्टा लन्च गरेको थियो ।
पछिल्लो अध्यावधिक: चैत १६, २०८१ २३:५०
सामाग्री श्रोत :
टेक पाना
