काठमाडौं । शुक्रबार राजधानीको तीनकुनेमा भएको राजावादी आन्दोलनमा एक व्यक्तिले पेस्तोल बोकेको भिडिओ सामाजिक सञ्जालमा भाइरल भइरहेको छ । भिडिओ भाइरल भएपछि ती व्यक्तिको पहिचानलाई लिएर धेरैले आशङ्का व्यक्त गरेका छन् ।
कतिले राजावादी भएको लख काटे भने कतिले सरकारले पठाएको अड्कलबाजी गरे । यसैबिच भाइरल भिडिओमा देखिएका व्यक्ति लागुऔषध नियन्त्रण ब्युरोका अधिकारी भएको खुलेको छ ।
केन्द्रीय अनुसन्धान ब्युरोका एक उच्च अधिकारीले पेस्तोल बोक्ने व्यक्ति प्रहरी अधिकारी भएको पुष्टि गरे । विभिन्न सञ्चार माध्यमहरूले पनि बेनामी प्रहरी स्रोतको भनाइ राख्दै ती बन्दुक बोक्ने ती व्यक्ति साधा पोसाकका प्रहरी भएको समाचार लेखेका छन् ।
नेपाल प्रेसले राखेको उक्त भाइरल भिडिओमा केही युवा हातमा लठ्ठी बोकेको देखिन्छन् भने एकजनाले पेस्तोल तेर्साइरहेको देखिन्छन् । भिडिओमा अगाडिपट्टि प्रदर्शनकारी ढुङ्गामुढा ल्याएर आइरहेका देखिन्छन् । “सिभिलको केटा हुन् के यिनीहरू,” भिडिओमा एक व्यक्ति भन्छन्, “पुलिसलाई लखेटिरहेका रहेछन् ।”
भिडिओमा सरकारी नम्बर प्लेटको गाडी तोडफोड भएको देखिन्छ । “पुलिस पो रहेछन् तिनीहरू मैले बल्ल पो बुझें,” भिडिओमा एक युवक भन्छन्, “यो मान्छेसँग बन्दुक कहाँबाट आयो भनेको ।” पछि प्रदर्शनकारी सादा पोसाकका प्रहरीतर्फ खनिन्छन् ।
पछिल्लो अध्यावधिक: चैत १६, २०८१ १५:३
सामाग्री श्रोत :
टेक पाना
