भक्तपुर- शहीद धर्मभक्त राष्ट्रिय प्रत्यारोपण केन्द्रले २०८२ असार महिनामा ३० जनाको मिर्गौला प्रत्यारोपण शत प्रतिशत सफलताका साथ सम्पन्न गरेको जानकारी सार्वजनिक गरेको छ।
केन्द्रले प्रेस विज्ञप्ति जारी गर्दै नयाँ इतिहास कायम गरेको दाबी पनि गरेको छ। ‘संसार भरी नै यति धेरै संख्यामा मिर्गौला प्रत्यारोपण बिरलै हुने गरेको छ,’ विज्ञप्तिमा भनिएको छ।
आर्थिक वर्ष २०८१/८२ मा मात्र केन्द्रले १८६ जनाको मिर्गौला र ८ जनाको कलेजो प्रत्यारोपण सफलतापूर्वक सम्पन्न गरेको छ। सोही आर्थिक वर्षमा केन्द्रको अगुवाइमा प्रादेशिक अस्पताल सुर्खेतमा ३, पोखरामा ३ र भेरी अस्पतालमा २ जनाको मिर्गौला प्रत्यारोपण पनि गरिएको थियो। यसका साथै, सोही आर्थिक वर्षमा एक जना मस्तिष्क मृत व्यक्तिबाट प्राप्त एउटा मिर्गौला र कलेजो एकै व्यक्तिमा सफलतापूर्वक प्रत्यारोपण गरिएको थियो।
केन्द्रमा मिर्गौला प्रत्यारोपण गरिएका बिरामीहरूको उमेर १४ देखि ७१ वर्षसम्म रहेको छ। जसमध्ये, १५५ जना (झन्डै ८० प्रतिशत) ग्रहणकर्ताहरूको उमेर २० देखि ४९ वर्ष समूहका थिए।
मिर्गौला ग्रहणकर्तामध्ये १३६ जना पुरुष (करिब ७३ प्रतिशत) र ५० जना महिला (करिब २७ प्रतिशत) रहेका छन्। यस्तै, अंगदाताहरूमा १३० जना महिला (७० प्रतिशत) र ५५ जना पुरुष (३० प्रतिशत) रहेका छन्। यसले अंग प्रत्यारोपणमा लैङ्गिक भेदभाव सुधारोन्मुख देखिए पनि अझै पनि असमानता रहेको देखाउँछ।
देशका सातवटै प्रदेशबाट केन्द्रमा उपचारका लागि आएका बिरामीहरूमध्ये बागमती प्रदेशबाट सबैभन्दा धेरै ३२ प्रतिशत, कोशी प्रदेशबाट २७ प्रतिशत, गण्डकी प्रदेशबाट १३ प्रतिशत, लुम्बिनी प्रदेशबाट ११ प्रतिशत, मधेश प्रदेशबाट १० प्रतिशत, कर्णाली प्रदेशबाट ५ प्रतिशत र सुदूरपश्चिम प्रदेशबाट २ प्रतिशत बिरामीहरू रहेका थिए।
केन्द्रमा देशका विभिन्न भू-भागबाट सबै जातजातिहरू प्रत्यारोपणका लागि आउने गरेका छन्। आदिवासी जनजातिहरू ५२ प्रतिशत, ब्राम्हण क्षेत्री २६ प्रतिशत, मधेशी ११ प्रतिशत, दलित ९ प्रतिशत र मुस्लिम २ प्रतिशतले प्रत्यारोपण गराएका छन्।
मिर्गौला तथा कलेजो प्रत्यारोपण शल्यचिकित्सक डा पुकार चन्द्र श्रेष्ठको नेतृत्वमा केन्द्र स्थापनाको १३ वर्ष अवधिमा हालसम्म १४७१ जनाको मिर्गौला र ३४ जनाको कलेजो प्रत्यारोपण भइसकेको छ।
नेपाल सरकारको सातवटै प्रदेशमा मिर्गौला प्रत्यारोपण सेवा विस्तार गर्ने योजना अनुसार, स्वास्थ्य तथा जनसंख्या मन्त्रालय अन्तर्गतको यस केन्द्रले हालसम्म चारवटा प्रदेश (बागमती, गण्डकी, कर्णाली, लुम्बिनी) मा प्रत्यारोपण सेवा सुरु गरिसकेको छ। बाँकी तीनवटा प्रदेशमा पनि निकट भविष्यमा प्रत्यारोपण सेवा सुरु गर्ने योजना बनाएको छ।
सामाग्री श्रोत :
swasthyakhabar
