काठमाडौं । गुगल डिपमाइन्डका अनुसन्धानकर्ताले मान्छे जस्तै देखिने साना रोबोटहरू बनाएका छन् । ‘रोबोटिस ओपी थ्री’ (Robotis OP3) नामक यी रोबोटले कुद्न, बल प्रहार गर्न, लडेपछि आफैं उठ्न र खेलको रणनीति बुझ्न सिकेका छन् ।
गुगलले सार्वजनिक गरेको भिडिओमा रोबोटहरु एक-अर्काविरुद्ध फुटबल खेलेको देखिन्छ । डिपमाइन्डका अनुसन्धानकर्ताका अनुसार रोबोटहरूले फुटबलका नियमहरू सिक्नुका साथै बलको दिशा अनुमान गर्न, विपक्षीको आक्रमण रोक्न र खेलको प्रवाह बुझ्न सक्ने क्षमता राख्छन् ।
रोबोटले फुटबल खेल्नेबाहेक ओरिगामी बनाउने, खाना प्याक गर्ने र अन्य कामहरू कुशलतापूर्वक गर्ने डिपमाइन्डको रिसर्च पेपरमा उल्लेख छ । यदि कुनै वस्तु समाउन खोज्दा चिप्लियो भने रोबोटले तुरुन्तै समायोजन गरेर पुनः समाउन सक्ने बताइएको छ ।
‘जेमिनाई रोबोटिक्स’ नामक नयाँ एआई मोडेलले रोबोटलाई यस्ता कामहरू गर्न सिकाएको हो । यो मोडेलले रोबोटहरूलाई वातावरणअनुसार विभिन्न प्रकारका कामहरू गर्न सक्षम बनाउने कम्पनीको दाबी छ । कम्पनीका अनुसार एक वर्ष पहिले नै तयार पारिएको यस प्रविधि हाल एप्ट्रोनिकको ह्युमनाइड रोबोट ‘अपोलो’ मा परीक्षण भइरहेको छ ।
भविष्यमा यस्ता रोबोटहरूले घरायसी कामदेखि उद्योग र सेवा क्षेत्रमा समेत महत्त्वपूर्ण योगदान दिने विश्लेषण भइरहँदा केही चिन्ताहरू पनि सँगै उठेका छन् । रोबोटलाई हाम्रो वातावरणअनुसार बनाउने कि हाम्रो वातावरणलाई रोबोटका लागि सहज बनाउने भन्ने बहस चलेको छ ।
अहिलेका सफल औद्योगिक रोबोटहरू मानवजस्तो नभई विशेष कामको लागि बनाइएका हुन् । विज्ञहरूका अनुसार हाल विकास भएका रोबोटहरू सुस्त र कोमल वस्तुहरू सम्हाल्न कठिनाइ हुने खालका छन् । मानवसहितको वातावरणमा सहज बनाउन अझै चुनौतीपूर्ण हुन सक्ने उनीहरुको विश्लेषण छ ।
पछिल्लो अध्यावधिक: चैत १४, २०८१ ११:३६
सामाग्री श्रोत :
टेक पाना
