काठमाडौं । गुगलले एन्ड्रोइड प्रयोगकर्तालाई आर्टिफिसियल इन्टेलिजेन्स (एआई) सेवा ‘जेम्स’ निःशुल्क उपलब्ध गराउने भएको छ । योसँगै प्रयोगकर्ताले आफ्नो आवश्यकता अनुसार कस्टम एआई असिस्टेन्ट तयार गर्न सक्ने भएका छन् ।
‘जेम्स’ एक व्यक्तिगत एआई असिस्टेन्ट हो, जसलाई प्रयोगकर्ताले आफ्नो आवश्यकता अनुसार बनाउन तथा प्रयोग गर्न सक्छन् । यसअघि गुगल वन एआई प्रिमियम सदस्यता लिएका प्रयोगकर्ताले मात्र यो सुविधा प्रयोग गर्न पाउँथे ।
ब्रेनस्टोर्मर, क्यारियर गाइड, कोडिङ पार्टनर, लर्निङ कोच र राइटिङ एडिटर गरी गुगलले पाँच ओटा जेम्स पहिल्यै उपलब्ध गराएको छ । त्योसँगै प्रयोगकर्ताले आवश्यकता अनुसार थप जेम्स बनाउन सक्छन् ।
प्रयोगकर्ताले ‘न्यु जेम’ बटन प्रयोग गरी आफ्नै कस्टम एआई असिस्टेन्ट बनाउन सक्ने कम्पनीले जनाएको छ । कम्पनीका अनुसार एन्ड्रोइडमा जेम्स प्रयोग गर्न सकिए पनि नयाँ जेम्स सिर्जना गर्न कम्प्युटरबाट gemini.google.com मा जानुपर्नेछ ।
यो सेवा ओपनएआईको कस्टम जीपीटी सेवासँग मिल्दोजुल्दो छ । ओपनएआईले च्याटजीपीटी प्लस सदस्यतासँग मासिक २० डलर लिएर यो सुविधा दिँदै आएको छ ।
गुगलले भने यस्ता प्रिमियम सुविधाहरूलाई सर्वसाधारणका लागि निःशुल्क उपलब्ध गराउने रणनीति पछ्याएको देखिन्छ । योसँगै भविष्यमा जेमिनाई थप प्रभावकारी भएर बजारमा आउने विश्लेषण गरिएको छ ।
पछिल्लो अध्यावधिक: चैत १३, २०८१ २३:५४
सामाग्री श्रोत :
टेक पाना
