काठमाडौं । विश्व बैंकले नेपालमा डिजिटल रुपान्तरणलाई तीव्र बनाउन दूरसञ्चार ऐन समयानुकूल परिमार्जन गर्नुपर्ने सुझाव दिएको छ । हालै सार्वजनिक ‘नेपाल राष्ट्रगत आर्थिक परिदृश्य : नेपालमा आर्थिक वृद्धिको सम्भावना उजागर’ प्रतिवेदनमा विश्व बैंकले डिजिटल क्षेत्रको वृद्धि र प्रभावकारिता बढाउन कानुनी तथा नीतिगत सुधारमा जोड दिएको हो ।
विद्यमान दूरसञ्चार ऐनले यस क्षेत्रका पछिल्ला समस्या चुनौतीलाई स्पष्ट रूपमा सम्बोधन नगरेको भन्दै सरोकारवालाले अद्यावधिक गर्न जोड दिँदै आएका छन् । यही सन्दर्भमा विश्व बैंकले दूरसञ्चार ऐन परिमार्जन गर्नुका साथै डिजिटल रणनीति अवलम्बन र डिजिटल पूर्वाधारको विकासमा ध्यान दिनुपर्नेमा जोड दिएको छ ।
“नेपालको डिजिटल क्षेत्रमा तीव्र सुधार ल्याउन दूरसञ्चार ऐन परिमार्जन गर्नुका साथै डिजिटल रणनीति अवलम्बन र डिजिटल पूर्वाधारको विकासले यस क्षेत्रको विकासलाई विस्तार गर्नेछ,” प्रतिवेदनमा भनिएको छ ।
नेपालमा डिजिटल साक्षरताको कमी एक प्रमुख चुनौती रहेको भन्दै विश्व बैंकले विद्यालय पाठ्यक्रममा डिजिटल सीप समावेश गर्नुपर्ने र उमेर समूहका लागि र जनसांख्यिक विशेषताका आधारमा तालिम कार्यक्रम सञ्चालन गर्नुपर्ने सुझावसमेत दिएको छ ।
प्रतिवेदनले नेपालको समग्र आर्थिक वृद्धिलाई तीव्र बनाउन डिजिटलाइजेसन प्रमुख कारक बन्नसक्ने औंल्याएको छ ।
पछिल्लो अध्यावधिक: चैत १२, २०८१ १२:१
सामाग्री श्रोत :
टेक पाना
