काठमाडौं । एलन मस्कको स्याटलाइट इन्टरनेट सेवा स्टारलिंक पाकिस्तानमा पनि आउने भएको छ । पाकिस्तान सरकारले स्टारलिंकलाई इन्टरनेट सेवा उपलब्ध गराउने अनुमति दिएको हो ।
शुक्रबार एक विज्ञप्ति जारी गर्दै प्रधानमन्त्री शहबाज शरिफको निर्देशनमा स्टारलिंकलाई दर्ता अनुमति दिइएको पाकिस्तानका सूचना मन्त्री शहजा फातिमा ख्वाजाले बताएकी छिन् ।
विज्ञप्तिमा उल्लेख भए अनुसार स्टारलिंकलाई हाल अस्थायी नो अब्जेक्सन सर्टिफिकेट उपलब्ध गराइएको छ । अन्य दर्ता अनुमतिका प्रक्रियाहरू पुरा भएपछि पाकिस्तानमा पनि छिट्टै स्टारलिंकको इन्टरनेट उपलब्ध हुने विज्ञप्तिमा उल्लेख छ ।
विज्ञप्तिमा मन्त्री फातिमाले यो कदमले पाकिस्तानको डिजिटल रूपान्तरणका लागि मुख्य भूमिका खेल्ने विश्वास व्यक्त गरेकी छिन् । गत जनवरीमा एलन मस्कले एक्समा एक पोस्ट राख्दै पाकिस्तानमा स्टारलिंक इन्टरनेट उपलब्ध गराउने प्रक्रिया अगाडि बढेको जानकारी दिएका थिए ।
केही समय अगाडि मात्र भारत र भुटानले पनि स्टारलिंकलाई इन्टरनेट सेवाका लागि अनुमति दिइसकेका छन् ।
पछिल्लो अध्यावधिक: चैत १०, २०८१ १९:३
सामाग्री श्रोत :
टेक पाना
