काठमडौं । अमेरिकाको सिलिकन भ्यालीमा नेपालीले स्थापना गरेको साइबर सुरक्षा कम्पनी ‘सेक्युरिटीपाल’ (SecurityPal) ले दुई दिने ह्याकाथन (Nepal Hacks @ SecurityPal: AI Unleashed) कार्यक्रम गर्ने भएको छ । नेपाल एप्लाइड म्याथम्याटिक्स एन्ड इन्फर्मेटिक्स इन्स्टिच्युट (नामी)सँग सहकार्य गरेर सेक्युरिटीपालले साइबर सुरक्षा र भेन्डर रिस्क मेनेजमेन्ट सोलुसन सम्बन्धी ह्याकाथन आयोजना गर्न लागेको हो ।
यस कार्यक्रममा डेभलपर, साइबर सुरक्षा पारखी र प्रविधिमा रुचि राख्ने जोकोही सहभागी हुन सक्ने बताइएको छ । नामीसँगको यस सहकार्यले साइबर सुरक्षा र आर्टिफिसियल इन्टेलिजेन्स (एआई) मा गहिरो विशेषज्ञता ल्याउने कम्पनीको विश्वास छ ।
साथै यसले सहभागीलाई एआईको क्षेत्रमा मार्गदर्शन गर्ने, प्रोजेक्टको गुणस्तर बढाउने र विभिन्न प्रडक्ट बनाउन प्रेरित गर्ने विश्वास लिइएको छ ।
कार्यक्रम आवेदन दिनेहरूका लागि विशेष योग्यता र अनुभव तोकिएको छैन । तर, कूल आवेदकमध्येबाट ३० जना मात्र छनोट गरी ह्याकाथनमा सहभागी गराइने सेक्युरिटीपालले जनाएको छ ।
सहभागीले लार्ज ल्याङ्ग्वेज मोडल (LLM) को ज्ञान, नैतिक एआई, समराइजेसन, प्रश्नोत्तर प्रणाली र सेन्टिमेन्ट एनालिसिस जस्ता एआई क्षेत्रमा विशेषज्ञता हासिल गर्नेछन् । यसका साथै सहभागीले हगिङ फेस, टेन्सर फ्लो, डकर, फ्लास्क र स्ट्रिमलिट जस्ता एआई मोडेलसम्बन्धी सीप सिक्न पाउन सक्नेछन् ।
त्यसैगरी सहभागीले विभिन्न सिस्टमका कमजोरी फेला पार्ने, साइबर सुरक्षा अडिट गर्न र प्रभावकारी सेक्युरिटी नीति लागु गर्ने विषयमा ज्ञान पाउनेछन् ।
अन्तिम चरणमा पुगेका प्रतियोगीले विशेष मेन्टरशिप, ह्यान्ड्स-अन गाइडेन्स र प्रतिष्ठित निर्णायकको प्यानलमा आफ्ना प्रडक्ट प्रस्तुत गर्ने अवसर पाउनेछन् । यस कार्यक्रममा विजयी हुने सहभागीले एक लाख रुपैयाँ पुरस्कार, प्रमाणपत्र र अन्य अवसर पाउने कम्पनीले जनाएको छ ।
सेक्युरिटीपालले इच्छुक सहभागीहरूलाई ‘नेपाल ह्याक्स एट सेक्युरिटीपाल: एआई अनलिज्ड’मा सहभागी भई आफ्नो सीप, रचनात्मक क्षमता र नवप्रवर्तनप्रतिको जोश प्रदर्शन गर्न आह्वान गरेको छ ।
यहाँ क्लिक गरेर इच्छुक व्यक्तिले आवदेन दिन सक्नेछन् । यस कार्यक्रमबारे थप जानकारी पाउन यहाँ क्लिक गर्नुहोस् ।
पछिल्लो अध्यावधिक: चैत ९, २०८१ १५:५
सामाग्री श्रोत :
टेक पाना
