काठमाडौं- वर्षायामको सुरुवातसँगै बढ्दो बाढी, पहिरो र सम्भावित प्राकृतिक विपद्को जोखिमलाई ध्यानमा राख्दै तथा पछिल्लो समय रगतको अभावले सिर्जना गरेका स्वास्थ्य समस्याहरूको न्यूनीकरण गर्ने उद्देश्यले राष्ट्रिय श्रष्टा तथा प्रस्तोता प्रतिष्ठानको आयोजनामा रक्तदान कार्यक्रम सम्पन्न भएको छ।
कार्यक्रम राजधानीको अनामनगरस्थित सामाजिक विकास भवनमा सम्पन्न भयो। काठमाडौं महानगरपालिका, नेपाल रेडक्रस सोसाइटी, नेपाल प्रहरी, नेपाल फलफूल थोक व्यवसायी संघ, यसोदा ग्रुप अफ इन्डस्ट्रीज (करेन्ट नुड्ल्स), र माइलस्टोन इन्फ्रास्टक्चर इन्जिनियरिङ कन्सल्टेन्सीको सहकार्यमा आयोजित कार्यक्रममा सयौंको संख्यामा रक्तदाताहरूले रक्तदान गरेका थिए।
कार्यक्रममा दर्जनौं साङ्गीतिक तथा कलाकारिता क्षेत्रका संघ-संस्थाहरूको सहकार्य थियो। काठमाडौं उपत्यका प्रहरी प्रमुख तथा विशिष्ट गीतकार एआइजी टेक तामाङ, चलचित्र अभिनेता धिरेन शाक्य, गायक कुलेन्द्र विश्वकर्मा, संगीतकार नरहरी प्रेमी, गायक सिडी विजय अधिकारी, संगीतकर्मी कस्तुप पन्त, निर्देशक माधवराज खरेल, सञ्चारकर्मी सुमन पण्डित र सविता पोखरेल लगायत थुप्रै चर्चित श्रष्टाहरूले रक्तदानमा सहभागी भए।
कार्यक्रममा एयोशा ग्रुप अफ इन्डस्ट्रीजका अध्यक्ष तथा समाजसेवी चुन्ना पौडेल, एआइजी टेक तामाङ, प्रतिष्ठानका अध्यक्ष नारायण ब. थापा, वरिष्ठ उपाध्यक्ष दीपक शर्मा लगायतले रक्तदाताहरूलाई प्रमाणपत्र प्रदान गर्दै धन्यवाद व्यक्त गरे।
रक्तदान कार्यक्रमका संयोजक तथा प्रतिष्ठानका महासचिव सनम कठायतले स्वास्थ्य संवेदनशीलतालाई ध्यानमा राख्दै आगामी दिनमा पनि प्रतिष्ठान सामाजिक तथा रचनात्मक कार्यहरूमा सक्रिय रहने जानकारी दिए।
कार्यक्रममा वरिष्ठ संगीतकार चेतन सापकोटा, संगीतकार संघ नेपालका अध्यक्ष अष्ट लामा, रोयल्टी संकलन समाजका सचिव बसन्त सापकोटा, गीतकार शंकर अधिकारी ‘घायल’, म्युजिक भिडियो निर्देशक समाजकी अध्यक्ष बबिता श्रेष्ठ मलेकु, चलचित्र पत्रकार संघका महासचिव रघुनाथ सापकोटा, राप्ती समाजका अध्यक्ष गोविन्द मधुर आचार्य, पत्रकार तथा गीतकार डब्बु क्षेत्री, सल्लाहकारहरू रबिन्द्र बराल, रमेश दहाल, डा. ओमकृष्ण प्रसाईं र माधव राज खरेल लगायत विशिष्ट व्यक्तित्वहरूको उपस्थिति रहेको थियो।
सामाग्री श्रोत :
swasthyakhabar
