काठमाडौँ । ‘टेकपाना’ले आफ्नो वेबसाइटमा आर्टिफिसियल इन्टेलिजेन्स (एआई) टुल इन्टिग्रेट गरेको छ । पाठकलाई समाचार पढ्न र त्यससँग सम्बन्धित विषयमा जानकारी लिन सहज बनाउने उद्देश्यले यो फिचर थपिएको हो ।

नेपाली एआई कम्पनी ‘नेक्स्ट एआई’सँगको सहकार्यमा विकास गरिएको यो फिचर हाल टेकपानाको वेबसाइटमा उपलब्ध छ । एआई इन्टिग्रेट भएसँगै पाठकले यी विभिन्न एआई फिचर प्रयोग गरेर स्मार्ट तरिकाले प्रविधिसँग सम्बन्धित जानकारी लिन सक्नेछन् ।

एआई समरी (AI Summary)

अब पाठकले टेकपानाको वेबसाइटमा कुनै पनि समाचार खोल्दा स्क्रिनको दायाँतर्फ तलपट्टि ‘एआई समरी’ नामक हरियो बटन देखिन्छ । 

यसमा क्लिक गर्दा उक्त समाचारको सारांश बुँदागत रूपमा देख्न सक्नुहुन्छ ।

रिकमेन्डेड न्युज (Recommended News)

‘एआई समरी’ को ठिक तल रहेको दोस्रो बटनमा क्लिक गर्दा पाठकले पढिरहेको समाचारसँग सम्बन्धित अन्य समाचारहरू देखा पर्छन् । 

त्यहाँ दिएका हरेक समाचारको शीर्षकभन्दा ठिक तल ‘भ्यु आर्टिकल डिटेल्स’ (View Article Details) बटन रहेको छ । 

सो बटनमा क्लिक गरेपछि सिफारिस गरिएको समाचार किन सान्दर्भिक छ र अघिल्लो समाचारसँग त्यसको समानता र भिन्नता के-के छन् भन्ने कुरा बुँदागत रूपमा हेर्न सकिन्छ । यसले पाठकलाई विषयवस्तुमा थप स्पष्ट हुन मद्दत गर्नेछ ।

त्यसको तलपट्टि ‘रिड फुल आर्टिकल’ (Read Full Article) को बटन देख्न सक्नुहुन्छ । माथि उल्लेख भएको समाचार पढ्ने इच्छा भए उक्त बटनमा ट्याप गर्न सक्नुहुन्छ । 

त्यसभन्दा तलपट्टि ‘पिपुल अल्सो आस्क’ (People Also Ask) बटन राखिएको छ । उक्त बटनमा क्लिक गरिसकेपछि तपाईंले खोलेको पहिलो समाचार र एआईले सुझाव दिएको समाचारको विषयलाई लिएर तयार पारिएका प्रश्न र तिनको जवाफ देखिन्छ । 

यसले समाचारसँग सम्बन्धित विभिन्न प्रश्न र तिनका उत्तर देखाउँछ । यसबाट पाठकले समाचारमा उल्लेख गरिएका विषय स्पष्टसँग बुझ्न सक्नेछन् ।‍ 

यी एआई टुलको सहायताले पाठकले स्मार्ट तरिकाले प्रविधिसँग सम्बन्धित समाचार पढ्न र कुनै पनि विषयमा गहिरो जानकारी लिन सक्ने टेकपानाको विश्वास छ ।

पछिल्लो अध्यावधिक: साउन ४, २०८२ २०:३९

काठमाडौँ । गुगल म्याप्समा धरहराको नाम ‘सेतो टावर’ देखिएपछि शनिबारदेखि यस विषयले चर्चा पाइरहेको छ । काठमाडौँ महानगरपालिकाको प्रमुख पदको उम्मेदवार हुँदा वर्तमान प्रमुख बालेन्द्र शाह (बालेन)ले नवनिर्मित धरहरालाई ‘सेतो टावर’को उपनाम दिएका थिए ।

२०७२ सालको भूकम्पले भत्काएको पुरानो धरहराको छेउमा यो आधुनिक धरहरा निर्माण गरिएको हो । बालेनले नयाँ धरहराको विरोध गर्नुका पछाडि विभिन्न तर्क थिए । उनका अनुसार ‘धरहरा’ को शाब्दिक अर्थ ‘सबैभन्दा अग्लो’ भए पनि नयाँ धरहरा निर्माण हुँदा राजधानीमा त्योभन्दा अग्ला भवन बनिसकेका छन् । साथै नेपालका प्रथम प्रधानमन्त्री भीमसेन थापाले निर्माण गरेको मौलिक धरहराको पहिचान मासिएको भन्दै बालेनले धरहरालाई सेतो टावरको उपनाम दिएका थिए । 

त्यसपछि समय समयमा यो नाम चर्चामा आइरहने गर्छ। गुगल म्याप्समा पनि बारम्बार नाम परिवर्तन भइरहने गर्छ। यसरी बारम्बार धरहराको नाम कसले फेर्छ? के नाम फेर्ने व्यक्तिको पहिचान गर्न सकिन्छ ? के छ तरिका ? भन्नेबारे सामाजिक सञ्जालमा बहस भइरहेको छ । यस लेखमा गुगल म्याप्स र यससँग जोडिएका विभिन्न प्राविधिक पक्षबारे जानकारी दिइएको छ ।

कसले फेर्न सक्छ गुगल म्याप्समा रहेको नाम ?

गुगल म्याप्समा जोकोहीले पनि कुनै ठाउँको नाम फेर्न, नयाँ ठाउँ राख्न, अन्य विवरण थप्न पाउँछ । सामा‍न्य सेटिङबाटै यो काम गर्न सकिन्छ । नाम फेर्न वा राख्न सकिने भए पनि सार्वजनिकरूपमा गरिएका हरेक एडिटको पछाडि को व्यक्ति छ भनेर सिधै पत्ता लगाउन भने सम्भव छैन । गुगलले पनि यस्तो सुविधा दिँदैन । तर, अनुसन्धान तथा कानूनी कारबाहीको विषय भए औपचारिक तरिकाबाट सरकारी निकायले यो विवरण गुगलबाट झिकाउन सक्छन्। तर, सोझै गुगलले प्राइभेट म्यापिङ लगको एक्सेस भने दिंदैन । 

अब गुगल म्याप्सको जानकारी कसरी अपडेट हुन्छ, यी परिवर्तन कसले गरिरहेको हुन सक्छ र तपाईं आफ्नो व्यवसाय (ठाउँको नाम)को जानकारीलाई सही तरिकाले व्यवस्थापन गर्न के-कस्ता कदम चाल्न सक्नुहुन्छ भन्नेबारे चर्चा गरौं । 

गुगल म्याप्स धेरै मानिसका लागि महत्त्वपूर्ण स्रोत हो जसले बाटो पत्ता लगाउनदेखि स्थानीय व्यवसाय र सेवाहरू खोज्नसम्म मद्दत गर्छ । यो जानकारीलाई सधैँ सही र अप-टु-डेट राख्न गुगलले विभिन्न स्रोतबाट डेटा संकलन गर्न विभिन्न प्रणालीमा निर्भर रहन्छ । सन् २०१० देखि अहिलेसम्म ९७ करोडभन्दा बढी मानिसले गुगल म्याप्समा रिभ्यु लेख्ने, फोटो अपलोड, रेटिङ  र ठेगाना तथा खुल्ने समय जस्ता तथ्यगत जानकारी थपेर योगदान पुर्‍याएका छन् । यसरी प्रयोगकर्ताबाट जानकारी संकलन गर्दा म्याप्सको डेटा त बढ्छ तर कहिलेकाहीँ गलत वा अनावश्यक परिवर्तनलाई व्यवस्थापन गर्नुपर्ने चुनौती थपिन्छ । अहिले धरहराको सन्दर्भमा त्यही स्थिति देखिएको हो । 

गुगलका अनुसार तपाईंको म्याप्समा हुने विभिन्न किसिमका परिवर्तन तल उल्लेख गरिएका चार मुख्य स्रोतबाट आउन सक्छन् :

१) सार्वजनिकरूपमा उपलब्ध जानकारी 

गुगलको स्वचालित प्रणाली (एल्गोरिदम)ले इन्टरनेटमा तपाईंको आधिकारिक वेबसाइट, सामाजिक सञ्जाल (जस्तै: फेसबुक, लिङ्क्डइन) र अन्य अनलाइन स्रोतबाट निरन्तर जानकारी तानिरहेको हुन्छ । यदि कुनै ठाउँ वा व्यवसायको वेबसाइट र गुगल बिजनेस प्रोफाइलमा व्यवसाय खुल्ने समय फरक-फरक छ भने गुगलले बढी विश्वसनीय ठानेको स्रोतको आधारमा उक्त ठाउँ वा व्यवसायको प्रोफाइललाई स्वतः अपडेट गर्न सक्छ । त्यसैले यदि तपाईंको व्यवसाय गुगल म्याप्समा लिस्टिङ गर्नु भएको छ भने आफ्ना सबै अनलाइन प्लेटफर्ममा व्यवसायको जानकारी एकनासको राख्नु अत्यन्त महत्त्वपूर्ण छ ।

२) थर्ड-पार्टी एप्लिकेसन 

धेरै व्यवसायले विभिन्न मार्केटिङ वा व्यवस्थापनका लागि थर्ड-पार्टी एप प्रयोग गर्छन् । त्योमध्ये केही एपलाई उनीहरूले आफ्नो गुगल बिजनेस प्रोफाइलमा डेटा पठाउन अनुमति (API access) दिएका हुन्छन् । यो प्रायः ध्यान नपुग्ने स्रोत हो । यदि सो व्यक्तिले अब प्रयोग नगर्ने एपलाई पहुँच दिएको छ वा ती एपमा गलत जानकारी छ भने त्यसले गुगल म्याप्सको बिजनेस प्रोफाइलमा पुरानो वा गलत डेटा पठाइरहेका हुन सक्छन् । तर, यो माध्यम नेपालमा कमै प्रयोग हुने जानकार बताउँछन् ।

३) ओनर वा मेनेजर 

गुगल म्याप्समा लिस्टिङ गरिएका ठाउँ वा व्यवसाय जोकोहीले क्लेम (दाबी) गर्न पाउँछ । सबैभन्दा पहिले जसले दाबी गर्‍यो, सो ठाउँ व्यवस्थापन त्यही व्यक्तिले गर्न पाउँछ । यदि तपाईंको व्यवसाय पहिले नै अरु कसैले दाबी गरेको छ भने तपाईंले रिपोर्ट गरेर आफ्नो बनाउन सक्नुहुन्छ । तर, सामान्यतः जसले सबैभन्दा पहिले दाबी गर्छ, गुगल म्याप्समा उक्त ठाउँ व्यवस्थापन गर्न उसैले पाउँछ । त्यस्तै व्यवसाय व्यवस्थित गर्ने एक्सेस दिएको अकाउन्टबाट पनि व्यवस्थापन गर्न सकिन्छ । यसरी व्यवसाय दाबी गरेको ओनर वा मेनेजरले जुनसुकै बेला त्यसमा भएका विवरण परिवर्तन गर्न सक्छन् । 

यो विषय सामान्य लागे पनि धेरैले बेवास्ता गर्छन् । नियमितरूपमा आफ्नो प्रोफाइलमा पहुँच भएका प्रयोगकर्ताको सूची जाँच गर्ने र पुराना कर्मचारी वा विश्वास नभएका व्यक्तिलाई हटाउनु अनाधिकृत परिवर्तनहरू रोक्ने एक महत्त्वपूर्ण कदम हो ।

४) सार्वजनिक प्रयोगकर्ताको एडिट

गुगल म्याप्सले प्रयोगकर्ता (जसमा लोकल गाइड पनि पर्छन्)लाई व्यवसायको सूचीमा परिवर्तन सुझाव गर्न अनुमति दिन्छ । सबै सुझाव सिधै लाइभ हुँदैनन्। तर, गुगलको प्रणालीले सुझाव दिने स्रोत (जस्तै: उच्च तहको लोकल गाइड) लाई विश्वसनीय मान्यो भने, त्यो एडिट स्वीकृत हुने सम्भावना बढी हुन्छ । यसको फाइदा र बेफाइदा दुवै छ: यसले जानकारीलाई अप-टु-डेट राख्न मद्दत गर्छ। तर, कहिलेकाहीँ गलत वा अनावश्यक परिवर्तन पनि हुन सक्छन् । त्यो जोखिम रहिरहन्छ ।

यसरी विभिन्न तरिकाले गुगल म्याप्समा पहिले नै भएका जानकारी अपडेट हुन्छन् । 

यसरी जोकोहीले सजिलै आफ्नो व्यवसायमा अनावश्यक परिवर्तन गरेर दुःख नदेओस् भन्नका लागि बिजनेस प्रोफाइल भेरिफिकेसन गर्नुपर्ने हुन्छ । बिजनेस क्लेम गर्नु भनेकै बिजनेस प्रोफाइल भेरिफिकेसन गर्नु हो । आफ्नो व्यवसायको अनलाइन जानकारीलाई सुरक्षित राख्न र नियन्त्रण गर्न तपाईंले चाल्न सक्ने सबैभन्दा महत्त्वपूर्ण कदम भनेको आफ्नो गुगल बिजनेस प्रोफाइललाई भेरिफाइ (Verify) गर्नु हो । भेरिफाइ गरिएको प्रोफाइलको आधिकारिक व्यक्तिले मात्र गुगल सर्च, म्याप्स र अन्य गुगल सेवामा आफ्नो व्यवसायको जानकारी प्रभावकारीरूपमा व्यवस्थापन गर्न सक्छ ।

भेरिफाइ गरिएको प्रोफाइलका फाइदाहरू:

जानकारी अपडेट गर्ने अधिकार

तपाईंले आफ्नो व्यवसायको जानकारी, फोटो, पोस्ट र ग्राहकका रिभ्युको जवाफ दिन सक्ने अधिकार पाउनुहुन्छ ।

अरूको परिवर्तनबाट सुरक्षा

सबैभन्दा महत्त्वपूर्ण विषय- भेरिफाइ गरिएको प्रोफाइलमा अरूले सुझाएका परिवर्तनलाई तपाईंले स्वीकार वा अस्वीकार गर्न सक्नुहुन्छ । यदि तपाईंको प्रोफाइल भेरिफाइ गरिएको छैन भने, कुनै पनि परिवर्तन स्वतः लागू हुन सक्छ ।

ग्राहकको विश्वास वृद्धि

गुगलकाअनुसार प्रयोगकर्ताले भेरिफाइ गरिएको व्यवसायलाई बढी विश्वसनीय मान्छन् ।

लोकल सर्च (लोकल एसईओ)मा राम्रो र्‍याङ्किङ 

भेरिफाइ गरिएको प्रोफाइलको जानकारीले लोकल सर्च रिजल्टमा तपाईंको व्यवसायको र्‍याङ्किङ सुधार गर्न मद्दत गर्छ ।

गुलग म्याप्समा बिजनेस प्रोफाइल विभिन्न तरिकाले भेरिफाइ गर्न सकिन्छ । हुलाकबाट कोड पठाउने, फोन/एसएमएस, इमेल, भिडियो कल वा भिडियो रेकर्डिङ आदिबाट भेरिफाइ गर्न सकिन्छ । 

जानकारी परिवर्तन भएमा के गर्ने ?

आफ्नो गुगल बिजनेस प्रोफाइलको जानकारीलाई सही राख्न नियमित निगरानी आवश्यक छ । भेरिफाइ गरिएको प्रोफाइल भएका व्यवसायले तल उल्लेख उल्लेख गरिएका तरिका पालना गर्न सक्छन् ।

• नियमित निगरानी: आफ्नो प्रोफाइलमा कुनै अप्रत्याशित परिवर्तन भए/नभएको नियमितरूपमा जाँच गर्नुहोस् ।

• सबै प्लेटफर्ममा एकरूपता: आफ्नो वेबसाइट र सामाजिक सञ्जालमा व्यवसायको ठेगाना, फोन नम्बर र खुल्ने समय जस्ता विवरण एकनासको राख्नुहोस् ।

• थर्ड-पार्टी एपको एक्सेस जाँच: समय-समयमा कुन-कुन एपलाई पहुँच दिइएको छ भनी जाँच गर्नुहोस् र अनावश्यक एपको पहुँच बन्द गर्नुहोस् ।

• बिजनेस प्रोफाइल मेनेजरको सूची व्यवस्थापन: पुराना कर्मचारी वा विश्वास नभएका प्रयोगकर्तालाई पहुँच (एक्सेस) लिस्टबाट हटाउनुहोस् ।

• गलत जानकारी सिधैं एडिट गर्नुहोस्: तपाईंले गुगल सर्च वा म्याप्स एपबाटै आफ्नो प्रोफाइलको गलत जानकारी सोझै एडिट गर्न सक्नुहुन्छ ।

यदि तपाईंको कुनै व्यवसाय गुगल म्याप्समा लिस्टिङ छैन भने पनि तपाईंको भूमिका हुन्छ । यदि तपाईंले कुनै गलत जानकारी देख्नुभयो भने तपाईंले गुगल म्याप्समा सिधैं एडिटको सुझाव दिन सक्नुहुन्छ वा गलत वा भ्रामक जानकारीको रिपोर्ट गर्न सक्नुहुन्छ ।

पछिल्लो अध्यावधिक: साउन ४, २०८२ १७:३७

काठमाडौँ । बैंक तथा वित्तीय संस्थाबाहेक अरु सबै भुक्तानी सम्बन्धी काम गर्ने संस्थाहरुले पनि जथाभावी लाभांश वितरण गर्न नपाउने भएका छन् । कमाएको नाफाको बाँडफाँट तथा लाभांश वितरणलाई व्यवस्थित गर्न भन्दै नेपाल राष्ट्र बैंकले आइतबार भुक्तानीसम्बन्धी कार्य गर्न अनुमतिपत्र प्राप्त संस्था (बैंक तथा वित्तीय संस्थाबाहेक)का लागि लाभांश वितरणसम्बन्धी मार्गदर्शन जारी गरेको हो ।

राष्ट्र बैंकले लाभांश वितरण गर्नुअघि अनिवार्यरूपमा विभिन्न कोषहरूमा नाफाको निश्चित हिस्सा छुट्याउन निर्देशन दिएको छ । राष्ट्र बैंकका गभर्नर विश्व पौडेलले असार ३२ गते स्वीकृत गरेको  मार्गदर्शनमा जोखिम व्यवस्थापन, वित्तीय पारदर्शिता र नियामकीय पुँजीको सुदृढीकरण सुनिश्चित गर्न कोष व्यवस्थापनलाई अनिवार्य गराएका हुन् ।

राष्ट्र बैंककाअनुसार लाभांश वितरण सम्बन्धी नीति स्पष्टरूपमा तयार पारेर संस्थाको सञ्चालक समितिबाट पारित गर्नुपर्नेछ। उक्त नीतिमा नियामकीय पुँजी कायम गर्ने योजना, नगद र सेयर लाभांश वितरणसम्बन्धी रणनीति तथा अनिवार्य कोष व्यवस्थाको विवरण समावेश गर्नुपर्ने उल्लेख छ ।

संस्थाहरूले लाभांश वितरण गर्नुअघि जोखिम बहन कोष, जगेडा कोष र पू्र्वाधार विकास कोषमा रकम छुट्याउनुपर्नेछ । यस्तै, राष्ट्र बैंकले जोखिम बहन कोषको रकम अप्रत्याशित घटना व्यवस्थापनमा प्रयोग गर्न सकिने उल्लेख गर्दै यस्ता कोषबाट खर्च हुँदा बैंकलाई जानकारी गराउनुपर्ने प्रावधान पालना गर्न निर्देशन दिएको छ ।

लाभांश वितरण गर्नुअघि संस्थाको वित्तीय अवस्था सबल भएको हुनुपर्नेछ । लाभांश घोषणा गर्न सञ्चित मुनाफा ऋणात्मक हुनु नहुने, पर्याप्त नगद मौज्दात भएको पुष्टि हुनुपर्ने र संस्थाले मुनाफा भएको आर्थिक वर्षको आधारमा मात्र लाभांश घोषणा गर्नुपर्ने व्यवस्था गरिएको छ ।

त्यस्तै, कर्जा सूचना केन्द्रको कालोसूचीमा नरहेको, बैंक तथा वित्तीय संस्थामा तिर्न बाँकी कर्जा वा कर दायित्व नरहेको र कानूनी व्यवस्था पालना भएको विवरण समेत आवश्यक पर्नेछ ।

लाभांश वितरण प्रस्ताव राष्ट्र बैंकको पूर्वस्वीकृतिविना अघि बढाउन पाइने छैन । लाभांश प्रस्ताव पेस गर्दा सञ्चालक समितिको निर्णय, लेखापरीक्षण प्रतिवेदन, कर चुक्ता प्रमाणपत्र, कोष छुट्याइएको विवरण र आवश्यक अन्य कागजात अनिवार्य रूपमा संलग्न गर्नुपर्नेछ ।

पछिल्लो अध्यावधिक: साउन ४, २०८२ १६:५७

काठमाडौँ । मानिसको दैनिकी विद्युतीय उपकरणमा निर्भर हुँदै जाँदा ती उपकरणको ब्याट्री ब्याकअपका लागि पावरबैंक प्रयोग गर्नुपर्ने हुन्छ । विशेषगरी कुनै लामो यात्रामा जाँदा होस् वा कुनै दुर्गम ठाउँ जाँदा अथवा घरबाट लामो समयको लागि बाहिर रहनुपरेमा आफ्ना ग्याजेटहरू चार्ज गर्न पावरबैंक अनिवार्य आवश्यकता बनिसकेको छ । 

यसमा लागि बजारमा विभिन्न प्रकारका पावर बैंकहरू भेटिन्छन् । ब्रान्डसँगै पावरबैंकको विशेषता पनि फरक-फरक हुन्छन् । यहाँ साओमीका पाँच हजार रुपैयाँभन्दा कम मूल्यका पावरबैंकको विषयमा चर्चा गरिएको छ । 

साओमी फोरआई १०,०००

बजार मूल्य तीन हजार ४९९ रुपैयाँ रहेको यो पावरबैंकबाट एकैचोटी तीनओटा डिभाइस चार्ज गर्न मिल्छ । यसमा यूएसबी–सी र यूएसबी–ए दुवै पोर्ट छन् । यसले टु-वे चार्जिङ पनि सपोर्ट गर्छ । अर्थात् पावर बैंक चार्ज गर्दैगर्दा तपाईंको फोन पनि चार्ज गर्न मिल्छ । । यसमा रहेको १८ वाट चार्जरले ४ घण्टामै डिभाइसलाई फुल चार्ज गराउने कम्पनीको दाबी छ । यो पावरबैंक क्लासिक ब्ल्याक, ओलिव ग्रीन र कोरल पर्पल रंगमा उपलब्ध छ । 

साओमी पकेट पावर बैंक 

१० हजार एमएएच ब्याट्री पावर भएको यो पावरबैंकको मूल्य ४ हजार २९९ रुपैयाँ छ । यसमा बिल्ट–इन केबल भएकाले अलग्गै चार्जिङ केबलको आवश्यकता पर्दैन । फोरआई जस्तै यसमा पनि २२.५ वाट फास्ट चार्जिङ पावर भएको कारण यसमा पनि एकैचोटि तीनवटा डिभाइस चार्ज गर्न सकिन्छ । बिल्ट–इन केबल र यूएसबी–सी र यूएसबी–ए दुवै पोर्टले साढे तीन घण्टामा नै डिभाइसहरू फुल चार्ज हुने कम्पनीको दाबी छ । यो पावर बैंक मरुन र ब्लू रंगमा उपलब्ध छ । 

रेड्मी पावर बैंक 

नेपाली बजारमा चार हजार ४९९ रुपैयाँ पर्ने यो पावर बैंकमा दुई हजार एमएएचको शक्तिशाली ब्याट्री जडान गरिएको छ । कम्पनीका अनुसार यो पावरबैंकले अत्यधिक ताप, सर्ट सर्किट, उच्च भोल्टेज जस्ता समस्या खप्नसक्ने दाबी गरेको छ । यस भित्रको लिथियम पोलिमर ब्याट्री सामान्यभन्दा बढी सुरक्षित भएको कम्पनीले जनाएको छ । कालो र सेतो रंगमा उपलब्ध यो पावर बैंक, धेरै डिभाइस भएका ठाउँमा, चार्जिङ स्पट कम भएका  ठाउँमा र लामो यात्रा गर्नेहरूको लागि उपयुक्त छ । 

साओमी पावर बैंक फोरआई २०,०००

साओमी पावरबैंक फोरआई २०,००० को बजार मूल्य चार हजार ९९९ रुपैयाँ पर्छ । ३३ वाट सोनिक चार्जिङ भएको यो हेबी–ड्युटी पावर बैंकले एकैचोटि तीनवटा डिभाइस चार्ज गर्न सक्छ । फिटनेस ट्रयाकर वाच जस्ता सानो साइजका ग्याजेटका लागि लो पावर मोड पनि उपलब्ध छ । १२ लेयर सुरक्षा सुविधा र धेरै पोर्ट (टाइप सी इनपुट, टाइपसी आउटपुट र दुईवटा यूएसबी–ए आउटपुट)सहित यो पावर बैंक फूल चार्ज हुन करिब सात घण्टा लाग्ने कम्पनीको भनाइ छ । बजारमा यो पावर बैंक जेट ब्ल्याक, नाइट्रो ग्रीन र टर्बो ब्लू रंगमा उपलब्ध ​छ । 

पछिल्लो अध्यावधिक: साउन ४, २०८२ १६:५९

काठमाडौँ । चर्चित  ब्यान्ड कोल्डप्लेको कन्सर्टमा एक महिला सहकर्मीसँग अङ्कमाल गरिरहेको भिडिओ भाइरल भएपछि अमेरिकी टेक कम्पनीका प्रमुख कार्यकारी अधिकृत (सीईओ) ले राजीनामा दिएका छन् । 

डेटा पूर्वाधारको क्षेत्रमा काम गर्ने टेक कम्पनी ‘एस्ट्रोनमर’ले शनिबार एक विज्ञप्ति जारी गर्दै सीईओ एन्डी बायरनले राजीनामा दिएको पुष्टि गरेको छ । “एन्डी बायरनले आफ्नो राजीनामा बुझाएका छन् र सञ्चालक समितिले त्यसलाई स्वीकार गरेको छ,” कम्पनीको विज्ञप्तीमा उल्लेख छ ।

भाइरल भएको क्लिपमा अमेरिकाको म्यासाचुसेट्स सहरमा रहेको फक्सबरोमा आयोजित कन्सर्टको ठूलो स्क्रिनमा एक पुरुष र महिला अङ्कमाल गरिरहेका देखिन्छन् । क्यामेरा आफूतिर सोझिएको थाहा पाउनासाथ उनीहरू लुक्न खोज्छन् ।

अमेरिकी सञ्चारमाध्यमले भिडिओमा देखिएका व्यक्ति विवाहित सीईओ बायरन र कम्पनीकी एचआर प्रमुख क्रिस्टिन क्याबोट भएको पहिचान गरेका छन् । 

कम्पनीले विज्ञप्तीमा थप भनेको छ- “हामी स्थापनादेखि नै निर्देशित मूल्य, मान्यता र संस्कृतिप्रति प्रतिबद्ध छौं । हाम्रा लिडरले आचरण र जवाफदेहिता दुवैमा एक मानक स्थापित गर्नुपर्छ भन्ने अपेक्षा गरिन्छ । तर, हालै त्यो मानक पूरा भएन ।”

भिडिओमा दुई जना लुक्न खोजेपछि कोल्डप्लेका मुख्य गायक क्रिस मार्टिनले दर्शकलाई ठट्टा गर्दै भनेका थिए, “या त उनीहरूको अफेयर चलिरहेको छ, या त उनीहरू धेरै लजाए ।”

भिडिओ भाइरल भएलगत्तै एस्ट्रोनमरले उनीहरूको सम्बन्धबारे अनुसन्धान सुरु गरेको र सीईओ बायरनलाई बिदामा बस्न निर्देशन दिएको थियो । न्यूयोर्कस्थित उक्त कम्पनीले अब नयाँ नेतृत्वको चयन गर्ने र त्यसका लागि खोजी सुरु भइसकेको जनाएको छ । तत्कालका लागि प्रमुख उत्पादन अधिकृतले अन्तरिम सीईओको रूपमा काम गर्ने जिम्मेवारी पाएका छन् ।

पछिल्लो अध्यावधिक: साउन ४, २०८२ १६:३५

काठमाडौँ । सरकारको निर्देशन अवज्ञा गर्दै केही सेवाप्रदायकहरूको नेटवर्कमा अझै पनि प्रतिबन्धित एप टेलिग्राम चलिरहेको पाइएपछि नियामक नेपाल दूरसञ्चार प्राधिकरणले कारबाहीको चेतावनी दिएको छ ।

टेलिग्राममार्फत अनलाइन ठगी र सम्पत्ति शुद्धीकरणजस्ता गम्भीर अपराध भइरहेको भन्दै सरकारले शुक्रबारदेखि उक्त एपमाथि प्रतिबन्ध लगाएको थियो । 

शुक्रबार नै प्राधिकरणले दूरसञ्चार तथा इन्टरनेट सेवाप्रदायकहरूलाई टेलिग्राम एपको पहुँचमा तत्काल रोक लगाउन निर्देशन दिएको थियो । तर, आइतबार अपरान्हसम्म पनि देशका ठूला इन्टरनेट सेवाप्रदायकहरुको नेटवर्क प्रयोग गर्दा टेलिग्राम एप निर्बाध सञ्चालन भइरहेका छन् ।

प्राधिकरणका निर्देशक मीनप्रसाद अर्यालले आफूहरू टेलिग्राम एप चले/नचलेको अनुगमन गरिरहेको जानकारी दिए । 

“सरकारले बन्द गर्न निर्देशन दिएपछि त बन्द गर्नुपर्‍यो। प्राधिकरणको सम्बन्धित शाखाले एप चले/नचलेको अनुगमन गरिरहेको छ । पछिल्लो स्ट्याटस के हो त्यो अध्ययन गरिरहेका छौँ,” अर्यालले टेकपानासँग भने । 

प्राधिकरणले सरकारी निर्देशन पालना नगर्ने सेवा प्रदायकलाई कारबाही गर्ने चेतावनी दिएको छ ।

*शीर्षक परिवर्तन गरिएको छ । -स.

पछिल्लो अध्यावधिक: साउन ४, २०८२ १५:५

काठमाडौँ । नेपाल क्रिकेट संघ (क्यान) ले लगातार दोस्रो पटक अन्तर्राष्ट्रिय क्रिकेट परिषद् (आईसीसी) को प्रतिष्ठित ‘डिजिटल फ्यान इङ्गेजमेन्ट अफ द इयर’ अवार्ड हात पारेको छ । सामाजिक सञ्जालमा नेपाली क्रिकेट समर्थकको उत्साहजनक सहभागिताका कारण क्यानले विश्वका सबै क्रिकेट बोर्डलाई पछि पार्दै यो अवार्ड जितेको हो ।

अवार्ड जितेपछि क्यानले आइतबार सामाजिक सञ्जालमार्फत आफ्ना सम्पूर्ण समर्थक, शुभचिन्तक तथा नेपाली क्रिकेटप्रेमीप्रति आभार व्यक्त गरेको छ ।

यो अवार्ड सामाजिक सञ्जालमा समर्थकहरूको सहभागिता, सम्बन्ध विस्तार र क्रिकेट संघले डिजिटल प्लेटफर्ममार्फत पुर्‍याएको योगदानको आधारमा प्रदान गरिन्छ  । गत वर्ष क्यानले आफ्नो फेसबुक फ्यानबेस ४०० प्रतिशतले वृद्धि गर्दै यो अवार्ड जितेको थियो ।

यस वर्ष फ्यानबेस वृद्धिको यकिन तथ्याङ्क सार्वजनिक नगरिए पनि वर्षभरि समर्थकको निरन्तर र उत्साहजनक सहभागिता नै जितको प्रमुख आधार बनेको हो । 

पछिल्लो अध्यावधिक: साउन ४, २०८२ १४:३१