काठमाडौँ । अमेरिकी ट्रम्प प्रशासनले रक्षा विभागमार्फत आगामी चार वर्षमा ‘अफेन्सिभ साइबर अपरेसन’ मा एक अर्ब डलर (करिब एक खर्ब ३७ अर्ब रुपैयाँ) खर्च गर्ने योजना बनाएको छ । यो घोषणा ट्रम्पको महत्त्वपूर्ण ‘वन बिग ब्युटिफुल बिल’ मा समावेश गरिएको छ, यद्यपि उक्त प्रावधानले ‘अफेन्सिभ साइबर अपरेसन’ को विस्तृत विवरण वा यसमा प्रयोग हुने उपकरण तथा सफ्टवेयरको बारेमा भने केही खुलाएको छैन ।
यो रकम अमेरिकी इन्डो-प्यासिफिक कमान्डको क्षमता अभिवृद्धि र सुधारमा खर्च गरिनेछ । जसले चीन सहित एसिया-प्रशान्त क्षेत्रमा काम गर्दै आएको छ । चीनलाई अमेरिकाको सबैभन्दा ठुलो भू-राजनीतिक प्रतिद्वन्द्वीको रूपमा हेर्ने गरिन्छ ।
ह्याकिङलाई व्यापक रूपमा विस्तार गर्ने अमेरिकी सरकारको यो कदमले प्रतिशोध निम्त्याउने विश्लेषण गर्न थालिएको छ । अमेरिकी साइबर प्रतिरक्षातर्फ बजेट कटौती गरेको बेला अफेन्सिभ कार्यक्रम घोषणा गर्दा उल्टै ब्याकफायर हुने चिन्ता पनि छ ।
के हो अफेन्सिभ साइबर अपरेसन ?
यो अफेन्सिभ साइबर अपरेसनले अमेरिका विरोधीहरू विरुद्ध लक्षित ह्याकिङलाई जनाउँछ । जसमा जेरो-डे एक्सप्लोइट, स्पाइवेयरको प्रयोग, साइबर आक्रमण गर्न आवश्यक पूर्वाधार, खुफिया जानकारीको सङ्कलन आदि हुन सक्छन् ।
सफ्टवेयरमा रहेका अज्ञात त्रुटिहरूको मौका छोपेर लक्षित उपकरणमा ह्याक गर्ने क्षमताको रूपमा जेरो-डे एक्स्प्लोइटको प्रयोग गरिन्छ । त्यस्तै व्यक्तिबाट डेटा चोरी गर्न स्पाइवेयर सफ्टवेयर डिप्लोय गरिन्छ ।
यस बाहेक इन्टरनेट ट्राफिक (जसलाई नेटफ्लो भनिन्छ) सङ्कलन वा खरिद गर्ने जस्ता गतिविधिहरू मार्फत खुफिया जानकारी सङ्कलन गर्ने गरिन्छ ।
पछिल्लो अध्यावधिक: असार ३१, २०८२ १३:२५
सामाग्री श्रोत :
टेक पाना
