काठमाडौँ । ब्याट्री निर्माता कम्पनी सीएटीएल (सीएटीएल) ले चिनियाँ अटोमोबाइल कम्पनी सेरेसको कारखानामा ब्याट्री उत्पादन सुरु गरेको छ । कम्पनीले चोङकिङस्थित ‘सेरेस सुपर फ्याक्ट्री’ भित्र दुई ओटा सीटीपी (सेल-टु-प्याक) २.० हाई इन्ड ब्याट्री प्याक प्रडक्सन लाइनहरू औपचारिक रूपमा सञ्चालनमा ल्याएको हो ।
सीएटीएलले पहिलो पटक अपनाएको ‘फ्याक्ट्री-इन-फ्याक्ट्री’ नामक सहकार्य अन्तर्गत सीएटीएलले पहिलो पटक चोङकिङमा ब्याट्री उत्पादन थालेको बताइएको छ । यस्तो उत्पादन मोडेलमा मुख्य कम्पोनेन्ट आपूर्तिकर्ताहरूलाई सवारी साधन निर्माण गर्ने कारखानामा नै एकीकृत गरिन्छ ।
सेरेसका अनुसार, यो मोडेलले कम्पनीको निर्देशनअनुसार उत्पादन लाइनमा २० मिनेटभन्दा कम समयमा आवश्यक समायोजन गर्न सक्ने क्षमता राख्दछ । साथै हजारौं कम्पोनेन्टहरू दैनिक रूपमा आपूर्ति भई सोही दिन उत्पादन प्रक्रियामा समावेश हुन्छन् ।
यसबाट उत्पादनमा तीव्रता आउने र लागतमा कमी हुने अपेक्षा गरिएको छ । सीएटीएलका अध्यक्ष तथा प्रमुख कार्यकारी अधिकृत डा. रोबिन जेङले भने, “सुरु गरिएको उत्पादन लाइन सीएटीएलको सबैभन्दा उन्नत, बौद्धिक र डिजिटल उत्पादन लाइन हो ।”
सेरेस र सीएटीएलबिचको रणनीतिक साझेदारी सन् २०२२ को अगस्टमा भएको थियो । सम्झौताअनुसार, आइटो (Aito) ब्रान्डका सवारी साधनहरूमा आगामी पाँच वर्षसम्म विशेष रूपमा सीएटीएलका पावर ब्याट्रीहरू प्रयोग गरिनेछ । साथै, आइटोका नयाँ मोडेलहरूमा सीएटीएलको अत्याधुनिक किलिन (Qilin) ब्याट्रीहरू पूर्ण रूपमा जडान गरिनेछ ।
सेरेस र ह्वावेको संयुक्त परियोजना अन्तर्गत रहेपनि आइटो ब्राण्डमा संयुक्त लगानी भने छैन । जुलाई २०२४ मा, सेरेसले ह्वावेबाट आइटोको ट्रेडमार्क र पेटेन्टहरू करिब २.५ अर्ब युआन (३४४ मिलियन अमेरिकी डलर) मा खरिद गरेको थियो । यद्यपि, ह्वावे अहिले पनि एक प्रमुख पार्टपुर्जा र सफ्टवेयर आपूर्तिकर्ता हो । ह्रावेले आफ्नै ‘HIMA’ सेल्स नेटवर्कमार्फत आइटो ब्रान्डका कारहरू बिक्री गरिरहेको छ ।
एक नयाँ लक्जरी अटोमोटिभ ब्रान्डको रूपमा स्थापित आइटोले अहिलेसम्म बजारमा सात लाखभन्दा बढी सवारी साधनहरू बिक्री गरिसकेको छ । चोङकिङमा रहेको सेरेस सुपर फ्याक्ट्री यसको प्रमुख उत्पादन केन्द्र हो ।
सीएटीएलले पावर ब्याट्री बजारमा आफ्नो बलियो पकड कायम राखेको छ । चाइना अटोमोटिभ पावर ब्याट्री इन्डस्ट्री इनोभेसन एलायन्सको तथ्याङ्कअनुसार २०२५ को जनवरीदेखि मे महिनासम्म चीनमा पावर ब्याट्री जडान २१.४ गिगावाट आवर पुगेको छ, जुन गत वर्षको सोही अवधिको तुलनामा ५०.४% ले बढी हो । यही अवधिमा, सीएटीएलले १०३.२० गिगावाट आवर ब्याट्री जडान गरेको छ, जसले ४२.९०% बजार हिस्सा ओगटेको छ ।
पावर ब्याट्रीबाहेक सीएटीएल र सेरेसबिचको सहकार्य शून्य-कार्बन क्षेत्रमा पनि विस्तार भएको छ । यसै वर्षको अप्रिलमा दुई कम्पनीले संयुक्त रूपमा सेरेस सुपर फ्याक्ट्रीमा ५० मेगावाट आवर क्षमताको सौर्य ऊर्जा परियोजनाको पहिलो चरण सफलतापूर्वक सम्पन्न गरी राष्ट्रिय ग्रिडमा जोडेका छन् । यसले कारखानालाई हरित ऊर्जा प्रदान गर्ने बताइएको छ ।
पछिल्लो अध्यावधिक: असार २९, २०८२ १२:२
सामाग्री श्रोत :
टेक पाना
