काठमाडौँ । मेटाले मेसेजिङ एपमा केन्द्रित नयाँ विज्ञापन र व्यापारिक समाधान ल्याउने घोषणा गरेको छ । योसँगै अब व्यवसाय (मार्केटर) हरूले ह्वाट्सएपमार्फत समेत विज्ञापन गर्न सक्ने भएका छन् ।
मेटाले एड्स म्यानेजर (Ads Manager) मा सुधार ल्याउँदै ह्वाट्सएप सहित सबै विज्ञापन प्लेटफर्म एउटै प्रणालीबाट सञ्चालन गर्न सकिने बनाएको छ । व्यवसायहरूले एउटै क्रिएटिभ, सेटअप र बजेट प्रयोग गरेर फेसबुक, इन्स्टाग्राम, मेसेन्जर, थ्रेड्स र ह्वाट्सएपका लागि विज्ञापन बनाउन सक्नेछन् ।
मेटाले ‘Advantage+’ र आफ्नो एआई प्रणाली प्रयोग गरी ग्राहक सूचीबाट सजिलै लक्षित समूह छान्ने वा आफैं उपयुक्त दर्शक पहिचान गर्ने सुविधा दिएको छ । यसले व्यवसायहरूलाई विज्ञापन प्रभावकारिता बढाउन सहयोग गर्ने कम्पनीको विश्वास छ ।
ह्वाट्सएपको स्टाटस (Status) मा विज्ञापन राख्न सकिने नयाँ सुविधा पनि सुरु हुँदैछ । साथै मेटाले एआईमा आधारित आफ्नो बिजनेश एआई बटको पहुँच विस्तार गर्दैछ । यो टुलले ग्राहकसँग च्याटमार्फत सिधा कुराकानी गरी सेवा र उत्पादन सिफारिस गर्न सक्ने बताइएको छ ।
ह्वाट्सएपमा ग्राहक सेवा अझ प्रभावकारी बनाउन मेटाले सिधा फोन कल र भ्वाइस मेसेजको सुविधा पनि थप्दैछ । अब ह्वाट्सएप बिजनेस प्लेटफर्म प्रयोग गर्ने ठुला व्यवसायहरूले ग्राहकलाई कल गर्न सक्ने वा ग्राहकबाट कल प्राप्त गर्न सक्नेछन् । टेलिहेल्थ जस्ता सेवालाई लक्षित गर्दै भिडिओ कलको सुविधा पनि थपिनेछ ।
मेटाले भनेको छ, “ह्वाट्सएपमा भ्वाइस र कल सपोर्ट ल्याउँदा ग्राहकले आफूसँग मिल्ने माध्यम प्रयोग गरेर व्यवसायसँग सजिलै संवाद गर्न सक्नेछन् । भविष्यमा यसलाई एआई आधारित भ्वाइस सपोर्टमा विस्तार गरिनेछ ।”
प्रयोगकर्ताहरू अहिले पोस्टभन्दा बढी मेसेजिङमार्फत अन्तर्क्रिया गर्न थालेकाले मेटाले बिजनेस मेसेजिङमा बढी ध्यान दिइरहेको छ ।
पछिल्लो अध्यावधिक: असार १८, २०८२ ११:५१
सामाग्री श्रोत :
टेक पाना
