नवलपरासी — बिहीबार साँझपख परेको पानीका कारण महेन्द्र राजमार्गको दाउन्ने सडकमा यातायात सञ्चालन रोक लगाइएको छ । बिनयी खोलामा आउने बाढीमा सवारी साधन पर्ने जोखिमका कारण प्रहरीले यातायात बन्द गरेको हो ।
दाउन्नेमा गाडी फस्ने जोखिम छ । यता बिनयी खोलामा जुनसुकै बेला बाढी आउनसक्ने जोखिम भएका कारण साँझ ७ बजेबाट नै दाउन्ने सडक खण्डमा प्रहरी खटाएर राजमार्ग बन्द गरिएको प्रहरीले जनाएको छ ।
सडक डिभिजन कार्यालय भरतपुरले ५ दिनअघि सार्वजनिक सूचना जारी गरेर दाउन्ने सडक खण्डमा साँझ ७ देखि बिहान ५ बजेसम्म मालबहाक र लामा गाडी संचालनमा रोक लगाएको थियो । मंगलबार साँझदेखि बिहीबार साँझ ६ बजेसम्म यो खण्डमा रोकिएका सबै गाडी पूर्वपश्चिम वारपार भएका थिए ।
गत तीनदिन ठूलो पानी नपरेका कारण सुकेको सडकमा मंगलबार साँझदेखि यातायात निर्वाध संचालन भएको थियो । बिनयी खोलाको डाइभर्सनबाट पनि बुधबार साँझदेखि यातायात संचालन भएको थियो ।
गत पुस २६ गते दुम्कीवासस्थित बिनयी खोलामा रहेको फलामे पुल भाचिएपछि त्यसैको केही उत्तरतर्फ डाइभर्सन बनाएर यातायात संचालन हुँदै आएको छ ।
दुम्कीवासको बिनयी खोलाको मुहान रहेको पाल्पाको बाकामलांग क्षेत्रमा वर्षात् हुनासाथ यहाँको डाइभर्सन बगाउने गरेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
