काठमाडौं – स्वास्थ्य तथा जनसंख्या मन्त्रालयले सार्वजनिक गरेको संघीय अस्पताल तथा स्वास्थ्य संस्थाका लागि प्रस्तावित दरबन्दीमा एनेस्थेसिया अधिकृत (पाँचौंदेखि नवौं तहसम्म) को दरबन्दी समावेश नगरेकोप्रति नेप्लिज एशोसिएसन अफ एनेस्थेसिया टेक्नोलोजिस्टले गम्भीर आपत्ति जनाएको छ।
संस्थाका अध्यक्ष शैलेन्द्र कुमार यादवद्वारा जारी गरिएको ध्यानाकर्षण पत्रमा स्वास्थ्य सेवा जनमुखी बनाउन, संविधानले प्रत्याभूत गरेको मौलिक हक सुनिश्चित गर्न तथा जनस्वास्थ्य ऐन, २०६५ का प्रावधान कार्यान्वयन गर्न स्वीकृत दरबन्दी पुनरावलोकन अपरिहार्य भएको उल्लेख गरिएको छ।
स्वास्थ्य सेवा नियमावली २०५५ को अनुसूची ३ अन्तर्गत विविध समूहमा सातौँ तहका लागि तोकिएको शैक्षिक योग्यता भएका ऐनेस्थेसिया अधिकृतहरू विगत १० वर्षदेखि नेपाल हेल्थ प्रोफेशनल काउन्सिल (एनएचपीसी) मा दर्ता भई देशका विभिन्न दुर्गम क्षेत्रमा गुणस्तरीय सेवा दिँदै आइरहेका छन्।
‘यस जनशक्तिको व्यवस्थित व्यवस्थापन बिना गुणस्तरीय स्वास्थ्य सेवा सम्भव छैन,’ अध्यक्ष यादवले भने, ‘तसर्थ पाँचौँदेखि नवौँ तहसम्मको दरबन्दी पद सिर्जना र पदपूर्ति प्रक्रिया तत्काल अगाडि बढाइनु जरुरी छ।’
संघले सम्बन्धित निकायसँग तत्काल दरबन्दी समावेश गरी आवश्यक प्रक्रिया अघि बढाउन जोडदार माग गरेको छ।
सामाग्री श्रोत :
swasthyakhabar
