काठमाडौँ । राइड हेलिङ प्लेटफर्म इनड्राइभको टपअप अब डिजिटल वालेट ‘खल्ती’बाट सिधै गर्न सकिने भएको छ । यसअघि आईएमई पेमा मात्र सीमित यो सुविधा दुई डिजिटल वालेट गाभिने भएपछि खल्तीमा पनि उपलब्ध गराइएको हो ।
आईएमई पे र खल्ती एकआपसमा गाभिएपछि आईएमई पेका विशेष सुविधाहरू क्रमशः खल्तीमा थपिँदै गइरहेका छन् । सोही प्रक्रियाअन्तर्गत इनड्राइभ टपअपको सुविधा पनि खल्तीमा आएको हो । “पहिले राइडरहरूले इनड्राइभमा टपअप गर्न आईएमई पे नै प्रयोग गर्नुपर्ने हुन्थ्यो,” आईएमई पेका एक प्रतिनिधिले भने, “अब खल्तीमा पनि यो सुविधा उपलब्ध भएको छ, जसले गर्दा राइडरलाई थप सहज हुनेछ ।”
इनड्राइभका राइडरले प्रत्येक राइड सम्पन्न गरेपछि कम्पनीलाई निश्चित प्रतिशत कमिसन बुझाउनुपर्छ । उक्त कमिसन भुक्तानीका लागि उनीहरूले आफ्नो इनड्राइभ खातामा रकम टपअप गर्नुपर्ने हुन्छ ।
आगामी १ साउनदेखि आईएमई पेका सम्पूर्ण कारोबार खल्ती एपबाटै सञ्चालनमा आउने छन् । त्यसैको तयारी स्वरूप आईएमई पेका सेवा तथा फिचर खल्तीमा स्थानान्तरण हुन थालेका हुन् ।
पछिल्लो अध्यावधिक: असार ८, २०८२ १८:४३
सामाग्री श्रोत :
टेक पाना
