काठमाडौं- नेपाल सरकारले करिब २० वर्षपछि ल्याएको संगठन तथा व्यवस्थापन (ओएण्डएम) सर्वेक्षणमा अस्पताल व्यवस्थापक पदलाई समावेश नगरेको भन्दै नेपाल स्वास्थ्य सेवा व्यवस्थापक संघले दबाब र्याली आयोजना गरेको छ।
संघका अध्यक्ष महेन्द्र प्रसाद भुसालको नेतृत्वमा बिजुलीबजारदेखि माइतिघरसम्म र्याली निकालिएको हो।
आर्थिक वर्ष २०७४/७५ देखि करार सेवामा करिब ५० संघीय तथा प्रदेशस्तरीय अस्पतालहरूमा व्यवस्थापक कार्यरत रहेपनि बिर्सिएको उनीहरुको भनाइ छ। अस्पताल सञ्चालन निर्देशिकाअनुसार ५० सैय्याभन्दा बढी क्षमताका अस्पतालहरूमा व्यवस्थापक अनिवार्य रहनुपर्ने प्रावधान हुँदाहुँदै पनि सरकारले ओएन्डएम सर्वेमा उलंघन गरेको उनीहरुको भनाइ छ। हालका अधिकांश सरकारी अस्पतालहरूमा देखिएको व्यवस्थापनको कमजोरीले सेवा गुणस्तरमा सम्झौता भइरहेको उनीहरुको भनाइ छ।
सरकारले हालैको ओएनएम सर्भेक्षणमार्फत करिब २५ सय पद थपेको भए पनि, तीमध्ये अधिकांश चिकित्सक र नर्स वर्गमा केन्द्रित गरिएको र व्यवस्थापकलाई बेवास्ता गरिएको संघको गुनासो छ। यसले स्वास्थ्य प्रणालीको सन्तुलित विकासमा बाधा पुर्याउने उनीहरूको भनाइ छ।
संघले माइतीघर मण्डलामा र्याली गर्दै स्वास्थ्य मन्त्रालयमा ज्ञापनपत्र बुझाउने कार्यक्रम समेत रहेको छ। मन्त्री तथा सचिवसमक्ष पेश गरिने सो ज्ञापनपत्रमार्फत सरकारलाई तुरुन्त अस्पताल व्यवस्थापक पद सिर्जना गर्ने निर्णय गर्न माग गरिएको छ।
उनीहरुका मुख्य माग यसप्रकार छन्:
१ ओएनएम प्रतिवेदन पुनरावलोकन गरी व्यवस्थापक पद समावेश गरियोस्।
२ व्यवस्थापनसहितको समग्र स्वास्थ्य प्रणाली सुदृढ गरियोस्।
३ चुस्त दुरुस्त अस्पताल सञ्चालनका लागि व्यवस्थापक पद स्थायी दरबन्दीमा राखियोस्।
४ नीति, निर्देशिका र मापदण्डको कार्यान्वयन सुनिश्चित गरियोस्।
अध्यक्ष भुसालको भनाइ भिडियोमा
सामाग्री श्रोत :
swasthyakhabar
