एजेन्सी –निरन्तर आक्रमण जारी रहेको अवस्थामा आफ्नो आणविक कार्यक्रमबारे कुनै पनि वार्ता नहुने इरानले स्पष्ट पारेको छ । यो प्रतिक्रिया इजरायलका रक्षामन्त्रीले इरानसँग ‘लामो संघर्ष’ को चेतावनी दिएपछि आएको हो ।
इरानी विदेशमन्त्री अब्बास अराघचीले जिनेभामा युरोपेली कूटनीतिज्ञहरूसँग भेट गरेका थिए । उनलाई अमेरिकासँग आणविक कूटनीति पुनः सुरु गर्न आग्रह गरिएको थियो । तर उनले भने, ‘इजरायलको आक्रामकता रोकिएपछि मात्र कूटनीति सम्भव हुन्छ ।’
तेहरानले आणविक कार्यक्रम पूर्णतः शान्तिपूर्ण भएको दाबी गर्दै इजरायली आक्रमणलाई अन्तर्राष्ट्रिय कानुनको उल्लङ्घन भनेको छ । अराघचीले थपे, ‘इरान आफ्नो वैध आत्मरक्षा अधिकार प्रयोग गर्न पछि पर्ने छैन ।’
त्यसैबिच, इजरायली सेनाले इरानी मिसाइल भण्डारण र प्रक्षेपण केन्द्रहरूमा नयाँ आक्रमण सुरु गरेको जनाएको छ । यसअघि इरानले पनि इजरायलको मध्य क्षेत्रमा मिसाइल प्रहार गरेको थियो । तेल अभिभ नजिकै विस्फोटको ठुलो आवाज सुनिएको थियो । रिपोर्टअनुसार केही भवनमा आगलागी समेत भएको छ ।
इजरायलका विदेश मन्त्री एयाल जामिरले भिडियो सन्देशमार्फत आफ्नो देश ‘कठिन दिनहरू’ का लागि तयार रहनुपर्ने बताएका छन् । इजरायलका संयुक्त राष्ट्रसंघका राजदूतले इरानलाई ‘विनाशकारी एजेन्डा’ बोकेको देश भन्दै आणविक केन्द्रहरू पूर्ण रूपमा नष्ट नभएसम्म आक्रमण नरोकिने बताए ।
यसैबिच, अमेरिकी राष्ट्रपति डोनाल्ड ट्रम्पले इरानलाई अमेरिकी हवाई आक्रमणबाट बच्नको लागि दुई हप्ताको समय दिएका छन् । उनले भने, ‘म निर्णय लिनुअघि अधिकतम दुई हप्ता कुर्नेछु ।’ अब क्षेत्रीय तनावले अन्तर्राष्ट्रिय कूटनीतिक प्रयासहरूमा असर पार्ने देखिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
सामाग्री श्रोत :
नेपाललाइभ
