काठमाडौं – डेन्टल सर्जनलाई दरबन्दीमा समावेश नगरिएकोमा नेपाल डेन्टल एशोसिएसनको आपत्ति जनाएको छ। मन्त्रालयले हालै अर्थ मन्त्रालय पठाएको दरबन्दी प्रस्तावमा दन्त सर्जनलाई प समावेश नगरिएकोप्रति नेपाल डेन्टल एशोसिएसन (एनडीए)ले ध्यानाकर्षण पत्र बुझाएको हो।
एशोसिएसनका केन्द्रीय सदस्य डा भूमेश काफ्लेले भने, ‘हिजो सार्वजनिक भएको ओएन्डएम रिपोर्टमा एशोसिएसनको गम्भिर ध्यानाकर्षण भएको छ। यसपटक पनि डेन्टल सर्जनलाई दरबन्दीमा समावेश नगरिनु अत्यन्तै आपत्तिजनक कुरा हो। त्यस्तै हाम्रा विशेषज्ञ विषयहरू जस्तै ओरल मेडिसिन, ओरल प्याथोलोजी, पेडोडोन्टिक्स र पब्लिक हेल्थ डेन्टिस्ट्रि मा अहिलेसम्म एउटा पनि दरबन्दी खोलिएको छैन।’
रिपोर्ट सार्वजनिक भएसँगै बुधबार एनडिएका महासचिव डा. प्रदीप भण्डारीको नेतृत्वमा एक प्रतिनिधिमण्डल स्वास्थ्य तथा जनसंख्या मन्त्रालयमा पुगेर ध्यानाकर्षण पत्र बुझाएको छ। पत्रमा मन्त्रालयले डेन्टल सर्जनसम्बन्धी दरबन्दी तथा विशेषज्ञ शाखाहरूलाई नसमेटिएकोप्रति गम्भीर चासो व्यक्त गरिएको छ।
एशोसिएसनले सरकारसँग सार्वजनिक स्वास्थ्य प्रणालीमा दन्त सेवाको महत्वलाई दृष्टिगत गर्दै विभिन्न विशेषज्ञलाई पनि दरबन्दीमा तत्काल समावेश गर्न माग गरेको छ। डेन्टल सर्जनको संख्या र उपस्थितिलाई सुनिश्चित गर्न प्रभावकारी योजना आवश्यक रहेको एशोसिएसनको भनाइ छ।
स्वास्थ्य सेवा पहुँचको क्षेत्रमा दन्त विशेषज्ञताको योगदान बढ्दो रहेको सन्दर्भमा उपेक्षा गर्नु नीति निर्माताहरूको उदासीनता रहेको एनडीएले जनाएको छ।
सामाग्री श्रोत :
swasthyakhabar
