काठमाडौँ । ताइवानले पहिलो पटक चिनियाँ प्रविधि र चिप निर्माता कम्पनी ह्वावे र सेमिकन्डक्टर म्यानुफ्याक्चरिङ इन्टरनेसनल कर्प (एसएमआईसी) लाई कालोसूचीमा राख्दै अमेरिकाको प्रविधि नियन्त्रण अभियानमा साथ दिएको छ ।
ताइवान सरकारले अबदेखि यी कम्पनीहरूसँग कुनै पनि व्यापार गर्न पूर्वस्वीकृति अनिवार्य रूपमा लिनुपर्ने नीति ल्याएको छ । यो कदमलाई अमेरिकासँग प्रविधि साझेदारी मजबुत बनाउने र चीनमा प्रविधि हस्तान्तरण रोक्ने रणनीतिक प्रयासको रूपमा हेरिएको छ ।
ताइवानी राष्ट्रपति लाइ छिङ-तेले गएको अप्रिलमा अमेरिकालाई निर्यात नियन्त्रणबारे चासो सम्बोधन गर्ने वाचा गरेपछि लिएको यो पहिलो ठोस निर्णय हो । अमेरिकी राष्ट्रपति डोनल्ड ट्रम्पको दोस्रो कार्यकाल सुरु भएदेखि नै ताइवानमाथि यस्तो कदम चाल्न दबाब दिइएको थियो ।
अमेरिकी कंग्रेसको चीनसम्बन्धी समितिले पनि ताइवानको निर्णयपछि साझेदार राष्ट्रहरूसँग सहकार्यलाई अझै मजबुत बनाउने बताएको रोयटर्समा उल्लेख छ ।
विश्लेषकहरूका अनुसार यो कदमले ताइवानलाई चीनसँगको प्रविधि प्रतिस्पर्धामा सक्रिय बनाएको छ । यसअघि अमेरिकी प्रतिबन्धविपरीत ताइवानको टीएसएमसी कम्पनीले ह्वावेका लागि २९ लाख एआई चिप उत्पादन गरेको तथ्य बाहिर आएको थियो । त्यसपछि अमेरिकी दबाबमा टीएसएमसीले उक्त बिचौलिया कम्पनीसँग सम्बन्ध तोडेको थियो ।
यद्यपि यो प्रतिबन्धले तत्काल ठुलो व्यापारिक असर नपार्ने विश्लेषण गरिएको छ । किनभने धेरै चिनियाँ कारोबार ताइवान कम्पनीका चिनियाँ शाखामार्फत हुँदै आएका छन् । चिनियाँ विदेश मन्त्रालयले भने ताइवानले अमेरिकालाई खुसी पार्न आफ्नै हित गुमाएको आरोप लगाएको छ । चीनले ताइवानलाई आफ्नो भूभाग दाबी गर्दै आवश्यक परे बल प्रयोग गरेर एकीकरण गर्ने बताउँदै आएको छ ।
पछिल्लो अध्यावधिक: असार ४, २०८२ १६:३६
सामाग्री श्रोत :
टेक पाना
