काठमाडौँ । स्पेसएक्सका संस्थापक एलन मस्कले इरानमा आफ्नो स्याटेलाइटमा आधारित इन्टरनेट सेवा ‘स्टारलिङ्क’ सुचारु गरेका छन् । शनिबार सामाजिक सञ्जाल एक्समा पोस्ट राख्दै मस्कले स्टारलिङ्ककको इन्टरनेट उपलब्ध गराएको पुष्टि गरेका हुन् ।
इजरायलले इरानका आणविक केन्द्रमा हमला गरेपछि त्यहाँको इस्लामिक सरकारले इन्टरनेट सेवामाथि अस्थायी प्रतिबन्ध लगाएको थियो । यस्तो अवस्थामा इन्टरनेट सेवा नै अवरुद्ध भएपछि मस्कले यो कदम चालेका हुन् ।
The beams are on
— Elon Musk (@elonmusk) June 14, 2025
द जेरुसेलम पोस्टका अनुसार इरानको सञ्चार मन्त्रालयले देशव्यापी रूपमा इन्टरनेट सेवामा अस्थायी प्रतिबन्ध र अवरोधको घोषणा गरेपछि मस्कले यस्तो घोषणा गरेका हुन् । मन्त्रालयले जारी गरेको विज्ञप्तिमा भनिएको थियो, “देशको विशेष परिस्थितिलाई ध्यानमा राख्दै, इन्टरनेटमा अस्थायी प्रतिबन्ध लगाइएको छ ।”
स्टारलिङ्क स्पेसएक्सले निर्माण गरेको स्याटेलाइटमा आधारित इन्टरनेट प्रणाली हो । यसले शहरदेखि इन्टरनेटको पहुँच कठिन हुने ग्रामीण भेगमा उच्च गतिको इन्टरनेट उपलब्ध गराउँछ । पृथ्वीको नजिकै परिक्रमा गर्ने यी स्याटेलाइटले तीव्र गतिमा इन्टरनेट प्रदान गर्न मद्दत गर्छन् ।
पछिल्लो अध्यावधिक: असार १, २०८२ १०:५०
सामाग्री श्रोत :
टेक पाना
