काठमाडौं- अमेरिकाबाट प्राप्त सहयोगमा ठूलो कटौती भएपछि विश्वका ठूला स्वास्थ्य संस्थाहरूले एकआपसमा सहकार्य गर्न तयारी थालेका छन्।
गाभी र ग्लोबल फन्डले खर्च कम गर्न र कार्यक्रमको प्रभावकारिता बढाउन रणनीतिक रूपमा सहकार्य गर्ने संकेत दिएका छन्।
अहिले विश्वभर खोप, एड्स, क्षयरोग र मलेरिया जस्ता रोगको उपचारका लागि काम गर्दै आएका यी संस्थाहरूले अमेरिकी सहयोगमा आएको कमीका कारण भविष्यका लागि रणनीति परिवर्तन गर्न थालेका हुन्।
ग्लोबल फन्डका प्रमुख कार्यकारी अधिकृत पिटर स्यान्ड्सले भने, ‘अहिलेको संकटले हामीलाई यो संरचनालाई गहिरो रूपमा पुनर्विचार गर्न बाध्य पारेको छ।’
यी दुई संस्था सँगै विश्व बैंकको ग्लोबल फाइनान्सिङ फ्यासिलिटीले पनि सहकार्यमा चासो देखाएको छ। उदाहरणका लागि, नाइजेरियामा यी संस्थाहरूको समन्वयमा एकैपटक खोप र मलेरिया विरुद्धका उपकरण वितरण गरिएको छ, जसले स्रोतको अधिकतम उपयोग सुनिश्चित गरेको छ।
गाभीले कर्मचारी संख्यालाई व्यवस्थापन गर्न स्वयंसेवा कार्यक्रम सुरु गरेको छ भने ग्लोबल फन्डले पनि आन्तरिक रणनीति पुनरावलोकन गरिरहेको छ। दुवै संस्था आगामी वर्षका लागि ठूलो मात्रामा आर्थिक संकलनको तयारीमा छन्। गाभीले सन् २०२६ देखि २०३० का लागि ९ अर्ब डलर संकलन गर्ने योजना बनाएको छ भने ग्लोबल फन्डले सन् २०२७ देखि २०२९ का लागि १८ अर्ब डलर जुटाउने लक्ष्य लिएको छ।
यसबीच, विश्व स्वास्थ्य संगठनले पनि अमेरिकी सहयोग गुमाएपछि ६० करोड डलरको बजेट घाटा बेहोर्नुपरेको छ। यसका कारण विश्व स्वास्थ्य संगठनले २० प्रतिशत बजेट कटौती गर्दै कर्मचारी घटाउने निर्णय गरेको छ। यस्तो संकटलाई ध्यानमा राख्दै चीनले पाँच वर्षमा ५० करोड डलरको सहयोग दिने घोषणा गरिसकेको छ।
अमेरिकी सहयोग नहुँदा निम्न आय भएका देशहरूमा खोप कार्यक्रम र स्वास्थ्य सेवा संकटमा पर्न सक्ने भएकाले यी संस्थाहरूको सहकार्यले अबको स्वास्थ्य रणनीति निर्धारण गर्ने देखिएको छ।
सामाग्री श्रोत :
swasthyakhabar
