काठमाडौं – सांसद प्रतिमा गौतमले मिर्गौला रोगबाट पीडित बिरामीहरूको दयनीय अवस्था र अङ्ग प्रत्यारोपणको समस्याबारे संसदमा जोडदार रूपमा कुरा उठाएकी छिन्। उनले मिर्गौला रोगीहरूको जीवन रक्षा गर्न अङ्ग प्रत्यारोपण सम्बन्धी नीतिगत प्रावधानहरूको प्रभावकारी कार्यान्वयन र मस्तिष्क मृत्यु कार्यक्रमलाई छिटोछरितो बनाउन सरकारसँग माग गरेकी हुन्।
सांसद गौतमले भनिन्, ‘मिर्गौला रोगबाट पीडित ९० प्रतिशत बिरामीहरू अङ्गदाता नपाएर ज्यान गुमाइरहेका छन्। हाल करिब ८,००० बिरामीहरू अङ्गदाताको पर्खाइमा छन्। अङ्गदाता अभावमा धेरैजसो बिरामीहरू डाइलेसिसमा निर्भर छन्, जसले उनीहरूको शारीरिक, मानसिक र आर्थिक जीवनलाई कष्टकर बनाएको छ।”
सरकारले डाइलेसिसमा मात्र वार्षिक करिब डेढ अर्ब रुपैयाँ खर्च गरिरहेको उनले बताइन्।
उनले मानव शरीरको अङ्ग प्रत्यारोपण सम्बन्धी नियमावली २०७३ मा मस्तिष्क मृत्यु भएका व्यक्तिबाट अङ्ग लिन पाउने प्रावधान रहेको उल्लेख गर्दै यो प्रावधान पूर्ण रूपमा कार्यान्वयन नहुँदा बिरामीहरूको बाँच्ने आशा निराशामा परिणत भएको बताए। मस्तिष्क मृत्यु कार्यक्रमको प्रभावकारिता बढाउन सके मिर्गौला पीडितहरूको समस्या समाधानमा ठूलो योगदान पुग्ने उनको भनाइ छ।
सभामुखमार्फत् सरकारलाई सम्बोधन गर्दै सांसद गौतमले अङ्ग प्रत्यारोपण सम्बन्धी कानुन र नीतिहरूलाई प्रभावकारी बनाउन र मस्तिष्क मृत्यु कार्यक्रमलाई सरल र छिटो बनाउन तत्काल कदम चाल्न आग्रह गरे।
सामाग्री श्रोत :
swasthyakhabar
