प्रधानमन्त्री ओलीले भने– ‘हामी कसैसँग संलग्न हुँदैनौ, हामी कुनै सैन्य गठबन्धनमा सामेल हुँदैनौं’

काठमाडौँ – प्रधानमन्त्री केपी शर्मा ओलीले सम्मानजनक र लाभदायी अन्तर्राष्ट्रिय सम्बन्ध बनाएर अगाडि बढ्ने बताएका छन्। शनिबार बालुवाटारमा बसेको एमाले संसदीय दलको बैठकलाई सम्बोधन गर्दै उनले सो कुरा बताएका हुन्।

नेपालले युएनलाई आत्मसात् गरेर अन्तर्राष्ट्रिय नीति अगाडि बढाउनेसमेत प्रधानमन्त्री ओलीले बताए। युएनको बडापत्र, मानवअधिकार घोषणापत्र, समानता तथा राष्ट्रिय हितका लागि अन्तर्राष्ट्रिय सम्झौताहरूलाई आत्मसात् गर्ने उनले बताए। राष्ट्रिय हितलाई केन्द्रमा राखेर सबैसँग समान सम्बन्ध राख्ने उल्लेख गर्दै उनले भने, ‘हाम्रा बाहिरी र आन्तरिक नीतिहरू सुस्पष्ट र सही छन्।’

नेपालले असंलग्न परराष्ट्र नीति अँगाल्दै आएको बताउँदै उनले असंलग्न आन्दोलनका सिद्धान्तहरूलाई मानेर अगाडि बढिरहेको पनि बताए। उनले भने, ‘हाम्रो कसैप्रति झुकाव हुँदैन, हामी कसैसँग संलग्न हुँदैनौ, हामी कुनै सैन्य गठबन्धनमा सामेल हुँदैनौ।’

एमाले संसदीय दलका नेता समेत रहेका प्रधानमन्त्री ओलीले वादविवाद वा कुनै पनि प्रकारको तनाव भएमा कसैप्रति ढल्किने भन्दा तटस्थ ढङ्गले वार्ताद्वारा समस्याको समाधान होस् भन्ने ढङ्गले अगाडि बढ्ने आकाङ्क्षा राखेको बताए। ‘सबैसँग मित्रता, छैन कसैसँग शत्रुता’ भन्ने नेपालको नीति रहेको बताउँदै प्रधानमन्त्री ओलीले यी सबै कुरामा आफ्नो पार्टी स्पष्ट रहेको बताए। उनले भने, ‘हाम्रो अधार पोलिसी यिनै हुन्।’